ລວມຍອດຜະລິດຕະພັນພາຍໃນ (GDP) ຂອງແຂວງຫົວພັນ ໃນປີ 2024 ຄາດວ່າ ຈະມີມູນຄ່າລວມທີ່ສະເລ່ຍເປັນລາຍໄດ້ຂອງປະຊາກອນລາວໃນແຂວງດັ່ງກ່າວໄດ້ຕໍ່າກວ່າ 1,000 ໂດລາຕໍ່ຄົນຕໍ່ປີເທ່ານັ້ນ.
ທ່ານ ຄຳແພງ ໄຊສົມແພງ ເຈົ້າແຂວງໆຫົວພັນ ຖະແຫລງວ່າ ການພັດທະນາທາງເສດຖະກິດ-ສັງຄົມ ຢູ່ແຂວງຫົວພັນ ມີຄວາມຄືບໜ້າຍ່າງຊັກຊ້າ ຍ້ອນມີຂໍ້ຈຳກັດທາງດ້ານທຶນຮອນ, ບຸກຄະລາກອນ, ວິຊາການ ແລະທີ່ຕັ້ງພູມສາດທີ່ພື້ນທີ່ສ່ວນຫຼາຍແມ່ນເຂດພູດອຍ. ສະນັ້ນ, ຈິ່ງເປັນອຸປະສັກຕໍ່ການຜະລິດກະສິກຳ ແລະ ການພັດທະນາໂຄງການພື້ນຖານຕ່າງໆ ຈຶ່ງໄດ້ສົ່ງຜົນກະທົບຕໍ່ການພັດທະນາເພື່ອຍົກລະດັບຄຸນນະພາບຊີວິດ ແລະການເປັນຢູ່ຂອງປະຊາຊົນໃນແຂວງຍ່າງຫລີກລ່ຽງບໍ່ໄດ້ ເຫັນໄດ້ຈາກລວມຍອດຜະລິດຕະພັນພາຍໃນ (GDP) ທີ່ສາມາດຄິດໄລ່ເປັນລາຍຮັບສະເລ່ຍຂອງປະຊາຊົນໃນແຂວງຫົວພັນໄດ້ພຽງແຕ່ 900 ໂດລາຕໍ່ຄົນຕໍ່ປີໃນປັດຈຸບັນ, ດັ່ງທີ່ ທ່ານ ຄຳແພງ ໄດ້ຢືນຢັນວ່າ:
“ໃນຂົງເຂດກະສິກຳ, ປູກຝັງ ແລະລ້ຽງສັດ ກະຖືວ່າໃນປັດຈຸບັນນີ້ ທາງແຂວງພວກເຮົາ ມີເນື້ອທີ່ປູກຝັງກະບໍ່ຫຼາຍປານໃດ ເພາະເປັນພູເຂົາ, ປ່າດົງສູງຊັນ. ແຕ່ພວກເຮາກະພະຍາຍາມເຮັດໃຫ້ພໍ່ແມ່ປະຊາຊົນໄດ້ນຳໃຊ້ພື້ນທີ່ດັງກ່າວໃນການປູກພືດຊະນິດຕ່າງໆ ໂດຍສະເພາະສາລີ, ມັນຕົ້ນບໍ່, ຫຼື ພືດຜັກຕ່າງໆ. ສໍາລັບການນໍາໃຊ້ພາຍໃນ ແລະສົ່ງອອກຕ່າງປະເທດ ໂດຍສະເພາະແມ່ນສົ່ງໄປຫວຽດນາມ., ເຊິ່ງເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນກະນັບມື້ນັບດີຂື້ນ ສະເລ່ຍໃສ່ຫົວຄົນແມ່ນປະມານ 900 ໂດລາຕໍ່ຄົນຕໍ່ປີ.”
ລາຍໄດ້ສະເລ່ຍຂອງປະຊາຊນລາວໃນແຂວງຫົວພັນດັ່ງກ່າວນີ້ ແມ່ນຕໍ່າກວ່າລາຍໄດ້ສະເລ່ຍຂອງປະຊາຊົນລາວໃນເຂດນະຄອນຫຼວງວຽງຈັນຮອດ 2.4 ເທົ່າ ແຕ່ວ່າ ຍ້ອນວິກິດການທາງເສດຖະກິດ ແລະສະພາວະທີ່ຄ່າເງິນກີບຕົກຕໍ່າລົງຢ່າງໜັກໜ່ວງ ຈຶ່ງໄດ້ສົ່ງຜົນກະທົບຢ່າງຫຼວງຫຼາຍ ແລະເຮັດໃຫ້ລາຍໄດ້ສະເລ່ຍຂອງປະຊາຊົນລາວໃນເຂດນະຄອນຫຼວງວຽງຈັນຫຼຸດລົງຈາກ 64 ລ້ານກວ່າກີບ ໃນປີ 2023 ລົງເຫຼືອ 48 ລ້ານກວ່າກີບຕໍ່ຄົນ ຫຼື ພຽງ 1,920 ໂດລາ ຕາມອັດຕາແລກປ່ຽນຕົວຈິງ ແລະ ເຖິງແມ່ນວ່າເສດຖະກິດຂອງນະຄອນຫຼວງວຽງຈັນ ຂະຫຍາຍຕົວ 5.7 ເປີເຊັນ ກໍຕາມ, ແຕ່ດ້ວຍການທີ່ຄ່າເງິນກີບໄດ້ຫຼຸດລົງຢ່າງຫຼວງຫຼາຍ. ຈຶ່ງເຮັດໃຫ້ລາຍໄດ້ສະເລ່ຍຂອງຄົນລາວໃນເຂດນະຄອນຫຼວງວຽງຈັນ ໄດ້ຫຼຸດລົງຫຼາຍກວ່າ 3.3 ເທົ່າ ທຽບໃສ່ປີ 2022 ເຊິ່ງປະຊາຊົນລາວໃນເຂດນະຄອນຫຼວງວຽງຈັນມີລາຍໄດ້ສະເລ່ຍຮອດ 6,379 ໂດລາຕໍ່ຄົນຕໍ່ປີນັ້ນ, ດັ່ງທີ່ເຈົ້າໜ້າທີ່ຂັ້ນສູງໃນສະພາປະຊາຊົນເຂດນະຄອນຫຼວງວຽງຈັນໄດ້ຢືນຢັນວ່າ:
“ການເຕິບໂຕທາງເສດຖະກິດໃນ 6 ເດືອນຕົ້ນປີ 2024 ມີການຂະຫຍາຍຕົວໃນລະດັບ 5.7 ເປີເຊັນ ລວມຍອດຜະລິດຕະພັນພາຍໃນ ຫຼື GDP 43,960.07 ຕື້ກີບ ເທົ່າກັບ 57.3 ເປີເຊັນ ຂອງແຜນການ, ລາຍຮັບສະເລ່ຍຕໍ່ຫົວຄົນບັນລຸໄດ້ 43.14 ລ້ານກີບ, ແຕ່ສະເລ່ຍລາຍຮັບຕໍ່ຫົວຄົນ ເມື່ອທຽບໃສ່ອັດຕາແລກປ່ຽນເຫັນວ່າ ມີບາງສະຖານທີ່ໄດ້ຫຼຸດລົງ.”
ສ່ວນນັກຊ່ຽວຊານດ້ານການເງິນ ແລະການທະນາຄານໃນອາຊຽນໄດ້ຄາດຄະເນສະພາບການເສດຖະກິດອາຊຽນໃນປີ 2024 ວ່າ GDP ລວມຂອງ 10 ປະເທດສະມາຊິກອາຊຽນຈະມີມູນຄ່າທັງໝົດ 4,161,842 ລ້ານໂດລາສະຫະລັດ, ໃນນັ້ນ ອິນໂດເນເຊຍຍັງເປັນປະເທດທີ່ມີ GDP ສູງທີ່ສຸດ, ຮອງລົງມາແມ່ນປະເທດໄທ, ສິງກະໂປ, ຟີລິບປິນ, ຫວຽດນາມ, ມາເລເຊຍ, ມຽນມາ, ກຳປູເຈຍ, ບຣູໄນ ແລະ ລາວ ຕາມລຳດັບ. ສຳລັບ ລາວ ຖືເປັນປີທີ 3 ທີ່ມູນຄ່າ GDP ຫຼຸດລົງ ແລະ ຕໍ່າກວ່າ GDP ຂອງບຣູໄນ.
ທັ້ງນີ້ໂດຍຜູ້ຊ່ຽວຊານດ້ານການເງິນ ແລະການທະນາຄານໃນອາຊຽນຄາດຄະເນວ່າ GDP ຂອງລາວໃນປີ 2024 ຈະມີມູນຄ່າລວມບໍ່ເກີນ 14,110 ລ້ານໂດລາສະຫະລັດ, GDP ຂອງບຣູໄນຈະມີມູນຄ່າທັງໝົດປະມານ 15,780 ລ້ານໂດລາ ໃນຂະນະທີ່ລັດຖະບານລາວໄດ້ວາງເປົ້າໝາຍມູນຄ່າ GDP ໃນປີ 2024 ໄວ້ທີ່ລະດັບເກີນກວ່າ 293,650 ຕື້ກີບຈາກການຂະຫຍາຍຕົວຂອງ GDP ໃນອັດຕາສະເລ່ຍ 4.7 ເປີເຊັນ.
ແຕ່ແນວໃດກໍຕາມ ດ້ວຍການຫຼຸດລົງຢ່າງຕໍ່ເນື່ອງຂອງຄ່າເງິນກີບນັ້ນ ຈຶ່ງໄດ້ສົ່ງຜົນກະທົບເຮັດໃຫ້ GDP ຂອງລາວຈະມີມູນຄ່າລວມພຽງແຕ່ 13,455 ລ້ານໂດລາ ເມື່ອທຽບໃສ່ອັດຕາແລກປ່ຽນທາງການທີ່ທະນາຄານແຫ່ງຊາດລາວກຳນົດ ແລະຈະມີມູນຄ່າທັງໝົດພຽງ 11,746 ລ້ານໂດລາເທ່ານັ້ນ ຖ້າຫາກວ່າຄິດໄລ່ຕາມອັດຕາແລກປ່ຽນໃນທ້ອງຕະຫຼາດໂຕຈິງ.
ຟໍຣັມສະແດງຄວາມຄິດເຫັນ