ກຸ່ມລັດອິສລາມ ຫົວຮຸນແຮງ ໄດ້ຢືນຢັນໃນວັນຈັນວານນີ້ ເຖິງການຕາຍຂອງນຶ່ງໃນບັນດາຜູ້ນຳອາວຸໂສຂອງພວກຕົນ ຜູ້ຊຶ່ງທາງທຳນຽບຫ້າແຈ ໄດ້ກ່າວວ່າ ຜູ້ກ່ຽວ ໄດ້ຖືກສັງຫານ ໃນຕົ້ນເດືອນແລ້ວນີ້ ຈາກການໂຈມຕີທາງອາກາດ ຢູ່ໃກ້ໆກັບເຂດທີ່ໝັ້ນຂອງກຸ່ມກໍ່ການຮ້າຍຂອງຊີເຣຍ ໃນເມືອງ Raqqa.
ລາຍງານຂອງກຸ່ມລັດອິສລາມ ຫົວຮຸນແຮງ ທາງອິນເຕີແນ໊ຕ ທີ່ກ່າວໃນການລະລຶກເຖິງທ່ານ Wa’il Adil Salman al-Fayad ທີ່ຮູ້ກັນໃນວົງການທະຫານສະຫະຣັດ ວ່າ “ດຣ. Wa’il.” ລາຍງານນີ້ ບໍ່ໄດ້ເວົ້າເຖິງ ເວລາ ຫຼື ສະຖານທີ່ໃດ ບ່ອນທີ່ຜູ້ນຳຂອງພວກເຂົາເສຍຊີວິດ.
ທຳນຽບຫ້າແຈ ກ່າວວ່າ ທ່ານ Fayad ໄດ້ຖືກເປັນເປົ້າໝາຍແລະຖືກສັງຫານ ໃນວັນທີ 7 ກັນຍາ ໃກ້ໆກັບເມືອງ Raqqa ເມືອງທີ່ກຸ່ມລັດອິສລາມ ອ້າງເອົາເປັນເມືອງຫຼວງນັ້ນ. ເຈົ້າໜ້າທີ່ຂອງທຳນຽບຫ້າແຈ ທີ່ໄດ້ກວດເບິ່ງວີດີໂອ ຂອງການໂຈມຕີໃນເດືອນທີ່ຜ່ານມາ ບອກກັບ VOA ວ່າ ທ່ານ Fayad ເສຍຊີວິດໃນຂະນະທີ່ນັ່ງຢູ່ລົດຈັກໃກ້ໆກັບເຮືອນຫຼັງນຶ່ງ.
ເຈົ້າໜ້າທີ່ສະຫະຣັດ ຊີ້ແຈງວ່າ ໃນຂະນະນັ້ນ ທ່ານ Fayad ແມ່ນເປັນສະມາຊິກຄົນສຳຄັນຂອງສະພາ Shura ຂອງກຸ່ມລັດອິສລາມ ທີ່ອອກຄຳສັ່ງໃຫ້ປະຕິບັດງານ. ນອກນັ້ນຍັງເຊື່ອກັນວ່າ ເຂົາຍັງໄດ້ ເປັນຜູ້ທີ່ກຳກັບ ການປະຕິບັດໂຄສະນາຊວນເຊື່ອ
ທາງວີດີໂອ ທີ່ສະແດງໃຫ້ເຫັນເຖິງການທໍລະມານແລະການປະຫານຊີວິດນຳ.
ນອກນັ້ນອີກທຳນຽບຫ້າແຈ ຍັງໄດ້ກ່າວວ່າ ທ່ານ Fayad ແມ່ນເປັນຜູ້ໃກ້ຊິດກັບທ່ານ
Abu Muhammed al-Adnani ຜູ້ນຳຄະນະວາງແຜນຍຸດທະສາດກຸ່ມລັດອິສລາມ ໃນພາກເໜືອຂອງຊີເຣຍ ທີ່ຖືກຂ້າໂດຍການໂຈມຕີທາງອາກາດ ນຳພາໂດຍສະຫະລັດ ໃນທ້າຍເດືອນສິງຫາຜ່ານມານີ້. ກຸ່ມລັດອິສລາມ ໄດ້ເຂົ້າຄວມຄຸມພາກສ່ວນໃຫຍ່ຂອງອີຣັກແລະຊີເຣຍ ບ່ອນທີ່ໄດ້ປະກາດຂ່າວໃນການຕັດຫົວຂອງພວກນັກຂ່າວ ພະນັກງານຊ່ອຍ ແລະຊົນກຸ່ມນ້ອຍ ໃນຂະນະທີ່ພະຍາຍາມກໍ່ສ້າງລັດອິສລາມຂຶ້ນມາ.
