ກອງທັບອິສຣາແອລໄດ້ປິດລ້ອມເມືອງ Rafah ທາງພາກໃຕ້
ຂອງເຂດອາຊາ ໃນຂະນະທີ່ທະຫານອິສຣາແອລຊອກຫາ
ນາຍທະຫານຄົນນຶຶ່ງທີ່ເຂົາເຈົ້າເຊື່ອວ່າ ໄດ້ຖືກພວກຮາມັສ
ຈັບໄປ ໃນການດັກໂຈມຕີ.
ໃນວັນເສົາມື້ນີ້ເຊັ່ນກັນ ບັນດາເຈົ້າໜ້າທີ່ປາແລສໄຕນ໌ ກ່າວ
ວ່າ 34 ຄົນໄດ້ເສຍຊີວິດ ໃນການໂຈມຕີທາງອາກາດ ຢູ່ໃນ
ແລະອ້ອມແອ້ມເມືອງ Rafah ໃນວັນເສົາມື້ນີ້ ຫລັງຈາກທີ່
ຫລາຍສິບຄົນໄດ້ເສຍຊີວິດໄປ ໃນວັນສຸກວານນີ້.
ໃນຂະນະທີ່ອິສຣາແອລຊອກຫາທະຫານຂອງຕົນຢູ່ນັ້ນ ກຸ່ມ Hamas ກ່າວວ່າ ຕົນບໍ່ຮູ້ວ່າ ທະຫານອິສຣາແອລ ຍົດຮ້ອຍໂທຄົນນັ້ນ ຢູ່ໃສ ແຕ່ສັນນິຖານວ່າ ຜູ້ກ່ຽວອາດໄດ້ເສຍຊີວິດໄປແລ້ວ ໃນການໂຈມຕີຂອງອິສຣາແອລເອງ ທີ່ມີຂຶ້ນບໍ່ດົນຫລັງຈາກ ການຢຸດຍິງທີ່ໄກ່ເກ່ຍ
ໂດຍນາໆຊາດ ໄດ້ມີຜົນບັງຄັບໃຊ້.
ກຸ່ມຮາມັສກ່າວໃນວັນເສົາມື້ນີ້ວ່າ ຕົນໄດ້ຂາດການຕິດຕໍ່ກັບພວກນັກລົບຂອງຕົນ ຢູ່ພາກໃຕ້ຂອງເຂດກາຊາ ບ່ອນທີ່ອິສຣາແອລກ່າວວ່າ ທະຫານຂອງຕົນໄດ້ຖືກລັກພາໂຕໄປ. ກຸ່ມ Hamas ເວົ້າວ່າ ຕົນເຊື່ອວ່າ ສະມາຊິກຂອງຕົນ ຢູ່ທາງພາກໃຕ້ຂອງເຂດກາຊາ ໄດ້ເສຍຊີວິດໄປໝົດ ພ້ອມດ້ວຍທະຫານອິສຣາແອລ ໃນການໂຕມຕີຂອງອິສຣາແອລ.
ວີດີໂອ: ຊາວກາຊາສວຍໂອກາດ ອອກໄປພັກຜ່ອນ ເວລາມີການຢຸດຍິງຊົ່ວຄາວ:
ປະທານາທິບໍດີສະຫະລັດ ທ່ານ Barrack Obama ໄດ້ຮຽກຮ້ອງໄປຍັງກຸ່ມ Hamas ໃຫ້ປ່ອຍໂຕທະຫານອິສຣາແອບ ໂດຍທັນທີ ແລະກໍບໍ່ມີເງື່ອນໄຂໃດໆ ເພື່ອສະແດງວ່າ ກຸ່ມ Hamas ຈິງໃຈກ່ຽວກັບຄວາມພະຍາຍາມທີ່ຈະແກ້ໄຂສະຖານະການໃນເຂດກາຊານັ້ນ.
ຢູ່່ທີ່ກອງປະຊຸມຖະແຫລງຂ່າວ ໃນວັນສຸກວານນີ້ ທ່ານ Obama ກ່າວຊໍ້າແລ້ວຊຳ້ອີກວ່າ ອິດຣາແອລ ມີສິດປ້ອງກັນຕົນເອງຈາກລູກຈະຫລວດ ແລະການໂຈມຕີຂອງກຸ່ມ Hamas. ແຕ່ ທ່ານໄດ້ຮ້ອງການເສຍຊີວິດຂອງພົນລະເຮືອນປາແລສໄຕນ໌ ນັ້ນວ່າ ພາໃຫ້ຫົວໃຈແຕກທະລາຍ ແລະກ່າວວ່າ ຕ້ອງທຳທຸກວິທີທາງເພື່ອປ້ອງກັນເຂົາເຈົ້າ.
ພາບຈາກເຂດ ກາຊາ, ວັນທີ 1 ສິງຫາ 2014
ໃຂຕອນແລງວັນສຸກວານນີ້ ລັດຖະສະພາສະຫະລັດ ໄດ້ຮັບຜ່ານທຶນຊ່ວຍເຫລືອສຸກເສີນ 225 ລ້ານໂດລ່າ ແກ່ໂຄງການປ້ອງກັນລະບົບລູກສອນໄຟ Iron Dome ຂອງ ອິສຣາແອລ ແລະໄດ້ສົ່ງມາດຕະການໄປໃຫ້ປະທານາ ທິບໍດີ Barack Obama ເຊັນເປັນກົດໝາຍ. ສະພາຕໍ່າກໍໄດ້ລົງມະຕິຮັບຮອງເອົາ 395 ຕໍ່ 8 ສຽງຄັດຄ້ານ.
ໃນຕອນເຊົ້າວັນເສົາມື້ນີ້ ເວັບໄຊ້ແຫ່ງນຶ່ງຂອງ ອິສຣາແອລ ເວົ້າວ່າ ລະບົບ Iron Dome ໄດ້ສະກັດກັ້ນລູກຈະຫລວດຫລາຍລູກ ບໍ່ດົນຫລັງຈາກກຸ່ມ Hamas ກ່າວວ່າ ຕົນໄດ້ຍິງ
ຈະຫລວດສາມລູກເຂົ້າໃສ່ ນະຄອນ Tel Aviv.
