ຕໍາຫລວດອີຣັກກ່າວວ່າ ລະເບີດແຕກຂຶ້ນຫລາຍບັ້ນຊ້ອນກັນໄດ້ເຮັດໃຫ້ປະຊາຊົນຢ່າງໜ້ອຍ 10 ຄົນເສຍຊີວິດແລະບາດເຈັບຕື່ມອີກຫລາຍສິບຄົນໃນເມືອງສາສະໜາ Karbala ຂອງອີຣັກ ຊຶ່ງຕັ້ງຢູ່ຫ່າງຈາກ ນະຄອນຫລວງແບກແດ໊ດໄປທາງທິດໃຕ້ປະມານ 80 ຫລັກກິໂລແມັດ.
ຕໍາຫລວດກ່າວວ່າ ລະເບີດລູກນຶ່ງໄດ້ແຕກຂຶ້ນໃນວັນອາທິດມືນີ້ ຢູ່ນອກພວກຫ້ອງການ
ອອກໜັງສືຜ່ານແດນແລະບັດປະຈໍາຕົວໃຫ້ປະຊາຊົນນັ້ນ. ບັນດາເຈົ້າໜ້າທີ່ກ່າວຕື່ມວ່າ
ລະເບີດລູກອື່ນໆໄດ້ແຕກຂຶ້ນເວລາພວກເຈົ້າໜ້າທີ່ຮັບມືກັບພາວະສຸກເສີນ ເດີນທາງໄປ
ຮອດ.
ການໂຈມຕີເຫລົ່ານີ້ມີຂຶ້ນໃນຂະນະທີ່ສະຫະລັດກໍາລັງດໍາເນີນໄປຕາມແຜນການຂອງຕົນ
ທີ່ຈະຖອນທະຫານອອກຈາກອີຣັກໄປພາຍໃນທ້າຍປີນີ້. ຄວາມຮຸນແຮງໄດ້ຜ່ອນຄາຍ
ລົງຈາກລະດັບສູງສຸດໃນປີ 2006 ແລະ 2007 ແຕ່ທັງເຈົ້າໜ້າທີ່ສະຫະລັດແລະອີຣັກ
ຕ່າງກໍໄດ້ສະແດງຄວາມເປັນຫ່ວງອອກມາກ່ຽວກັບສະມັດຖະພາບຂອງອີຣັກ ໃນການ
ຮັບມືກັບການຮັກສາຄວາມປອດໄພ ຫລັງຈາກສະຫະລັດຖອນທະຫານອອກໄປແລ້ວນັ້ນ.
