ປະຊາຊົນຟິລິບປິນ ກຳລັງປະເຊີນໜ້າກັບໄຕ້ຝຸ່ນອີກຫົວນຶ່ງ ທີ່ໄດ້ເຮັດໃຫ້ຢ່າງໜ້ອຍສີ່
ຄົນເສຍຊີວິດ ໃນຂະນະທີ່ໄຕ້ຝຸ່ນຫົວນີ້ພັດຖະຫລົ່ມພາກເໜືອຂອງປະເທດໃນວັນອັງ
ຄານວານນີ້ ດ້ວຍລົມແຮງເຖິງ 230 ກິໂລແມດຕໍ່ຊົ່ວໂມງແລະ ມີຝົນຕົກໜັກ.
ກ່ອນມຸ່ງໜ້າສູ່ພາກຕາເວັນຕົກ ໄປຫາທະເລຈີນໃຕ້ ໄຕ້ຝຸ່ນຢູຕູໄດ້ເຮັດໃຫ້ເກີດດິນ
ເຈື່ອນ ແລະຕັນທາງຫຼວງສາຍຫຼັກຢູ່ເກາະໃຫຍ່ລູຊອນ. ພວກນັກຂ່າວກ່າວວ່າຖະ
ໜົນຫົນທາງໃຊ້ການບໍ່ໄດ້ ຍ້ອນດິນເຈື່ອນລົງມາໃສ່ຕຶກລັດຖະບານທ້ອງຖິ່ນ ທີ່
ຢູ່ພາຍໃຕ້ການກໍ່ສ້າງຢູ່ໃນແຂວງພູຜາ ທີ່ເຮັດໃຫ້ 20 ກວ່າຄົນຕິດຄ້າງຢູ່ຂ້າງໃນ.
ໃນຈຳນວນຜູ້ຕິດຄ້າງນັ້ນ ແມ່ນພວກສັນຍາຈ້າງສ້າງທາງຫຼວງ ພວກຮັກສາຄວາມ
ປອດໄພ ແລະອື່ນໆ ຜູ້ທີ່ຊອກຫາບ່ອນພັກເຊົາ ອີງຕາມຫົວໜ້າປ້ອງກັນພົນລະເຮືອນ
ໃນເມືອງຄໍດີລລີຣາສ ທີ່ເປັນເຂດບໍ່ມີທາງອອກສູ່ທະເລໃນເກາະ ລູຊອນ. ຢູຕູແມ່ນ
ໄຕ້ຝຸ່ນຫົວທີ 18 ທີ່ໄດ້ພັດຖະຫລົ່ມຟິລິບປິນ ໃນປີນີ້.
ຫຼາຍພັນຄົນ ໄດ້ພາກັນຍົກຍ້າຍ ກ່ອນພາຍຸຫົວນີ້ມາເຖິງ. ໃນຄ່ຳຄືນວັນທີ 24 ຂອງ
ເດືອນຕຸລານີ້ຢູຕູຊຶ່ງຖືກຈັດວ່າ ເປັນໄຕ້ຝຸ່ນທີ່ແຮງສຸດ ໃນຂະນະທີ່ມັນ ພັດຖະຫລົ່ມ
ໂດຍກົງໃສ່ເກາະໄຊປັນ ແລະຕີນຽນ ໃນໝູ່ເກາະມາຣິອານາເໜືອ ທີ່ເປັນດິນແດນ
ຂອງສະຫະລັດ ປະມານ 9,000 ກິໂລແມັດ ທາງພາກຕາເວັນຕົກຂອງແຜ່ນດິນ
ໃຫຍ່ສະຫະລັດ. ຢູຕູໄດ້ເຮັດໃຫ້ໄຟຟ້າມອດ ທຳລາຍບ້ານເຮືອນຫຼາຍຫລັງ ແລະ
ເຮັດໃຫ້ການເລືອກຕັ້ງ ມີການຊັກຊ້າ.
ຊູເປີ້ໄຕ້ຝຸ່ນຫົວນີ້ ເປັນພາຍຸແຮງທີ່ສຸດ ທີ່ໄດ້ພັດຖະຫລົ່ມບັນດາໝູ່ເກາະໝູ່ດອນ
ຕ່າງໆ ໃນຮອບ 50 ປີ. ຢູຕູໄດ້ອ່ອນກຳລັງລົງຢ່າງຫຼວງຫຼາຍ ໃນຂະນະທີ່ພັດ
ເຂົ້າຖະຫຼົ່ມຟິລິບປີນ ແຕ່ວ່າບັນດານັກພະຍາກອນອາກາດກ່າວວ່າ ພາຍຸຫົວນີ້ຄາດ
ວ່າ ຈະເພີ້ມຄວາມແຮງຂຶ້ນອີກ ຢູ່ທະເລຈີນໃຕ້.
ໃນເດືອນກັນຍາຜ່ານມານີ້ ຊູເປີ້ໄຕ້ຝຸ່ນມັງຄຸດ ກໍໄດ້ເຮັດໃຫ້ມີຝົນຕົກໜັກຢູ່ເກາະ
ລູຊອນ ພາໃຫ້ເກີດດິນເຈື່ອນ ແລະໄດ້ເຮັດໃຫ້ກວ່າ 70 ຄົນເສຍຊີວິດ.