ການປິດເຂດ ທີ່ຍັງເຫລືອຢູ່ພຽງບ່ອນດຽວ ຕາມຊາຍແດນຊີເຣຍ ທີ່ພວກນັກລົບຕ່າງປະ ເທດຍັງສາມາດຂ້າມເຂົ້າໄປແລະອອກມາຈາກດິນແດນທີ່ຄວບຄຸມໂດຍກຸ່ມລັດອິສລາມ ນັ້ນແມ່ນນຶ່ງໃນບູລິມະສິດສຳລັບກຳລັງແນວໂຮມພາຍໃຕ້ການນຳພາຂອງສະຫະລັດອີງ ຕາມຄຳເວົ້າ ຂອງທ່ານ Ash Carter ລັດຖະມົນຕີກະຊວງປ້ອງກັນປະເທດສະຫະລັດ.
ໃນການຖະແຫຼງທີ່ລັດ Colorado ທາງພາກຕາເວັນຕົກຂອງສະຫະລັດໃນວັນສຸກວານ ນີ້ທ່ານ Carter ກ່າວວ່າ ການແບ່ງປັນແລະສະໜອງຂໍ້ມູນໃນທົ່ວສະໜາມລົບແມ່ນເພື່ອ ຊ່ອຍປ້ອງກັນບໍ່ໃຫ້ມີການໂຈມຕີແລະການຄວບຄຸມພວກນັກລົບຕ່າງປະເທດ.
ຫົວໜ້າຂອງທຳນຽບຫ້າແຈ ກ່າວຕື່ມວ່າ ໂດຍສະເພາະແລ້ວ ກະຊວງປ້ອງກັນປະເທດ ໄດ້ແບ່ງປັນໃນອັນທີ່ຕົນເກັບກຳມາຈາກສະໜາມລົບ ກັບພະແນກ ການຕ່າງໆພາຍໃນ ປະເທດທີ່ເປັນຜູ້ນຳພາໃນການກວດກາແລະຕິດຕາມສິ້ງຊອມ.
ທ່ານ Carter ກ່າວວ່າ ລາຍມືທີ່ໄດ້ມາຈາກລະເບີດ IED ແລະຂໍ້ມູນຂອງສ່ວນບຸກຄົນ ທີ່ໄດ້ຮັບຈາກພວກກໍ່ການຮ້າຍທີ່ຈັບໄດ້ ແມ່ນບັນທຶກເພີ້ມເຂົ້າໃສ່ສາງຂໍ້ມູນທີ່ເອີ້ນວ່າ Biometrics Enabled Watchlist ຊຶ່ງມີໄວ້ ສຳລັບພະແນກການຕ່າງໆຂອງລັດຖະ ບານທຸກປະເທດແລະພັນທະມິດຂອງສະຫະລັດ.
ໃນລະຫວ່າງການປະຊຸມທີ່ເຢຍຣະມັນເມື່ອຕົ້ນເດືອນນີ້ກັບບັນດາສະມາຊິກຂອງແນວ ໂຮມຕໍ່ຕ້ານກຸ່ມລັດອິສລາມນັ້ນ ທ່ານ Carter ກ່າວວ່າ ພວກທ່ານໄດ້ຫາລືກັນກ່ຽວກັບ ຄວາມພະຍາຍາມເພື່ອຂັບໄລ່ນັກລົບກຸ່ມລັດອິສລາມອອກໄປຈາກເຂດເມືອງ Manbij ຂອງຊີເຣຍ.
