ລິ້ງ ສຳຫລັບເຂົ້າຫາ

ວັນເສົາ, ໒໒ ມິຖຸນາ ໒໐໒໔

40 ກວ່າຄົນ ເສຍຊີວິດ ໃນອຸປະຕິເຫດ ລົດໄຟ ຕຳກັນ ຢູ່ອີຣ່ານ


ຮູບນີ້ແມ່ນນຳອອກເຜີຍແຜ່ ໂດຍອົງການຂ່າວ Fars ທີ່ສະແດງໃຫ້ເຫັນ ບ່ອນລົດໄຟຕຳກັນ ທາງຕາເວັນອອກ ນະຄອນຫຼວງເຕຫະຣ່ານ (25 ພະຈິກ 2016)
ຮູບນີ້ແມ່ນນຳອອກເຜີຍແຜ່ ໂດຍອົງການຂ່າວ Fars ທີ່ສະແດງໃຫ້ເຫັນ ບ່ອນລົດໄຟຕຳກັນ ທາງຕາເວັນອອກ ນະຄອນຫຼວງເຕຫະຣ່ານ (25 ພະຈິກ 2016)

ມີ​ຜູ້​ເສຍ​ຊີວິດ ​ຢ່າງ​ໜ້ອຍ 43 ຄົນ ​ຍ້ອນ​ອຸປະຕິ​ເຫດ​ ລົດ​ໄຟ​ຕຳ​ກັນ ​ໃນ​ວັນ​ສຸກ​ວານນີ້ຢູ່ທີ່​ແຂວງ Semnan ທາງ​ພາກ​ກາງ​ຕອນ​ເໜືອຂອງ​ປະ​ເທດ​ອີຣ່ານ. ນອກ​ນັ້ນຍັງ​ມີ​ອີກ​ຫຼາຍ​ກວ່າ 100 ຄົນ​ໄດ້​ຖືກສົ່ງ​ໄປ​ຮັບ​ການ​ປິ່ນປົວ​ຢູ່​ທີ່​ໂຮງໝໍ ຫລັງ​ຈາກ​ທີ່​ໄດ້​ເກີດ​ອຸປະຕິ​ເຫດ​ແລ້ວ.

​ລາຍ​ງານ​ຂ່າວ​ຂອງໂທລະພາບທາງ​ການ​ອີຣ່ານສະ​ແດງ​ໃຫ້​ເຫັນ​ວ່າ ມີ​ລົດ​ໄຟ 4 ຕູ້​ໄດ້​ຕົກ​ລາງ​ໂດຍ​ທີ່ 2 ຕູ້​ໄດ້​ລຸກ​ໄໝ້​ເປັນ​ໄຟ. ພວກ​ກູ້​ໄພ​ກຳລັງ​ເຮັດ​ວຽກ​ຢູ່​ໃກ້ໆຕູ້​ລົດ​ໄຟ​ທີ່​ເກີດ​ໄຟ​ໄໝ້.

ອຸປະຕິ​ເຫດ​ໃນ​ຄັ້ງນີ້ ແມ່ນ​ເກີດ​ຂຶ້ນຢູ່​ເທິງ​ເສັ້ນທາ​ງສາຍ​ຫຼັກລະຫວ່າງ​ນະຄອນຫຼວງ​ເຕຫະ ຣ່ານ​ແລະ​ເມືອງ Mashhad ຫົວ​ເມືອງ​ໃຫຍ່​ອັນ​ດັບ​ສອງ ​ຂອງ​ອີ​ຣ່ານ ​ເວລາ​ລົດ​ໄຟ​ໂດຍ ສານ​ທີ່​ກຳລັງເດີນທາງ​ ຕຳ​ກັບ​ລົດ​ໄຟ​ດ່ວນ ທີ່​ຈອດ​ຢູ່​ສະຖານີແຫ່ງ​ນຶ່ງ ຍ້ອນ​ບັນຫາ​ທາງ​ດ້ານ​ເຄື່ອງ​ຈັກ.

ເຈົ້າ​ແຂວງ Mohammad Reza Khabbaz ກ່າວ​ຕໍ່​ໂທລະພາບ​ ຂອງ​ລັດຖະບານ​ວ່າ ຈຳນວນພວກ​ທີ່​ບາດ​ເຈັບ​ລົ້ມຕາຍ​ມີ​ທ່າ​ທາງ​ວ່າ​ຈະ​ເພີ້ິ້ມຂຶ້ນຕື່ມ​ແລະ​ອາກາດ​ໜາວອາດ ​ມີສ່ວນ​ພາ​ໃຫ້​ເກີດ​ອຸປະຕິ​ເຫດ​ໃນເທື່ອ​ນີ້.

ທ່ານ Khabbaz ກ່າວ​ວ່າ “ການ​ສືບສວນ​ໃນ​ຂັ້ນຕົ້ນສະ​ແດງ​ໃຫ້​ເຫັນ​ວ່າ ​ໄດ້​ເກີດ​ບັນທາງ​ດ້ານ​ເຄື່ອງ​ຈັກ ບາງທີ​ອາດ​ມີ​ສາ​ເຫດ​ມາ​ຈາກ​ອາກາດ​ໜາວ ​ໄດ້​ບັງຄັບ​ໃຫ້​ລົດ​ໄຟ​ດ່ວນ ທີ່​ແລ່ນ​ລະຫວ່າງ​ເມືອງ Tabriz ​ແລະ Mashhad ຕ້ອງ​ໄດ້​ຈອດ.”

​ແຕ່​ອົງການ​ຂ່າວ​ເອພີລາຍ​ງານ​ວ່າ ຜູ້​ແທນ​ຄົນ​ນຶ່ງ​ຈາກ​ເຂດ​ດັ່ງກ່າວ​ໃຫ້​ຮ່ອງຮອຍ​ວ່າ​ເຈົ້າ ໜ້າ​ທີ່​ຢູ່​ສະຖານີ​ລົດ​ໄຟ​ເມືອງ Semnan ອາດ​ອະນຸຍາດ​ດ້ວຍ​ຄວາມ​ຜິດພາດ​ໃຫ້​ລົດ​ໄຟ ນຶ່ງ​ໃນ​ສອງ​ຂະ​ບວນ ແລ່ນ​ໄປກ່ອນ​ກຳນົດ.

ປະທານາທິບໍດີ​ອີ​ຣ່ານທ່ານ Hassan Rouhani ​ໄດ້​ອອກ​ຖະ​ແຫຼງຂ່າວ​ສະບັບນຶ່ງສະ​ແດງ​ຄວາມ​ເສົ້າ​ສະຫລົດ​ໃຈ​ຕໍ່​ຄອບຄົວ​ຂອງ​ພວກ​ເຄາະ​ຮ້າຍ.

ອີງ​ຕາມອົງການ​ຂ່າວ​ເອພີ​ແລ້ວ ອີຣ່ານລາຍ​ງານ​ວ່າ ​ມີ​ຜູ້​ເສຍ​ຊີວິດຍ້ອນ​ອຸປະຕິ​ເຫດບົນ​ທ້ອງ​ຖະໜົນສະ​ເລ່ຍ​ແລ້ວ​ປະມານ 17,000 ຄົນ​ໃນ​ແຕ່ລະ​ປີ. ອັດຕາການ​ເສຍ​ຊີວິດ​ສູງ​ສ່ວນ​ໃຫຍ່​ແມ່ນ​ມີ​ສາ​ເຫດ​ມາ​ຈາກ​ຄົນ​ຂັບ​ລົດ ​ທີ່​ບໍ່​ນັບຖື​ກົດ​ຈະລາ​ຈອນ ລົດ​ເກົ່າ​ເກີນ​ໄປ ​ແລ​ະການ​ບໍລິການ​ສຸກ​ເສີນ​ທີ່​ບໍ່​ພຽງພໍ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG