ສະຫະລັດໄດ້ເວົ້າວ່າ ການໂຈມຕີດ້ວຍເຮືອບິນບໍ່ມີຄົນຂັບ ໃສ່ຖານທັບຂອງສະຫະລັດ ໃນພາກຕາເວັນອອກສຽງເໜືອຂອງຈໍແດັນທີ່ໄດ້ສັງຫານທະຫານສະຫະລັດ 3 ຄົນ ແລະເຮັດໃຫ້ບາດເຈັບອີກ 40 ຄົນນັ້ນ ແມ່ນທໍາໂດຍກຸຸ່ມຕໍ່ຕ້ານຂອງພວກອິສລາມອີຣັກ.
ໃນວັນທີ 2 ກຸມພານີ້ຜ່ານມາ, ທ່ານຈອນ ເຄີບີ ຂອງສະພາຄວາມໝັ້ນຄົງແຫ່ງຊາດຂອງສະຫະລັດກ່າວວ່າ ກຸ່ມດັ່ງກ່າວແມ່ນອົງການຈັດຕັ້ງເຄືອຂ່າຍຂອງກອງທະຫານບ້ານ ທີ່ສະໜັບສະໜູນອີຣ່ານ, ໃນນັ້ນລວມມີກຸ່ມກາຕາອິບ ເຮັສໂບລາ.
ອົງການຂ່າວ CBS ລາຍງານໃນວັນທີ 2 ກຸມພາຜ່ານມານີ້ວ່າ ທຳນຽບຂາວໄດ້ອະນຸມັດແຜນການຕອບໂຕ້ຄືນຂອງທຳນຽບຫ້າແຈ ເຊິ່ງລວມມີການໂຈມຕີດ້ວຍລູກສອນໄຟຫຼາຍໆຄັ້ງທີ່ແນເປົ້າໝາຍໃສ່ພະນັກງານ ແລະອາຄານແຫ່ງຕ່າງໆ ຂອງອີຣ່ານໃນອີຣັກ ແລະຊີເຣຍ.
ປະທານາທິບໍດີ ທ່ານໂຈ ໄບເດັນ ກ່າວວ່າ ອີຣ່ານເປັນຜູ້ຮັບຜິດຊອບຕໍ່ການໂຈມຕີ "ໃນຄວາມໝາຍທີ່ວ່າ ພວກເຂົາກຳລັງສະໜອງອາວຸດ ໃຫ້ແກ່ຜູ້ທີ່ທໍາການໂຈມຕີນັ້ນ."
ລັດຖະມົນຕີປ້ອງກັນປະເທດສະຫະລັດ ທ່ານລອຍ ອອສຕິນ ກ່າວໃນກອງປະຊຸມຖະແຫຼງຂ່າວໃນວັນທີ 1 ກຸມພາຜ່ານມານີ້ວ່າ “ການຮູ້ທີ່ຈະແຈ້ງຊັດເຈນກ່ຽວກັບສິ່ງທີ່ອີຣ່ານຮູ້ ຫຼື ບໍ່ຮູ້” ກ່ຽວກັບການໂຈມຕີແມ່ນ “ບໍ່ສໍາຄັນ,” ເພາະສາທາລະນະລັດອິສລາມ “ສະໜັບສະໜູນ, ໃຫ້ເງິນຊ່ວຍເຫລືອ ແລະ ໃນບາງກໍລະນີ, ທໍາການຝຶກໃຊ້ອາວຸດທໍາມະດາທີ່ທັນສະໄໝໃຫ້ແກ່ກຸ່ມເຫຼົ່ານີ້."
ທ່ານອອສຕິນ ກ່າວວ່າ "ພວກເຂົາແມ່ນຕົວແທນຂອງອີຣ່ານ."
ອີຣ່ານໄດ້ປະຕິເສດວ່າ ບໍ່ມີການເຊື່ອມໂຍງເຊັ່ນນັ້ນ, ໂດຍທ່ານອາເມຍ ຊາອີດ ອີຣາວານີ (Amir Saeid Iravani), ເອກອັກຄະລັດຖະທູດອີຣ່ານປະຈຳອົງການສະຫະປະຊາຊາດ ໄດ້ກ່າວອ້າງ ຢູ່ໃນຈົດໝາຍເຖິງສະພາຄວາມໝັ້ນຄົງ ຂອງສະຫະປະຊາຊາດວ່າ:
"ບໍ່ມີກຸ່ມໃດທີ່ກ່ຽວພັນກັບສາທາລະນະລັດອິສລາມ ຫຼືກອງກໍາລັງປະກອບອາວຸດຂອງອີຣ່ານ, ບໍ່ວ່າຈະຢູ່ໃນອີຣັກ, ຊີເຣຍ ຫຼືບ່ອນອື່ນກໍຕາມ ທີ່ດໍາເນີນການໂດຍກົງ ຫຼືທາງອ້ອມພາຍໃຕ້ການຄວບຄຸມຂອງສາທາລະນະລັດອິສລາມຂອງອີຣ່ານ ຫຼືດໍາເນີນການໃນນາມຂອງປະ ເທດນີ້."
ນັ້ນແມ່ນບໍ່ຖືກຕ້ອງ.
ສະຖາບັນ Royal United Services ຊຶ່ງເປັນອົງການຄົ້ນຄວ້າ ດ້ານປ້ອງກັນຊາດ ແລະຄວາມໝັ້ນຄົງຂອງອັງກິດຄາດຄະເນວ່າ ຢ່າງໜ້ອຍມີກອງທະຫານບ້ານ 40 ກຸ່ມທີ່ “ໄດ້ຮັບທຶນ ແລະປະຕິບັດການທີ່ສໍາຄັນຢ່າງໃກ້ຊິດ ໂດຍກອງກຳລັງພິທັກປະຕິວັດອິສລາມທີ່ມີອໍານາດຂອງອີຣ່ານ,” ຕາມການລາຍງານຂອງສຳນັກຂ່າວ CBS News ໃນວັນທີ 1 ກຸມພາຜ່ານມາ.
ໜັງສືພິມຮັກສາຄວາມໝັ້ນຄົງຂອງຊາດວັນນີ້ ຫລື Homeland Security Today ຊຶ່ງເປັນໜັງສືພິມແຫລ່ງນຶ່ງຂອງສະຫະລັດ ທີ່ກ່ຽວພັນກັບແນວໂຮມດ້ານເທັກໂນໂລຈີ ແລະການບໍລິການຂອງລັດຖະບານທີ່ຕັ້ງຢູ່ສະຫະລັດ ຊຶ່ງເປັນກຸ່ມການຄ້າທີ່ບໍ່ຂຶ້ນກັບລັດຖະບານ ໄດ້ລາຍງານກ່ຽວກັບການວິເຄາະໃນວັນທີ 1 ກຸມພາຜ່ານມານີ້ວ່າ ກຸ່ມທະຫານທີ່ຄວບຄຸມໂດຍອີຣ່ານ ເປັນຜູ້ຮັບຜິດຊອບຕໍ່ການໂຈມຕີກໍ່ການຮ້າຍເກືອບ 3,000+ ທີ່ເກີດຂຶ້ນໃນລະຫວ່າງ ປີ 2018 ແລະ 2023 ໃນເຂດຕາເວັນອອກກາງ ແລະແຫຼມ ຮອນ ຂອງທະວີບອາຟຣິກາ.
ສະພາການພົວພັນຕ່າງປະເທດຂອງສະຫະລັດ (CFR) ໄດ້ລາຍງານວ່າ ກອງກຳລັງຄູສ (Quds) ຂອງອີຣ່ານ ຊຶ່ງເປັນສ່ວນນຶ່ງຂອງກອງກຳລັງພິທັກປະຕິວັດອິສລາມ (IRGC) ເປັນຈຸດຕິດຕໍ່ພົວພັນລະຫວ່າງ Tehran ກັບພວກຕົວແທນຂອງຕົນ, ສະໜອງການຝຶກອົບຮົມ, ອາວຸດຍຸດໂທປະກອນ ແລະເງິນທຶນ.
ອີງຕາມການຄົ້ນຄວ້າຮ່ວມກັນໂດຍໜັງສືພິມ Financial Times ແລະສະຖາບັນສໍາລັບການສຶກສາດ້ານຍຸດທະສາດສາກົນ, ຂໍ້ມູນໃນແຜນທີ່ຂອງ CFR ກ່ຽວກັບ 12 ກອງທະຫານບ້ານ ທີ່ສະຫນັບສະຫນູນໂດຍອີຣ່ານທີ່ໂດດເດັ່ນທີ່ສຸດຢູ່ໃນເຂດຕາເວັນອອກກາງ -ທະວີບອາຟຣິກາໃນເດືອນຕຸລາ 2023.
ການຄົ້ນຄວ້າໄດ້ຄາດຄະເນວ່າ ຈຳນວນນັກລົບຂອງກອງທະຫານບ້ານ ປະກອບອາວຸດ 12 ກອງລວມກັນ ມີຢູ່ລະຫວ່າງ 124,000 ຫາ 198,000 ຄົນ. CFR ຢືນຢັນວ່າ 9 ກອງທະຫານໃນຈຳນວນ ທັງໝົດ 12 ກອງ, ແມ່ນມີການຄວບຄຸມຂອງອີຣ່ານ “ຢ່າງແຂງແກ່ນ” ແລະກອງທະຫານສາມກອງທີ່ຍັງເຫຼືອແມ່ນມີການຄວບຄຸມ “ປານກາງ.”
ພວກນັກລົບທີ່ມາຈາກປະເທດທີ່ນັບຖືສາສະໜາອິສລາມ ນິກາຍຊີໄອ ເຊັ່ນອີຣັກ ແລະເລບານອນ ກວມເອົາສ່ວນໃຫຍ່ ໃນກຸ່ມທະຫານພວກນີ້.
ນຶ່ງໃນນັ້ນແມ່ນກຸ່ມເຮສໂບລາ, ພັກການເມືອງຂອງເລບານອນ ແລະກຸ່ມທະຫານບ້ານ ແມ່ນກຸ່ມທີ່ມີຊື່ສຽງ ໃນດ້ານການມີສ່ວນກ່ຽວຂ້ອງກັບການກໍ່ການຮ້າຍ.
ກະຊວງການຕ່າງປະເທດສະຫະລັດຄາດຄະເນວ່າ ກຸ່ມເຮສໂບລາ ໄດ້ຮັບເງິນຈາກອີຣ່ານປະມານ 700 ລ້ານໂດລາຕໍ່ປີ. ເຕຫະຣ່ານ ຍັງໄດ້ສະໜອງເງິນປະມານ 100 ລ້ານໂດລາຕໍ່ປີໃຫ້ແກ່ກຸ່ມປາແລັສໄຕນ໌, ລວມທັງກຸ່ມຮາມາສ ແລະກຸ່ມປາແລສໄຕນ໌ ອິສລາມຈີຮາດ.
ນັບແຕ່ຕົ້ນຊຸມປີ 1990 ເປັນຕົ້ນມາ, ອີຣ່ານ ໂດຍຜ່ານ IRGC, ໄດ້ສະໜັບສະໜູນ ແລະ ຝຶກແອບບັນດາກຸ່ມຫົວຮຸນແຮງ ເຊັ່ນກາຕາອິບ ເຮັສໂບລາຂອງອີຣັກ, ກຸ່ມຫົວຮຸນແຮງຊາຣາຢາ ອາລ ອາສຕາ (Saraya al Ashtar) ຂອງບາຫ໌ເຣນ ແລະ ກຸ່ມຮາມາສ ປາແລສໄຕນ໌.
ໃນລະຫວ່າງປີ 2012 ຫາ 2023, ລະບອບການປົກຄອງຂອງອີຣ່ານ ໄດ້ໃຊ້ເງິນຫຼາຍກວ່າ 16 ຕື້ໂດລາ ສະໜັບສະໜູນລະບອບການປົກຄອງ ຂອງທ່ານບາຊາ ອາລ-ອາຊາດ (Bashar al-Assad) ຢູ່ໃນຊີເຣຍ ແລະກອງທະຫານຕົວແທນໃນຊີເຣຍ, ອີຣັກ ແລະເຢເມນ, ອີງຕາມ ສູນກາງວີລຊັນ (Willson Center), ສະຖາບັນວິໄຈ ທີ່ມີສຳນັກງານຕັ້ງຢູ່ນະຄອນຫລວງວໍຊິງຕັນ ລາຍງານເມື່ອເດືອນກັນຍາທີ່ຜ່ານມາ, ໂດຍອ້າງອີງຂໍ້ມູນຂອງກະຊວງການຕ່າງປະເທດ.
