ການແຂ່ງຂັນຊິງແຊັມໂລກ ຂອງ ສະຫະພັນ ເບສບອລ ຄັ້ງທີ 116 ຫຼືທີ່ເອີ້ນວ່າ Major League Baseball World Series ຈະເລີ້ມຕົ້ນຂຶ້ນ ໃນວັນອັງຄານມື້ນີ້ ຢູ່ໃນເມືອງຮິວສຕັນ ລັດເທັກຊັສ ຕັ້ງຢູ່ທາງພາກຕາເວັນຕົກສຽງໃຕ້ ຂອງສະຫະລັດ ເມື່ອທີມຂອງເມືອງຮິວສຕັນ ຄື ທີມ ອາສໂຕຣສ໌ ຈະແຂ່ງກັບທີມ ວໍຊິງຕັນ ນາຊັນໂນລສ໌.
ທີມຮິວສຕັນ ຈະສົ່ງ ຜູ້ຊະນະເລີດ ໃນເກມທີ 19 ຂອງລະດູການແຂ່ງຂັນ ທ້າວ ເຈີຣິຕ ໂຄລ ຂຶ້ນປະຈຳຕຳແໜ່ງຜູ້ແກວ່ງ ສຳລັບເກມທີ 1 ໃນຂະນະດຽວກັນ ຜູ້ທີ່ໄດ້ຮັບລາງວັນ Cy Young ຄື ທ້າວ ແມັກສ໌ ເຈີຣເຊີ້ ກໍໄດ້ຮັບໜ້າທີ່ ກ່ອນໝູ່ ສຳລັບທີມ ວໍຊິງຕັນ.
ທີມ ອາສໂຕຣສ໌ ໄດ້ເຂົ້າເຖິງຮອບແຂ່ງຂັນຊິງແຊັມ World Series ເປັນຄັ້ງທີສອງ ໃນ 3 ລະດູການແຂ່ງຂັນ ເມື່ອວັນເສົາທີ່ຜ່ານມານີ້ ໃນເວລາທີ່ພວກເຂົາ ເອົຳຊະນະທີມ ນິວຢອກ ແຢ່ງກີ້ສ໌ 6 ຄະແນນ ຕໍ່ 4 ໂດຍໄດ້ຊະນະເປັນແຊ້ມຂອງ ສະຫະພັນ ອາເມຣິກັນ ເບສບອລ ຊີຣີສ໌ ຍ້ອນການຕີໝາກເບສບອລ ອອກສະໜາມ ຫຼືເອີ້ນວ່າ Home run ໃນເກມຮອບທີ 9 ທີ່ໜ້າຕື່ນເຕັ້ນເລົ້າໃຈ ໂດຍດາຣາປະຈຳ ເບສທີສອງ ຄື ທ້າວ ໂຮເຊ ອາລທູວ໌. ທີມອາສໂຕຣ ໄດ້ຊະນະ World Series ມາແລ້ວໃນປີ 2017 ໂດຍເອົາຊະນະທີມ ລອສ ແອນເຈີເລັສ ດອດເຈີສ໌ ມາໄດ້ 4 ເກມຕໍ່ 3 ໃນການແຂ່ງຂັນກັນທັງໝົດ 7 ເກມ.
ສ່ວນທີມນາຊັນໂນລສ໌ ແມ່ນເປັນເລື້ອງຂອງຄວາມໄຝ່ຝັນທີ່ກາຍເປັນຈິງ ຂອງການແຂ່ງຂັນໃນລະດູການປີນີ້ ຫຼັງຈາກທີ່ໄດ້ເລີ້ມຕົ້ນລະດູການ ໂດຍມີຄະແນນ ເສຍແລະໄດ້ ຢູ່ 19 ເກມຕໍ່ 31 ເກມ ທີມນາຊັນໂນລ ກໍໄດ້ເຂົ້າຮອບ ຮອງຊະນະເລີດ ໃນຖານະເປັນທີມ ທີ່ບໍ່ໄດ້ເປັນທີມຊະນະໃນສາຍ ເຖິງແມ່ນວ່າ ຈະມີຄະແນະຊະນະທີ່ດີກໍຕາມ. ພວກເຂົາ ກໍແຂ່ງຕໍ່ໄປຈົນເອົາຊະນະທີມ ມີລວອກກີ ບຣູເວີສ໌ ແລະທີມດອດເຈີສ໌ ໃນການແຂ່ງຂັນຄັ້ງທຳອິດ ສອງຮອບ ກ່ອນທີ່ຈະເອົາຊະນະທີມທີ່ເປັນໂຕເຕັ່ງ ຄື ເຊັງ ລູອິສ ຄາຣດີໂນລສ໌ 4 ເກມລວດ ໂດຍຊະນະເປັນແຊັມເຂດສະຫະພັນ ນາຊັນໂລນ ຍ້ອນການແກວ່ງໝາກເບສບອລ ທີ່ເກັ່ງກາດ ຈາກຜູ້ເລີ້ມຕົ້ນ ຄື ທ້າວ ອານີໂບລ ແຊນແຈສ ທ້າວເຈີຣເຊີ້ ທ້າວສະຕີເຟັນ ສຕຣໍສເບີກ ແລະທ້າວແພດທຣິກ ຄໍບິນ.
