ທີມ Golden State Warriors ຈາກເມືອງ Oakland ເອົາ
ຊະນະເຈົ້າພາບ ທີມ Cavaliers ຂອງເມືອງ Cleveland ດ້ວຍ
ຄະແນນ 105 ຕໍ່ 97 ໃນການແຂ່ງຂັນວັນອັງຄານວານນີ້ ເພື່ອ
ຄວ້າເອົາແຊ້ມສະມາຄົມກິລາບານບ້ວງ ແຫ່ງຊາດສະຫະລັດ ຫຼື
NBA ປະຈຳປີ 2014-2015 ມາຄອງ.
ທ້າວ Stephen Curry ນັກກິລາບານບ້ວງດີເດັ່ນສຸດ ປະຈຳ
ລະດູການແຂ່ງຂັນຕາມປົກກະຕິຂອງ NBA ແລະ ທ້າວ Andre
Iguodala ຈາກທີມ Warriors ເຮັດໄດ້ຜູ້ລະ 25 ຄະແນນ ເພື່ອ
ຊ່ອຍໃຫ້ທີມດັ່ງ ກ່າວ ຊະນະ 4 ຕໍ່ 2 ເກມ ຂອງການແຂ່ງຂັນທັງ
ໝົດ 7 ເກມ ໃນ ການຄວ້າເອົາ ແຊ້ມບານບ້ວງມາຄອງ ເປັນຄັ້ງ
ທຳອິດ ນັບຕັ້ງແຕ່ປີ 1975 ເປັນຕົ້ນມາ. ທ້າວ Iguodala ຜູ້ທີ່ໄດ້ເປັນໂຕສຳລອງມາຕະ
ຫລອດລະດູການແຂ່ງຂັນຈົນມາຮອດເກມທີ 4 ຈຶ່ງໄດ້ລົງຫຼິ້ນເວລາທີມ Golden State
ຍັງເປັນຮອງ 2 ຕໍ່ 1 ເກມ ແລະ ໄດ້ຖືກລະບຸຊື່ ໃຫ້ເປັນນັກກິລາດີເດັ່ນສຸດ ຫຼື MVP ໃນ
ການແຂ່ງຂັນຊິງແຊ້ມ.
ສ່ວນນັກກິລາບານບ້ວງທີ່ໂດ່ງດັງ ທ້າວ LeBron James ໄດ້ນຳໜ້າ ໝູ່ ໃນການເຮັດ
ຄະແນນຂອງທີມ Cavaliers ໂດຍໄດ້ທັງໝົດ 32 ຄະແນນ ພ້ອມທັງສາມາດຍາດເອົາ
ບານທີ່ຟົ້ງອອກມາຄືນໄດ້ 18 ຄັ້ງແລະຊ່ອຍສົ່ງບານໃຫ້ເຮັດຄະແນນໄດ້ 9 ເທື່ອຊຶ່ງເປັນ
ການຫຼິ້ນທີ່ດີເດັ່ນອີກເທື່ອນຶ່ງ ໃນລະຫວ່າງການແຂ່ງຂັນຊິງແຊ້ມນີ້. ແຕ່ທ້າວ James
ລົງຫຼິ້ນໂດຍປາດສະຈາກເພື່ອນນັກກິລາໂດ່ງດັງອີກຄົນນຶ່ງຄື ທ້າວ Kevin Love ຜູ້ທີ່
ໄດ້ຮັບບາດເຈັບ ເມື່ອຕອນຕົ້ນຂອງການແຂ່ງຂັນເຂົ້າຊິງແຊ້ມ ແລະທ້າວ Kyrie Irving
ທີ່ໄດ້ຮັບບາດເຈັບຢູ່ຫົວເຂົ່າໃນການແຂ່ງຂັນຊິງແຊ້ມເກມທຳອິດເຮັດໃຫ້ທີມ Cavaliers
ແຂ່ງຂັນໂດຍບໍ່ມີຜູ້ເຮັດຄະແນນທີ່ສຳຄັນອີກຄົນນຶ່ງກັບທີມ Golden State ທີ່ໄດ້ຊະນະ
67 ຄັ້ງ ໃນລະດູການແຂ່ງຂັນປົກກະຕິນັ້ນ.
ການເສຍໄຊໃນວັນອັງຄານວານນີ້ ແມ່ນການເສຍໄຊທີ່ຂົມຂື່ນສຳຫລັບ ທ້າວ James
ທີ່ເກີດຢູ່ລັດໂອຮາຍໂອ ເຊິ່ງໄດ້ເລີ້ມອາຊີບນັກກິລາບານບ້ວງ ກັບທີມ Cavaliers ແລະ
ຫາກໍກັບຄືນມາໃນປີກາຍນີ້ ຫລັງຈາກໄດ້ໄປຫລິ້ນໃຫ້ທີມ Heat ຂອງເມືອງ Miami ມາ
ໄດ້ສີ່ປີ ບ່ອນທີ່ລາວໄດ້ ຊະນະແຊ້ມບານບ້ວງແຫ່ງຊາດ 2 ເທື່ອນັ້ນ.
