ກອງທັບອີຣັກ ໄດ້ເປີດສາກບຸກ ທີ່ຕົນເອີ້ນວ່າ ເປັນການໂຈມຕີ
ຄັ້ງສຳຄັນ ເພື່ອຍຶດເອົາຄືນ ເມືອງ Tikrit ທາງພາກເໜືອ ຂອງ
ປະເທດ ຈາກພວກ Sunni ISIL ຫົວຮຸນແຮງ.
ເຈົ້າໜ້າທີ່ທະຫານຫຼາຍຄົນ ກ່າວວ່າ ການປະຕິບັດການ ທາງ
ພາກພື້ນດິນ ໄດ້ເລີ້ມຂຶ້ນ ເມື່ອວັນເສົາວານນີ້ ໂດຍມີການຕໍ່ສູ້ກັນ
ຢ່າງໜັກໜ່ວງ ລະຫວ່າງພວກກະບົດຊູນີ ແລະ ກອງກຳລັງພິເສດ
ຂອງອີຣັກ ທີ່ພະຍາຍາມຈະຕີເອົາມະຫາວິທະຍາໄລແຫ່ງໜຶ່ງຄືນ
ມາ. ເຮືອບິນລົບເຮລິຄອບເຕີ ຫຼາຍລຳໄດ້ຍິງໂຈມຕີ ໃສ່ບໍລິເວນ
ມະຫາວິທະຍາໄລເພື່ອຂັບໄລ່ພວກກະບົດໃຫ້ຖອຍໜີໄປ ໃນ
ຂະນະທີ່ກອງລົດຖັງບຸກໂຈມຕີຈາກທາງກ້ຳໃຕ້.
ໃນຂະນະດຽວກັນນັ້ນ ອີຣັກກ່າວວ່າ ຕົນໄດ້ຮັບເຮືອບິນລົບອາຍພົ່ນ ມືສອງຈາກຣັດເຊຍ
ຫຼາຍລຳ ເພື່ອໃຊ້ໃນການຕໍ່ສູ້ກັບພວກຫົວຮຸນແຮງ.
ການບຸກໂຈມຕີຫຼ້າສຸດນີ້ ມີຂຶ້ນເມື່ອບໍ່ດົນຫຼັງຈາກ ບັນດາເຈົ້າໜ້າທີ່ ສະຫະລັດກ່າວວ່າ
ທະຫານຂອງຕົນ ກຳລັງສົ່ງຍົນປະກອບອາວຸດ ທີ່ບໍ່ມີຄົນຂັບ ຫຼື Drone ຈຳນວນໜຶ່ງ
ຂຶ້ນບິນໃນເຂດນ່ານຟ້າຂອງອີຣັກ ເພື່ອປົກປ້ອງພວກທີ່ປຶກສາທະຫານສະຫະລັດ ຊຶ່ງ
ໄດ້ຖືກສົ່ງໄປຊ່ອຍຕ້ານຢັນພວກກະບົດນັ້ນ.
ປະທານາທິບໍດີ Barack Obama ໄດ້ສົ່ງ ທະຫານຈຳນວນ 300 ຄົນໄປອີຣັກໃນຕົ້ນ
ເດືອນນີ້ ເພື່ອເສີມສ້າງຄວາມແຂງແກ່ງ ໃຫ້ກອງກຳລັງຮັກສາຄວາມປອດໄພຂອງ
ລັດຖະບານ ແລະ ຊ່ອຍຈັດຕັ້ງສູນ ກາງປະຕິບັດງານຮ່ວມ ໃນການຕໍ່ສູ້ກັບພວກຊູນີ ISIL
ຫົວຮຸນແຮງ.
