ສ່ວນໃຫຍ່ຂອງການຖົກຖຽງກັນ ເລື້ອງບັນຫາຄົນເຂົ້າເມືອງ ໃນ
ສະຫະລັດນັ້ນ ແມ່ນວົນວຽນຢູ່ອ້ອມແອ້ມ ພວກຄົນເຂົ້າເມືອງ
ຈາກພາກພື້ນ ອາເມຣິກາ ລາຕິນ ທີ່ບໍ່ມີເອກະສານຖືກຕ້ອງຕາມ
ກົດໝາຍ ຜູ້ຊຶ່ງກຳລັງປະເຊີນໜ້າ ກັບການຖືກເນລະເທດ. ກຸ່ມນຶ່ງ
ທີ່ຖືກມອງຂ້າມຢູ່ເລື້ອຍໆ ກໍແມ່ນຊາວ ເອເຊຍ ທີ່ເຂົ້າມາຢູ່ໃນ
ປະເທດນີ້ແບບຜິດກົດໝາຍ ຊຶ່ງຄາດຄະເນວ່າ ມີຈຳນວນ ປະມານ
1 ລ້ານ 3 ແສນຄົນ. ຄຳສັ່ງພິເສດ ເມື່ອໄວໆມານີ້ ຂອງປະທານາ
ທິບໍດີ ບາຣັກ ໂອບາມາ ກ່ຽວກັບພວກຄົນເຂົ້າເມືອງຜິດກົດໝາຍ
ສາມາດ ຊ່ວຍໃຫ້ຊາວເອເຊຍເຫລົ່ານັ້ນ ປະມານ 4 ແສນຄົນ ຖືກ
ຍົກເວ້ນຊົ່ວຄາວ ຈາກການຖືກເນລະເທດ ແຕ່ສຳຫລັບອີກຫຼາຍໆ
ຄົນ ອະນາຄົດຂອງພວກເຂົາເຈົ້າ ແມ່ນບໍ່ແນ່ນອນເລີຍ. ຜູ້ສື່ຂ່າວ
ວີໂອເອ Elizabet Lee ມີລາຍ ງານຈາກພາກໃຕ້ ຂອງລັດ
ແຄລີຟໍເນຍ ຊຶ່ງດາຣາຈະນຳມາສະເໜີທ່ານ ໃນອັນດັບຕໍ່ໄປ.
ທ້າວ Peter Liu ນັກຮຽນມັດທະຍົມ ມີຄວາມກັງວົນ ກ່ຽວກັບ ອະນາຄົດຂອງລາວ. ລາວອອກຈາກປະເທດຈີນ ມາຍັງສະຫະລັດ ເພາະວ່າມີການເຈັບເປັນ ຢູ່ໃນຄອບຄົວ
ຂອງລາວ ຊຶ່ງມີບັນຫາທາງການເງິນ. ລາວໄດ້ຕັດສິນໃຈຢູ່ຕໍ່ໄປ ກາຍກຳນົດວີຊ່າ
ທ່ອງທ່ຽວ ທີ່ລາວຂໍມາ.
ທ້າວ Liu ເວົ້າວ່າ “ມັນເປັນການຕັດສິນໃຈທີ່ຍາກຫຼາຍ ເພາະວ່າ ໃນເວລານັ້ນ
ຂ້ອຍຄິດວ່າ ຖ້າຂ້ອຍຕັດສິນໃຈແນວນີ້ ຂ້ອຍກໍອາດຈະ ບໍ່ໄດ້ພົບເຫັນ ພໍ່ເຖົ້າ
ແມ່ເຖົ້າຂອງຂ້ອຍ ແລະ ຄອບຄົວຂອງຂ້ອຍ ເປັນເວລາຫຼາຍໆປີ.”
ດຽວນີ້ ທ້າວ Liu ອາໄສຢູ່ໃນນະຄອນ Los Angeles ໃນຖານະ ເປັນຄົນເຂົ້າເມືອງ
ທີ່ບໍ່ມີເອກະສານຖືກຕ້ອງຕາມກົດໝາຍ. ລາວເປັນ ຫ່ວງນຳເລື້ອງຫາເງິນ ມາຈ່າຍຄ່າ ຮຽນມະຫາວິທະຍາໄລ ເພາະວ່າ ລາວບໍ່ສາມາດເຮັດວຽກໄດ້. ຄຳສັ່ງພິເສດ ຂອງ
ປະທານາທິບໍດີ ໂອບາມາ ບໍ່ໄດ້ຊ່ອຍເຫຼືອລາວເລີຍ ເພາະວ່າ ລາວມາເຖິງອາເມຣິກາ
ຫຼັງຈາກມື້ ຕັດຂາດ ສຳຫລັບການເລື່ອນເວລາອອກໄປ ໃຫ້ແກ່ພວກເດັກນ້ອຍທີ່ ໄດ້
ເຂົ້າມາຮອດສະຫະລັດແລ້ວນັ້ນ. ລາວກ່າວວ່າ ແມ່ນແຕ່ພວກຜູ້ທີ່ ມີເງື່ອນໄຂ ທີ່ຈະ ໄດ້ຮັບການຍົກເວ້ນຊົ່ວຄາວ ຈາກການຖືກເນລະເທດນັ້ນ ກໍຍັງລັງເລໃຈ ບໍ່ກ້າທີ່ຈະ
ຍື່ນໃບສະໝັກ ຮ້ອງຂໍເອົາການຍົກເວ້ນ.
ທ້າວ Liu ເວົ້າວ່າ “ໂດຍສະເພາະແລ້ວ ໃນປະຊາຄົມຊາວເອເຊຍ ຄົນສ່ວນໃຫຍ່
ຈະມີີຄວາມກັງວົນຫຼາຍ ຖ້າເຂົາເຈົ້າອອກມາຈາກຄວາມມືດ ແລະ ສະໝັກຂໍເອົາ
ການໂຈະ ການຖືກເນລະເທດໄວ້ ເພາະວ່າມັນ ຈະເປັນຜົນກະທົບ ຕໍ່ຄອບຄົວ
ຂອງພວກເຂົາເຈົ້າ ບໍ່ໃນທາງໃດ ກໍທາງໜຶ່ງ.”
ຄຳສັ່ງພິເສດຂອງປະທານາທິບໍດີໂອບາມາ ໄດ້ໂຈະໄວ້ຊົ່ວຄາວ ໄພຂົ່ມຂູ່ ຂອງການຖືກ
ເນລະເທດ ສຳຫລັບພວກເຂົ້າເມືອງຜິດກົດໝາຍ ທີ່ໄດ້ອາໄສຢູ່ໃນສະຫະລັດມາແລ້ວ
ເປັນເວລາຢ່າງນ້ອຍ 5 ປີ ແລະ ມີລູກເຕົ້າທີ່ຢູ່ໃນສະຫະລັດ ຢ່າງຖືກຕ້ອງຕາມກົດໝາຍ.
ແຕ່ວ່າ ພວກທີ່ຖືວ່າເປັນໄພຂົ່ມຂູ່ ຕໍ່ຄວາມປອດໄພ ຫຼື ຜູ້ທີ່ມີປະຫວັດ ຄະດີອາຍາ ຈະ
ປະເຊີນກັບ ການຖືກເນລະເທດຕໍ່ໄປ.
ທ້າວ David Ros ອົບພະຍົບຄົນຂະເໝນ ຕົກຢູ່ໃນກໍລະນີດັ່ງກ່າວ. ຕອນທີ່ລາວມີອາຍຸ
ໄດ້ 16 ປີ ລາວໄດ້ສັງຫານຜູ້ຊາຍຄົນນຶ່ງ ແລະ ຖືກຈັບຂັງຄຸກເປັນເວລາເກືອບ 19 ປີ ຊຶ່ງເຮັດໃຫ້ລາວສູນເສຍສະຖານະພາບ ຜູ້ມີສິດອາໄສຢູ່ໄດ້ຢ່າງຖາວອນ ຫລືບັດຂຽວນັ້ນ
ແລະ ເວລານີ້ ກຳລັງລໍຖ້າການຖືກເນລະເທດ.
ທ້າວ David Ros ເວົ້າວ່າ “ຂ້ອຍມາປະເທດນີ້ ໂດຍບໍ່ຮູ້ຈັກພາສາອັງກິດຈັກດີ້ ບໍ່ມີ
ການສຶກສາ ບໍ່ມີເງິນ ແລະ ພວກເຮົາໄດ້ສູ້ຊົນຢ່າງໜັກ ແລະ ຍ້ອນການສູ້ຊົນ
ດັ່ງກ່າວນັ້ນ ຂ້ອຍຈຶ່ງໄດ້ເຮັດສິ່ງທີ່ຜິດພາດໄປ ຫຼາຍໆຄັ້ງ ໃນຊີວິດ.”
ກຸ່ມທີ່ຊື່ວ່າ ຊາວອາເມຣິກັນເຊື້ອສາຍເອເຊຍ ສົ່ງເສີມຄວາມຍຸຕິທຳ ແລະສະພາກົດໝາຍ
ຊາວເອເຊຍ (Asian Americans Advancing Justice – Asian Law Caucus) ກ່າວ
ວ່າ ຊາວເອເຊຍຕາເວັນອອກສຽງໃຕ້ ແລະ ຊາວເກາະປາຊີຟິກ ແມ່ນໄດ້ຖືກເນລະເທດ ຍ້ອນໄດ້ກະທຳຄວາມຜິດທາງອາຍາ ໃນອັດຕາ ຫຼາຍເຖິງ 5 ເທົ່າຂອງຊາວອົບພະຍົບ
ຊາດອື່ນໆ.
Shiu-Ming Cheer ທະນາຍຄວາມປະຈຳສູນກາງກົດໝາຍຄົນເຂົ້າເມືອງແຫ່ງຊາດ ກ່າວວ່າ ເຫດຜົນແມ່ນສະຫລັບສັບຊ້ອນຫລາຍ.
ທ່ານນາງ Shiu-Ming Cheer ເວົ້າວ່າ “ມັນປະກອບດ້ວຍຄວາມຫຼົ້ມແຫຼວ ຂອງ
ນະໂຍບາຍ ສຳຫລັບການຕັ້ງຖິ່ນຖານໃໝ່ ຂອງພວກອົບພະຍົບ ແລະ ຄວາມ
ເປັນຈິງທີ່ວ່າ ຊາວເອເຊຍຕາເວັນອອກສຽງໃຕ້ຫຼາຍໆຄົນ ອາໄສຢູ່ໃນຊຸມຊົນ
ບ່ອນທີ່ມີອັດຕາອາຊະຍາກຳ ທີ່ສູງຢູ່ແລ້ວ ແລະ ມີການຂາດແຄນ ທາງດ້ານ
ການສົ່ງເສີມ ການຂາດແຄນຕາໜ່າງ ແລະ ສະຖາບັນຊ່ອຍເຫຼືອທາງສັງຄົມ
ຕ່າງໆ ທີ່ອາດຊ່ວຍສະໜອງ ທາງເລືອກອື່ນໆ ໃຫ້ແກ່ພວກເຂົາເຈົ້າ ນອກ
ເໜືອໄປຈາກ ການກະທຳອາຊະຍາກຳນັ້ນ.”
ທ່ານນາງ Cheer ກ່າວອີກວ່າ ຊາວເອເຊຍຕາເວັນອອກສຽງໃຕ້ເຫຼົ່ານີ້ ຫຼາຍໆຄົນ ໄດ້
ຫັນປ່ຽນຊີວິດຂອງເຂົາເຈົ້າ ຫຼັງຈາກໄດ້ຮັບໃຊ້ໂທດໃນຄຸກມາແລ້ວ ລວມທັງທ້າວ David
Ros ນຳ. ດຽວນີ້ ລາວມີວຽກເຮັດງານທຳ ລ້ຽງດູຄອບຄົວ ທີ່ມີເມຍ ແລະ ລູກ 2 ຄົນ ແລະ
ໄດ້ເຮັດວຽກ ອາສາສະໝັກຫລາຍໆຢ່າງ ນຳອີກ. ລາວຫວັງວ່າ ຈະມີການປ່ຽນແປງກົດໝາຍ ເພື່ອໃຫ້ຜູ້ພິພາກສາ ສາມາດຕັດສິນໃຈໄດ້ວ່າ ຜູ້ທີ່ມີຄະດີອາຍາຄົນໃດ ຄວນຈະຕ້ອງ
ຖືກເນລະເທດ.
ທ້າວ Ros ເວົ້າວ່າ “ການປ່ອຍໃຫ້ສານເປັນຜູ້ຕັດສິນໃຈໄດ້ອີກ ໃນເລື່ອງນີ້ ແມ່ນ
ຈະເປັນສິ່ງໜຶ່ງ ທີ່ເປັນບາດກ້າວຂັ້ນຕົ້ນ ເພາະວ່າ ຜູ້ພິພາກສາ ສາມາດຕັດສິນ
ໃຈໄດ້ ບົນພື້ນຖານ ຂອງຄວາມດີ ຂອງບຸກຄົນໆນັ້ນ ບໍ່ແມ່ນວ່າຜູ້ກ່ຽວເຄີຍເປັນ
ໃຜມາກ່ອນ ແຕ່ວ່າເປັນຄົນແນວໃດໃນມື້ນີ້.”
ທັງທ້າວ David Ros ກັບ ທ້າວ Peter Liu ກ່າວວ່າ ພວກເຂົາເຈົ້າ ອອກມາເວົ້າ ເຖິງ
ແມ່ນວ່າ ຈະສ່ຽງຕໍ່ການຖືກເນລະເທດກໍຕາມ ໂດຍຫວັງວ່າ ພວກຜູ້ແທນ ລັດຖະສະພາ
ຈະໄດ້ຍິນເລື້ອງລາວ ຂອງພວກເຂົາເຈົ້າ ແລະ ປະຕິຮູບລະບົບຄົນເຂົ້າເມືອງ ໃນທາງທີ່
ເປັນຜົນດີ ແກ່ພວກເຂົາເຈົ້າ.
