ຊາວກຣີສ ນັດຢຸດງານ ປະທ້ວງແຜນການຕັດ ຈໍານວນພະນັກງານລັດ ລົງ (ສະໄລດ໌/ວີດິໂອ)

ພວກ​ພະນັກງານລັດຖະບານ ທົ່ວປະເທດກຣີສ ທີ່ມີໜີ້ສິນ
ຫຍຸ້ງເຫຍີ້ງນັ້ນ ​ໄດ້​ພາກັນນັດ​ຢຸດງານ ນຶ່ງມື້ ໃນວັນອັງຄານມື້ນີ້
ເພື່ອປະທ້ວງຕໍ່ແຜນການຂອງລັດຖະບານ ທີ່ຈະໄລ່ພະນັກງານ
ພົນລະເຮືອນ ຫຼາຍພັນຄົນອອກນັ້ນ.

ການປະທ້ວງຂອງວັນອັງຄານມື້ນີ້ ໄດ້ສົ່ງ​ຜົນໃຫ້ການບໍລິການ
ສາທາລະນະຕ່າງໆ ຢຸດ​ສະ​ງັກລົງ ແລະການບໍລິການຢູ່​ໂຮງໝໍ
ຊັກຊ້າລົງ. ຕາຕະລາງລົດໄຟແລະຖ້ຽວບິນ ກໍໄດ້ຖືກ ກະທົບ
ເຊັ່ນກັນ.

ລັດຖະບານ Athens ຈະຕ້ອງໄດ້ປະຕິຮູບ ແລະຕັດຈໍານວນພະນັກງານຂອງ​ຕົນລົງ ​ເພື່ອທີ່ຈະໄດ້ຮັບ​ເງິນ​ຊ່ວຍ​ເຫຼືອ​ ເພື່ອ​ກອບ​ກູ້​ເສດຖະກິດຕື່ມ​ອີກ ຈາກພວກຕ່າງປະເທດ
​ທີ່ໃຫ້​ເງິນ​ກູ້​ຢືມ ແຕ່ວ່າແຜນການຕັດໜ້າວຽກລົງຊຸດ​ຫລ້າ​ສຸດ​ນີ້ ໄດ້ຈຸດຂະນວນຄວາມ
​ໂມ​ໂຫ​ໂທ​ໂສຂອງຊາວກຣີສ.


ຜູ້​ປະ​ທ້ວງ​ຊາວເອເຕ໊ນຄົນນຶ່ງ ກ່າວ​ວ່າ:

“ຂ້ອຍເຂົ້າ​ໃຈ​ດີວ່າ ການ​ນັດ​ຢຸດ​ງານປະ​ທ້ວງ​ນີ້​ສ້າງ​ຄວາມ​ເສຍ​ຫາຍ, ​ແຕ່ເວົ້າ​
ໃນອີກ​ດ້ານ​ນຶ່ງ​ແລ້ວ ​ໃນ​ເມື່ອ​ວ່າມັນບໍ່​ມີ​ການ​ສົນທະນາບໍ່​ມີ​ການເຈລະຈາ​ກັນ​ ​
ແລະ ລັດຖະມົນຕີ ກໍຕັດສິນ​ໃຈ​ຢ່າງ​ກະທັນຫັນ​ຂຶ້ນ​ມາ​ ແລະ​ຕັດສິນ​ໃຈເອົາ​ເອງ
ແລະ​ສັ່ງ​ການແບບນັ້ນ ​ກໍເປັນ​ຂອງ​ທໍາ​ມະ​ດາ ທີ່​ຈະ​ຕ້ອງ​ມີ​ການ​ຢຸດ​ງານປະ​ທ້ວງ.
ວິທີ​ຂອງ​ເຂົາ​ເຈົ້າ​ບໍ່​ແມ່ນ​ວິທີ​ການ​ທີ່​ຈະ​ປະຕິ​ຮູບ. ມັນຕ້ອງ​ມີ​ການວາງ​ແຜນ ມີ​
ການອອກ​ແບບ​ ແລະມີ​ການ​ເກ້ຍກ່ອມ​ໃຫ້ເຊື່ອ​ຖື.”