ການໄຕ່ສວນຄະດີ ຂົ່ມຂືນໝູ່ໃນອິນເດຍ ບໍ່ເປີດໃຫ້ ປະຊາຊົນເຂົ້າຟັງ

07.01.2013

ບັນດາຕໍາຫລວດຜູ້ຍິງ ຢືນຍາມຢູ່ນອກສານ ບ່ອນມີການໄຕ່ສວນ ຜູ້ຊາຍຫ້າຄົນ ທີ່ຖືກກ່າວຫາ ໃນຖານຂົ່ມຂືນໝູ່ ນັກສຶກສາຍິງ ຢ່າງໂຫດຮ້າຍປ່າເຖື່ອນ, ວັນທີ 7 ມັງກອນ 2013, ກ່ອນກໍານົດວັນພິຈາລະນາຄະດີໂຕຈິງ.

ຜູ້ພິພາກສາຍິງໃນເມຶອງຫລວງຂອງອິນເດຍ ທີ່ທໍາການໄຕ່ສວນ
ກ່ຽວກັບ ຄະດີຟ້ອງຮ້ອງຫ້າຄົນໃນຈໍານວນຜູ້ຕ້ອງສົງໄສຫົກຄົນ
ໃນຂໍ້ຫາຂົ່ມຂືນໝູ່ນັກສຶກສາຍິງຄົນນຶ່ງຢ່າງທາລຸນນັ້ນ ໄດ້ໄລ່ຜູ້
ຄົນທີ່ແອອັດແຫຍ້ກັນຢູ່ໃນຫ້ອງສານນັ້ນອອກໄປ ໃນວັນຈັນມື້ນີ້
ແລະກ່າວວ່າ ການດໍາເນີນຄະດີຈະປິດ ຕໍ່ສາທາລະນະຊົນ.

ທ່ານນາງ ໄດ້ປະກາດ ການບໍ່ເປີດໃຫ້ປະຊາຊົນເຂົ້າຟັງການໄຕ່
ສວນ ບໍ່ດົນຫລັງຈາກທີ່ບັນດາຜູ້ຕ້ອງສົງໄສໄດ້ໄປເຖິງສານ ທີ່ຈັດ
ຕັ້ງຂຶ້ນມາເພື່ອດໍາເນີນຄະດີຢ່າງວອງໄວນັ້ນ ໃນຕອນເຊົ້າວັນຈັນ
ມື້ນີ້ ທີ່ກຸງນີວແດນລີ. ທ່ານນາງ ກ່າວວ່າ ສຽງນອງນັນຂອງຜູ້ປະ
ທ້ວງຢູ່ໃນຫ້ອງສານ ໄດ້ຂັດຂວາງບໍ່ໃຫ້ການໄຕ່ສວນດໍາເນີນໄປໄດ້.
ການໄຕ່ສວນແມ່ນເປັນບາດກ້າວດ້ານລະບຽບການ ກ່ອນກໍານົດ
ວັນພິຈາລະນາຄະດີໂຕຈິງ.

ເຈົ້າໜ້າທີ່ອິນເດຍໄດ້ຕັ້ງຂໍ້ຫາຕໍ່ພວກຜູ້ຊາຍເຫລົ່ານັ້ນ ໃນຖານຄາດຕະກໍາ ຂົ່ມຂືນຊໍ່ເລົາ ລັກພາໂຕ ແລະຂໍ້ຫາອື່ນໆອີກ ໃນການໂຈມຕີເມື່ອວັນທີ 16 ເດືອນທັນວາ. ບັນດາເຈົ້າໜ້າທີ່ກ່າວວ່າ ເຂົາເຈົ້າຈະຊຸກຍູ້ໃຫ້ປະຫານຊີວິດ ຖ້າຫາກພວກຜູ້ຊາຍມີຄວາມຜິດ.

ໃນຄວາມພະຍາຍາມເພື່ອໃຫ້ໂທດເບົາບາງລົງ ສອງຄົນໃນຈໍານວນຜູ້ຖືກກ່າວຫາໄດ້ກ່າວຕໍ່ສານວ່າ ເຂົາເຈົ້າຢາກເປັນພິຍານແກ່ໄອຍະການ.

ຜູ້ຕ້ອງຫາຄົນທີ່ຫົກ ຊຶ່ງມີອາຍຸບໍ່ຮອດ 18 ປີ ຈະຖືກດໍາເນີນຄະດີ ຕ່າງຫາກ ຢູ່ທີ່ສານເຍົາ
ວະຊົນ.