ປະທານາທິບໍດີສະຫະລັດ ທ່ານບາບັກໂອບາມາ ເດີນທາງໄປຮອດເມືອງ Cannes ຂອງຝຣັ່ງແລ້ວ ເພື່ອໄປຮ່ວມກອງປະຊຸມສຸດຍອດເປັນເວາລາສອງມື້ກັບບັນດາຜູ້ນໍາຂອງ 20 ປະເທດຫລື G20 ທີ່ຈະເລີນດ້ານເສດຖະກິດຂອງໂລກ ອັນເປັນການພົບປະທີ່ຄາດກັນໄວ້ວ່າ ຈະຄອບງໍາໂດຍວິກິດການໜີ້ສິນຂອງຢູໂຣບແລະການເຄື່ອນໄຫວທີ່ມີ ຂຶ້ນຢ່າງກະທັນຫັນຂອງກຣິສທີ່ຈະນຳເອົາໂຄງການກອບກູ້ໜີ້ສິນມາໃຫ້ປະຊາຊົນລົງມະຕິຮັບເອົາຫລືບໍ່ນັ້ນ.
ປະທານາທິບໍດີໂອບາມາກໍານົດຈະທໍາການພົບປະກັນຕ່າງຫາກໃນວັນພະຫັດມື້ນີ້ກັບປະທານາທິບໍດີຝຣັ່ງທ່ານ Nicolas Zarkozy ແລະນາ ຍົກລັດຖະມົນຕີ Angela Merkel ແຫ່ງເຢຍຣະມັນ ຊຶ່ງຜູ້ນໍາທັງສອງພະຍາຍາມຊັກຊວນໃຫ້ທ່ານ Papandreou ປະລະແຜນການຂອງທ່ານ ທີ່ຈະຈັດໃຫ້ມີການລົງປະຊາມະຕິກ່ຽວກັບໂຄງການກອບກູ້ເສດຖະກິດທີ່ທາງຜູ້ນໍາຂອງຢູໂຣບໄດ້ບັນລຸການຕົກລົງກັນໃນສັບປະດາແລ້ວນີ້.
ໃນການພົບປະແບບສຸກເສີນຂອງບັນດາຜູ້ນໍາຢູໂຣບກ່ອນກອງປະຊຸມສຸດຍອດຂອງກຸ່ມ G20 ນີ້ ປະທານາທິບໍດີ Sarkozy ແລະນາຍົກລັດຖະມົນຕີ Merkel ກ່າວວ່າ ກຣິສຈະບໍ່ໄດ້ຮັບເງິນຕື່ມອີກແມ່ນແຕ່ 1 ເຊັນຂອງໂຄງການຊ່ອຍກູ້ໜີ້ສິນຈາກຢູໂຣບຫລືຈາກກອງທຶນສາກົນຫລື IMF ນອກຈາກກຣິສຈະປະຕິບັດຕາມເງື່ອນຕ່າງໆຂອງຂໍ້ຕົກລົງກັນນັ້ນ.
ນາຍົກລັດຖະມົນຕີ Papandreou ໄດ້ເຮັດໃຫ້ຢູໂຣບງົງງັນໂດຍປະກາດອອກມາແບບບໍ່ມີ
ການຄາດກັນໄວ້ລ່ວງໜ້າວ່າ ປະຊາຊົນກຣິສຈະສາມາດລົງມະຕິຮັບເອົາໂຄງການກອບກູ້
ໜີ້ສິນນີ້ຫລືບໍ? ຊຶ່ງຮວມທັງມາດຕະການປະຢັດມັດທະຍັດທີ່ບໍ່ໄດ້ຮັບຄວາມນິຍົມຢ່າງໃຫຍ່
ຫຼວງຈາກປະຊາຊົນນັ້ນນໍາ.
ເຖິງຢ່າງໃດກໍດີ ຄໍາເວົ້າຢູ່ໃນຮ່າງການລົງປະຊາມະຕິ ທີ່ສະເໜີຂຶ້ນນີ້ ຍັງບໍ່ເປັນທີ່ຈະແຈ້ງ
ຊຶ່ງທ່ານ Papandreou ກ່າວໃນວັນພຸດວານນີ້ວ່າ ການປະກອບສ່ວນໃນອະນາຄົດຂອງ
ກຣິສໃນການໃຊ້ເງິນຕາຮ່ວມຂອງຢູໂຣບນັ້ນ ແມ່ນມີສ່ວນໄດ້ສ່ວນເສຍໃນການລົງປະຊາ
ມະຕິນີ້.
