ນາຍົກລັດຖະມົນຕີ ນິຍົມຝ່າຍຊ້າຍຂອງ ກຣິສ ທ່ານ Alexis Tsipras ໄດ້ຮັບໄຊຊະນະໃນການເລືອກຕັ້ງແຫ່ງຊາດທີ່ຈັດຂຶ້ນໃນວັນອາທິດວານນີ້, ກ່າວວ່າທ່ານຈະເລັ່ງຕັ້ງລັດຖະບານຮ່ວມເພື່ອປະຕິບັດມາດຕະການປະຢັດມັດຖະຍັດ ທີ່ໄດ້ຖືກຮຽກຮ້ອງໂດຍຜູ້ໃຫ້ກູ້ຢືມເງິນ ຢູໂຣບ ໃນການແລກປ່ຽນກັບການຊ່ວຍກອບກູ້ເສດຖະກິດຫຼາຍຕື້ໂດລານັ້ນ.
ທ່ານ Tsipras ໄດ້ກ່າວຕໍ່ກຸ່ມຄົນທີ່ຮ້ອງເຊຍທ່ານ ໃນກາງນະຄອນຫຼວງ Athen ຕອນແລງຂອງວັນອາທິດວານນີ້, ພຽງໜຶ່ງຊົ່ວໂມງຫຼັງຈາກບັນດາຜູ້ລົງຄະແນນສຽງໄດ້ປະຕິເສດການສະເໜີຊື່ໂດຍພັກອະນຸລັກນິຍົມເພື່ອເຂົ້າຄວບຄຸມລັດຖະບານໃນນະຄອນຫຼວງ Athens. ທ່ານໄດ້ກ່າວວ່າ ທ່ານຮູ້ສຶກວ່າເປັນການ “ພິສູດໃຫ້ເຫັນວ່າຖືກ ຕ້ອງ,” ແລະ ກ່າວເພີ່ມເຕີມວ່າ ພັກ Syriza ຂອງທ່ານຈະ “ທຳຕາມການຮຽກຮ້ອງ ຂອງບັນດາຜູ້ມີ ສິດອອກສຽງ” ເພື່ອສ້າງເສດຖະກິດຂອງ ກຣິສ ຄືນ ແລະ “ຍົກ ສູງຄວາມພູມໃຈ ຂອງປະເທດເຮົາ.”
ກ່ອນໜ້ານີ້, ຫົວໜ້າຂູ່ແຂ່ງຂອງທ່ານ Tsipras, ຜູ້ນຳພັກອະນຸລັກນິຍົມປະຊາທິປະໄຕໃໝ່ ທ່ານ Vangelis Meimarakis, ໄດ້ສະແດງຄວາມຍິນດີຕໍ່ຜູ້ໄດ້ຮັບໄຊຊະນະ ແລະ ໄດ້ຮຽກ ຮ້ອງໃຫ້ມີການສ້າງຕັ້ງລັດຖະບານໃໝ່ໃຫ້ໄວ ເຊິ່ງທ່ານ Tsipras ໄດ້ກ່າວວ່າ ຈະລວມເອົາ ພັກຊາດນິຍົມເອກະລາດ ກຣິສ ເຊິ່ງຜູ້ນຳຂອງພັກໄດ້ກ່າວວ່າ ພວກເຂົາເຈົ້າຈະເຂົ້າຮ່ວມ ໃນການ ເປັນພັນທະມິດກັນ.
ດ້ວຍ 66 ເປີເຊັນຂອງການລົງຄະແນນສຽງ ທີ່ໄດ້ນັບໃນຕອນແລງ ຂອງວັນອາທິດວານນີ້, ພັກ Syriza ໄດ້ຮັບ 35.4 ເປີເຊັນຂອງການ ລົງຄະແນນສຽງ ແລະ ໄດ້ຮັບ 144 ບ່ອນນັ່ງ ໃນສະພາ 300 ຕຳແໜ່ງ. ພັກປະຊາທິປະໄຕໃໝ່ໄດ້ເປັນອັນດັບທີ 2 ມີ 28.3 ເປີເຊັນ, ແລະ ຕາມມາດ້ວຍພັກທີ່ມີແຮງບັນດານໃຈ ຈາກລັດທິຊາດ ນິຍົມ Nazi ພັກ Golden Dawn ດ້ວຍຄະແນນ 7 ເປີເຊັນ.
