ລິ້ງ ສຳຫລັບເຂົ້າຫາ

ຊາວເຜົ່າມົ້ງ ໃຊ້ລະບົບ teleconferencing ເຜີຍແຜ່ຂ່າວ ແລະສົ່ງຂ່າວ ເຖິງກັນແລະກັນ

  • ທອງປານ ເທບວົງສາ

ນາງ Cher Vang ຊາວເຜົ່າມົ້ງ ທີ່ດໍາລົງຊີວິດຢູ່ໃນລັດວໍຊິງຕັນ ເປັນຜູ້ນຶ່ງທີ່ປະກອບສ່ວນໃນລະບົບ teleconference ຜ່ານສະຖານີວິທະຍຸລ່ອງແຈ້ງ ເພື່ອເຊື່ອມໂຍງກັບຊາວມົ້ງຈາກແຫ່ງອື່ນໆ.

ທ່ານຈະ​ໂອ້​ລົມ​ກັບ​ສະມາຊິກ​ຂອງ​ປະຊາ​ຄົມ​ຂອງ​ພວກທ່ານໄດ້​ແນວ​ໃດ ​ຖ້າຫາກ​ວ່າ​ພວກທ່ານ​ຢູ່​​ໄກ​ກັນຄົນ​ລະ​ຟາກ​ໂລກ? ຫລາຍໆ​ຄົນ​ກາງ​ຕໍ່​ອາ​ໃສ​ການ​ສື່ສານ​ທາງ​ອິນ​ເທີ​ເນັທ​ຂ້າມ​ເຂດ​ຊາຍ​ແດນ ​ແລະ​ກໍ​​​​ໃຊ້​ອີ​ເມລ ​ແລະ​ twitter ​ແລະສົ່ງ​ຂໍ້ຄວາມ​ໄປທາງໂທລະສັບ. ​ແຕ່​ສໍາລັບ​ຊາວ​ມົ້ງ​ຫລາຍໆ​ຄົນ​ ທີ່ຢູ່​ຫ່າງ​ໄກ​ຈາກ​ບ້ານ​ເກີດ​ເມືອງ​ນອນ​ຂອງ​ພວກ​ເຂົາ​ເຈົ້າ​ ໃນຂົງ​ເຂດ​ເອ​ເຊຍ​ນັ້ນ - ລະບົບສື່ສານ​ທາງ​ໄກຜ່ານ​ທາງວິທະຍຸ ຫລື teleconferencing ​ແມ່ນ​ເປັນວິທີ​ທີ່ພວກ​ເຂົາ​ເຈົ້າ​ນິຍົມ​ໃຊ້ກັນໃນ​ການ​ແບ່ງປັນ​ຂໍ້​ມູນ​ແລະ​ຂ່າວສານຕ່າງໆ. ທອງ​ປານ​ມີເລຶ່ອງນີ້ ມາສະ​ເໜີ​ທ່ານ.

ຢູ່​ໃນ​ທົ່ວ​ໂລກໃນແຕ່​ລະ​ມື້ ຊາວ​ເອ​ເຊຍ​ຕາ​ເວັນ​ອອກສຽງ​ໃຕ້​ຫລາຍພັນ​ຄົນ​ ຈັບ​ໂທລະສັບ
​ຂອງ​ພວກ​ເຂົາ​ເຈົ້າຂຶ້ນ​ມາ​ ເພື່ອ​ຈະ​ຟັງ​ວິທະຍຸ. ພວກ​ເຂົາ​ເຈົ້າຈະເປີດຟັງສະຖານີ​ນຶ່ງໃນຈໍາ
ນວນຢ່າງ​ໜ້ອຍ 20 ສະຖານີ ທີ່​ອອກ​ອາກາດ​ຄື​ກັນກັບ​ສະຖານີ​ວິ​ທະ​ຍຸ​ທໍາ​ມະ​ດາໆ ​ແຕ່
​ແທນ​ທີ່​ຈະ​ໝຸນ​ຫາຄື້ນ​ວິທະຍຸ ​ເຂົາ​ເຈົ້າ​ກັບ​ໝຸນເລກ​ໂທລະ​ສັບໄປຍັງ​ສະຖານີ​ແຫ່ງ​ນຶ່ງ.

//ສຽງ//

ແມ່ຍິງ​ຄົນ​ນຶ່ງ​ຢູ່​ລັດ​ແຄ​ລິ​ຟໍ​ເນຍກໍາລັງ​ຮ້ອງ​ເພງ​ໃຫ້​ຫລາຍ​ຮ້ອຍ​ຄົນ​ຟັງ​ຜ່ານ ລະບົບທີ່​ເອີ້ນ​ວ່າ teleconference ຜ່ານ​ທາງ​ວິທະຍຸ​ນີ້. ​ເພງ​ທີ່​ນາງ​ຮ້ອງ ຊຸກຍູ້​ໃຫ້​ພວກ​ເຍົາວະ​ຊົນ​ ພາກັນ ຮັກສາ​ປະ​ເພນີ​ວັທະນະ​ທໍາ​ຂອງ​ຊາວ​ມົ້ງ​ ໃຫ້​ຄົງຢູ່​ຕະຫລອດ​ໄປ. ນາງ ເຊີ​ວາງ ນັ່ງຟັງ​ເພງ​ຢູ່​ຫ້ອງ​ຮັບ​ແຂກ​ທີ່​ບ້ານ​ຂອງ​ນາງ​ໃນ​ລັດ​ວໍ​ຊິງ​ຕັນ. ນາງ​ມີ​ອາຍຸໃນໄວກາງຄົນ ​ແລະ​ກໍ​ດັ່ງ​ດຽວ​ກັບ​ຊາວ​ເຜົ່າ​ມົ້ງຫລາຍໆ​ຄົນ​ນັ້ນ ສົງຄາມ​ໄດ້​ແຕກແຍກ​ຄອບຄົວ​ຂອງ​ນາງ​ ໄປ​ຢູ່​ທົ່ວ​ໂລກ.

ນາງ​ເວົ້າ​ວ່າ: “ຄອບຄົວ​ຂອງ​ຂ້ອຍແມ່ນ​ໄດ້​ແຍກ​ກັນ​ໄປ​ຢູ່ທົ່ວ​ທຸກ​ຫົນ​ແຫ່ງ​ໃນ​ໂລກ. ຂ້ອຍ​ມີ​ອ້າຍ​ແລະ​ນ້ອງ​ຊາຍສາມ​ຄົນ ພວກ​ເຂົາ​ເຈົ້າອາ​ໃສ​ຢູ່​ອອສ​ເຕຣ​ເລຍ. ຂ້ອຍ​ບໍ່​ໄດ້​ເຫັນພວກເຂົາ​ເຈົ້າ​ມາເປັນ​ເວລາ 30 ປີ​ແລ້ວ. ເອື້​ອຍ ຂອງ​ຂ້ອຍ​ອາ​ໃສ​ຢູ່​ແຄ​ລິ​ຟໍ​ເນຍ ​ແລະ​ນ້ອງ​ສາວ​ຜູ້​ນຶ່ງ ຢູ່​ລາວ ປະ​ເທດ​ຂອງ​ຂ້ອຍ.”

ເວລານາງ ​ເຊີ​ວາງ ມາ​ຕົກ​ອາ​ເມ​ຣິກາ​ໃໝ່​ໆ​ນັ້ນ ນາງ​ຮູ້ສຶກຫງອຍ​ເຫງົາ​ໂດດດ່ຽວ​ ໄດ້​ງ່າຍ​ຫລາຍ.

ນາງ​ເຊີ​ວາງ​ເວົ້າວ່າ: “ຂ້ອຍ​ມາ​ອາ​ເມຣິກາ ​ແລະ​ກໍ​ໄດ້​ແຕ່ງ​ງານ​ກັບ​ຜົວ​ຂອງ​ຂ້ອຍໃນ​ປີ 1986 ​ເວລາ​ນັ້ນ​ ຂ້ອຍ​ຍັງ​ປາກ​ເວົ້າພາສາ​ອັງກິດ​ບໍ່​ໄດ້. ຂ້ອຍ​ບໍ່​ຮູ້ຂັບ​ລົດ. ມັນ​ຍາກ
ຍາກ​ລໍາບາກ​ ສໍາລັບ​ຂ້ອຍ​ຫລາຍ.”

ນັ້ນ​ຫລ່ະຄື​ເຫດຜົນ​ນຶ່ງ​ທີ່​ ລະບົບ​ສື່ສານ​ທາງ​ໄກ ຫລື teleconference ​ຜ່ານ​ທາງ​ວິທະຍຸ ເຂົ້າມາ​ມີ​ບົດບາດ. ​ນຶ່ງ​ໃນ​ຫລາຍໆວັດ​ຖຸປະສົງ​ນັ້ນ​ກໍ​ຄື ​ເພື່ອ​ເຊື່ອມ​ໂຍງພວກ​ຊາວ​ເຜົ່າ​ມົ້ງທີ່​ງ່ວມ​ເຫງົາ​ໂດດດ່ຽວ ​ໂດຍ​ສະ​ເພາະ​ຄົນ​ຄື​ ນາງ ​ເຊີ​ ວາງ ຜູ້​ທີ​ບໍ່​ເຄີຍ​ໄດ້​ເຂົ້າ​ໂຮງຮຽນ ຫລື​ຮຽນ​ໃຊ້​ຄອມ​ພິວ​ເຕີ​ເລີຍ​ນັ້ນ. ລັດ​ວໍ​ຊິງ​ຕັນ ມີ​ປະຊາ​ຄົມ​ຊາວ​ເຜົ່າ​ມົ້ງທີ່ນ້ອຍໆ​ ​ແຕ່​ບາດ​ເວລາ​ນາງ ​ເຊີ ວາງ ໂທລະສັບ​ເຂົ້າໄປ​ຫາ​ສະຖານີ​ນຶ່ງ​ຂອງລະບົບ teleconference ນາງກໍ ສາມາດຕິດ​ຕໍ່​ເຊື່ອມ​ໂຍງ​ເຂົ້າກັບ​ຊາວ​ມົ້ງ​ກຸ່ມ​ໃຫຍ່​ກວ່າຫລາຍ​.

//ສຽງ//

ນາຍ ​ເຊັງ​ຢາງ ​ເປັນ​ຜູ້ນຶ່ງ​ໃນ​ພວກ​ທີ່​ກໍ່​ຕັ້ງລະບົບ​ສື່ສານ teleconference ຜ່ານທາງ​ວິທະຍຸ ສໍາລັບ​ຊາວ​ມົ້ງຂຶ້ນ​ມາ ທີ່​ມີ​ຊື່ວ່າ ສະຖານີວິທະ​ຍຸລ່ອງ ແຈ້ງ.

ນາຍ ​ເຊັງ ຢາງ ອະທິ​ບາຍ​ໃຫ້​ຟັງ​ວ່າ ສະຖານີ​ວິທະຍຸ​ດັ່ງກ່າວ​ນັ້ນ​ເປີດບໍລິການ 24 ​ຊົ່ວ​ໂມງ ຊຶ່ງມີ​ລາຍການຕ່າງໆ​ຫລາຍ​ຢ່າງ ​ເຊັ່ນ ​ເພງ ນິທານ​ເລຶ່ອງຜີ ​ຂ່າວເສດຖະກິດ ​ແລະ​ເລື້ອງ​ອື່ນໆອີກ​. ນາຍເຊັງ ຢາງ ປະ​ເມີນ​ວ່າ ມີ​ຄົນ​ປະມານ 3500 ​ຄົນ ​ໝຸນ​ໂທລະສັບ​ເຂົ້າມາ​ເພື່ອ​ຮັບ​ຟັງ​ ວິທະຍຸ​ລ່ອງ​ແຈ້ງ​ນີ້ ແທບ​ທຸກ​ມື້.

ລາຍການ​ນຶ່ງ​ທີ່​ປາກົດ​ວ່າ ​ເປັນ​ລາຍ​ການ​ທີ່​ຄົນ​ຟັງນິຍົມ​ຫລາຍ​ທີ່​ສຸດ​ນັ້ນ ກໍ​ຄື ລາຍການ​ຂ່າວ​ຕອນ​ແລງ. ນີ້​ຄື​ຂ່າວ​ຕອນ​ແລງ​ມື້​ນຶ່ງ ກ່ຽວ​ກັບ​ຍານ​ອາ​ວະ​ກາດ​ໄປ​ກັບ​ຂອງ​ສະຫະລັດ

//ສຽງ//

ພວກ​ຈັດ​ລາຍ​ການ ​ແປຂ່າວ​ຮອບ​ໂລກ ​ເປັນ​ພາສາ​ມົ້ງ ພາສາຢ້າວ ​ແລະ ລາວ.

ແຕ່ນອກ​ນີ້​ແລ້ວ ລະບົບສື່ສານ teleconference ກໍ​ຍັງ​ເປັນເວທີໂລກ ສໍາ​ລັບໃຫ້ຊາວ​ເຜົ່າ​ມົ້ງຢູ່​ໃນ​ທົ່ວ​ໂລກ​ ​ໄດ້ແລກປ່ຽນ​ຂ່າວໃນທ້ອງ​ຖິ່ນ​ຂອງ​ພວກ​ເຂົາ​ເຈົ້າ ສູ່​ກັນຟັງ. ນາຍ ຢາງ ກ່າວ​ຕໍ່​ໄປ​ວ່າ ຜູ້​ຟັງ​ສາມາດ​ໂທລະ ສັບເຂົ້າມາລາ​ຍງານ​ເຫດການ​ສໍາຄັນໆ ​ເຊັ່ນ​ການ​ຕາຍ ຂອງ​ຜູ້​ນໍາ​ປະຊາ​ຄົມ ຄົນ​ນຶ່ງ ເປັນ​ຕົ້ນ.

ນາຍ ເຊັງ ຢາງ ເວົ້າວ່າ “ຖ້າ​ຫາກ​ວ່າ​ມີ​ເລຶ່ອງຫຍັງສໍາຄັນ​ເກີດ​ຂຶ້ນ​..ເນາະ ຕົວຢ່າງ ມີຜູ້​ເຖົ້າຄົນສໍາ ຄັນຂອງ​ປະຊາ​ຄົມ​ເຜົ່າ​ມົ້ງ ​ເຖິງ​ແກ່ມໍລະນະ​ກໍາ​ໄປ ​ໃນ​ເມືອງ Salt Lake ​ລັດ​ຢູທາ ກໍ​ຄົງບໍ່​ມີ​ໃຜ​ຮູ້ຈັກ ແມ່ນ​ບໍ່? ດັ່ງ​ນັ້ນ​ພວກ​ເຮົາ​ຈຶ່ງ​ເປີດ​ໃຫ້​ພວກ​ເຂົາ​ເຈົ້າ ​ໂທ​ເຂົ້າ​ມາບອກ​ເລຶ່ອງຕ່າງໆ ​ສູ່​ພວກ​ເຮົາ​ຟັງ​ໄດ້.”

ສະຖານີວິທະຍຸ​ລ່ອງ​ແຈ້ງ ຕັ້ງ​ຢູ່​ລັດ​ມິ​ເນ​ໂຊ​ຕ້າ ​ແຕ່ລາຍ​ການ​ຕ່າງໆ​ທີ່ອອກ​ ອາກາດ​ກໍ​ມີ ​ໂຮມ​ທັງລາຍ​ການຈາກ​ປະຊາ​ຄົມ​ໃນ​ພາກ​ພື້ນຢຸໂຣບ ​ເອ​ເຊຍ​ຕາ​ເວັນ​ອອກສຽງ​ໃຕ້ ພ້ອມ​ກັບ​ຂ່າວທີ່ຖື​ວ່າ​ ສໍາຄັນ​ຕໍ່​ພວກ​ເຂົາ​ເຈົ້າ.

ນາຍ ເຊັງ ຢາງ ​ເວົ້າວ່າ “ພວກ​ເຂົາ​ເຈົ້າມີ​ເວລາ​ສະ​ເໜີ​ຂ່າວ​ປະມານ​ເຄິ່ງຊົ່ວ​ໂມງ ​ເວົ້າ​ເຖິງ​ຄວາມ​ເປັນ​ໄປ​ຢູ່​ທີ່​ນັ້ນ ​ເຊັ່ນເລຶ່ອງການ​ປູກ​ພືດ​ຜັກ ​ເຂົ້າສາລີ ​ແລະ ຂ່າວ​ອາກາດ ດັ່ງ​ນີ້​ເປັນ​ຕົ້ນ.”

//ສຽງ//

ໃນ​ມື້​ນີ້ ນາງ ​ເຊີ ວາງ ກໍ​ເຂົ້າປະກອບສ່ວນ​ໃນ​ລາຍການ​ຂອງ​ວິທະຍຸ​ teleconference ນີ້ນໍາ ຄື​ນາງ​ຮ້ອງ​ເພງ​ຮັກພື້ນ​ເມືອງ​ຂອງຊາວເຜົ່າ​ມົ້ງ ​ໃຫ້​ເພື່ອນ​ຮ່ວມ​ລາຍການ​ຟັງ.

//ສຽງຮ້ອງເພງ//

ນາງ ເຊີ ວາງ ​ເວົ້າວ່າ ການແບ່ງປັນ​ຫລື​ການ​ໄດ້ໂອ້​ລົມ​ກັບ​ພວກ​ອື່ນ​ທາງ​ໂທລະ​ສັບ​ນັ້ນ ​ແມ່ນ​ຊ່ວຍ​ໃຫ້​ນາງ​ໄດ້​ເຊື່ອມ​ໂຍງ​ຕິດ​ຕໍ່​ກັບ​ພວກ​ຄົນ​ທີ່​ເຄີຍ​ມີ​ປະສົບ​ການ​ແບບ​ດຽວ​ກັບ​ນາງ ​ເຊັ່ນ ການ​ສູນ​ເສຍ​ພວກພີ່ນ້ອງ​ໃນ​ສົງຄາມ ​ແລະ​ການ​ໄປ​ຕັ້ງ​ຊີວິດ​ໃໝ່​ໃນ​ຕ່າງ​ແດນ ​ເປັນ​ຕົ້ນ.

ນາງ ​ເຊີ ວາງ ​ເວົ້າວ່າ “ສໍາລັບ​ຕົວ​ຂ້ອຍ​ແລ້ວ ທໍາອິດໆນັ້ນ ຂ້ອຍ​ຮູ້ສຶກ​ໂມ​ໂຫຫລາຍ ຂ້ອຍ​ຮູ້ສຶກ​ເບື່ອ​ໜ່າຍ​ຂ້ອຍເອງຫລາຍ ບາງ​ຄັ້ງ​ຂ້ອຍ​ກໍ​ຄິດ​ໄປ​ໂລໆ​ເລໆ ຄິດ​ເຖິງ​ທຸກ​ສິ່ງ​ທຸກ​ຢ່າງ​ຫລາຍ​ເກີນ​ໄປ ທີ່​ຈື່​ໄດ້. ຂ້ອຍ​ຄິດ​ ຄິດ ​ຄິດ​ວ່າ ອາດ​ມີ​ແຕ່​ຂ້ອຍ​ຄົນ​ດຽວ​ໃນ​ໂລກ​ນີ້ ທີ່​ມີ​ບັນຫາ​ແບບ​ນີ້ ອາດ​ບໍ່​ມີ​ໃຜ​ຄື​ຂ້ອຍ ບໍ່​ມີ​ໃຜ​ມີ​ຊີວິດ​ຄື​ຂ້ອຍ.”

ແຕ່​ເມື່ອຮູ້ສຶກ​ວ່າ ທຸກໆ​ຄົນ​ທີ່​ໄດ້​ຟັງ​ລາຍ​ກາ​ນວິທະຍຸ​ລ່ອງ​ແຈ້ງທາງ​ໂທລະສັບ​ ພາກັນ​ເຂົ້າ​ໃຈ​ໃນ​ຊີວິດ​ຂອງ​ນາງ ​ນາງ ​ເຊີ ວາງ ກໍກ່າວ​ວ່າ ນາງ​ຮູ້ສຶກ​ດີ​ຫລາຍ​ຂຶ້ນ ​ແລະ​ເຮັດ​ໃຫ້​ລາວ​ມີ​ຄວາມສຸກ​ໃຈ.

………//ສຽງຮ້ອງເພງ//

XS
SM
MD
LG