ລິ້ງ ສຳຫລັບເຂົ້າຫາ

logo-print

ບັນ​ດາອະ​ດີດ​ໄອ​ຍະ​ການ ສະ​ຫະ​ລັດ ​ຮຽກ​ຮ້ອງໃຫ້ ​ລັດ​ຖະ​ມົນ​ຕີ ກ​ຊ ຍຸ​ຕິ​ທຳ ລາ​ອອກ


ລັດ​ຖະ​ມົນ​ຕີ​ ກະ​ຊວງ​ຍຸ​ຕິ​ທຳ ສະ​ຫະ​ລັດ ທ່ານ ວີ​ລ​ລຽມ ບາ ເດີນ​ທາງ​ໄປ​ຮອດ ລັດ​ຖະ​ສະ​ພາ​ສະ​ຫະ​ລັດ ເພື່ອ​ການ​ກ່າວ​ຄຳ​ປາ​​ໄສ ຕໍ່​ລັດ​ຖະ​ສະ​ພາ ແລະ​ປະ​ເທດ​ຊາດ ຂອງ​ປະ​ທາ​ນາ​ທິ​ບໍ​ດີ ທ​ຣຳ ທີ່​ນະ​ຄອນຫຼວງວໍ​ຊິງ​ຕັນ ຂອງ​ສະ​ຫະ​ລັດ. ວັນ​ທີF 4 ກຸມ​ພາ 2020. REUTERS/Leah Millis/POOL

ອະ​ດີດ​ໄອ​ຍະ​ການ​ສະ​ຫະ​ລັດ ແລະ ເຈົ້າ​ໜ້າ​ທີ່​ກະ​ຊວງ​ຍຸ​ຕິ​ທຳ ຫຼາຍກວ່າ 1,100 ຄົນ ໄດ້​ຮຽກ​ຮ້ອງ​ໃນ​ວັນ​ອາ​ທິດ​ວານນີ້ ໃຫ້​ລັດ​ຖະ​ມົນ​ຕີ​ກະ​ຊວງ​ຍຸ​ຕິ​ທຳ ທ່ານ​ວີ​ລ​ລຽມ ບາ ລາ​ອອກ ຫຼັງ​ຈາກ​ທີ່​ທ່ານ ໄດ້​ເຂົ້າແຊກ​ແຊງ​ເພື່ອ​ຫລຸດ​ຜ່ອນ​ໂທດ​ຖານ​ສໍ້​ໂກງດ້ານ​ການ​ເມືອງຂອງ​ທ່ານ ຣໍ​ເຈີ ສ​ໂຕນ ໃຫ້​ສັ້ນ​ລົງ ຊຶ່ງ​ຜູ້​ກ່ຽວ​ເປັນຜູ້​ທີ່​ໄວ້​ເນື້ອ​ເຊື່ອ​ໃຈ​ຂອງ​ປະ​ທາ​ນິ​ບໍ​ດີ ດໍ​ໂນ​ລ ທ​ຣຳ.

ພະ​ນັກ​ງານໄອ​ຍະ​ການ​ລັດ​ຖະ​ບານ​ກາງສີ່​ທ່ານ ທີ່​ເປັນ​ພາກ​ສ່ວນ​ນຶ່ງ​ຂອງ​ກະ​ຊວງ​ຍຸ​ຕິ​ທຳ ນຳ​ພາ​ໂດຍ​ທ່ານ​ ບາ ໄດ້ໃຫ້​ການ​ແນະ​ນຳ​ສານ ທີ່​ຈະ​ຕັດ​ສິນ​ລົງ​ໂທດ​ທ່ານ​ ສ​ໂຕນ ໃນ​ສັບ​ປະ​ດານີ້ ໃຫ້​ຂັງ​ຄຸກ​ຜູ້​ກ່ຽວ​ເຖິງ 9 ປີ ຫຼັງ​ຈາກ​ທີ່​ໄດ້​ຖືກ​ພົບ​ເຫັນ​ວ່າ​ມີ​ຄວາມ​ຜິດ​ໃນ​ຂໍ້​ກ່າວ​ຫາ 7 ກະ​ທົງ ທີ່​ປະ​ກອບ​ດ້ວຍ ການ​ໃຫ້​ຄວາມ​ເທັດ​ຕໍ່​ລັດ​ຖະ​ສະ​ພາ ແລະ​ການ​ເຂົ້າ​ໄປກໍ່​ກວນ​ພະ​ຍານ ທີ່​ເຊື່ອ​ມໂຍງ​ກັບ​ການ​ສືບ​ສວນ​ສອບ​ສວນເວ​ລາ​ຍາວ​ນານ ໃນ​ການ​ເລືອກ​ຕັ້ງ​ເມື່ອ​ປີ 2016 ທີ່​ທ່ານ​ ທ​ຣຳ ໄດ້ຮັບ​ໄຊ​ຊະ​ນະ​ນັ້ນ.

ແຕ່​ທ່ານ​ ບາ ແລະ​ບັນ​ດາ​ເຈົ້າ​ໜ້າ​ທີ່​ຂັ້ນ​ສູງ​ຂອງ​ກະ​ຊວງ​ຍຸ​ຕິ​ທຳ ໄດ້​ສະ​ແດງ​ຄວາມ​ຕົກ​ໃຈ​ຕໍ່​ການ​ສະ​ເໜີ​ແນະ​ໃຫ້​ລົງ​ໂທດ​ທີ່​ຍາວ​ນານ​ດັ່ງ​ກ່າວ ແລະ​ທ່ານ​ທ​ຣຳ ກໍ​ໄດ້​ເອີ້ນ​ມັນ​ວ່າ “​ການ​ຕັດ​ສິນ​ຜິດ​ພາດ” ຊຶ່ງ​ທ່ານ ​ບາ ​ກໍໄດ້​ເຂົ້າ​ແຊກ​ແຊງ ແລະ ​ຕໍ່​ຈາກນັ້ນ ກະ​ຊວງ​ຍຸ​ຕິ​ທຳໄດ້​ກ່າວເຖິງ ຄຳ​ແນະ​ນຳ​ໃນ​ຂັ້ນ​ຕົ້ນວ່າ “ອາດ​ຖື​ວ່າ​ໜັກ​ເກີນ​ໄປ ແລະບໍ່​ສົມ​ເຫດ​ສົມ​ຜົນ” ແຕ່​ໄດ້​ປະ​ໄວ້​ໃຫ້​ຜູ້​ພິ​ພາກ​ສາທີ່​ພິ​ຈາ​ລະ​ນາ​ຄະ​ດີເປັນ​ຜູ້​ຕັດ​ສິນ​ໃຈວ່າ ໂທດ​ອັນ​ໃດ​ສົມ​ຄວນ​ເປັນ​ທີ່ເໝາະ​ສົມ ຢູ່​ທີ່​ການ​ພິ​ຈາ​ລະ​ນາ​ໃນ​ວັນ​ພະ​ຫັດ​ຈ​ະ​ມາ​ເຖິງນີ້.

ບັນ​ດາ​ອະ​ດີດ​ໄອ​ຍະ​ການ ແລະ​ບັນ​ດາ​ເຈົ້າ​ໜ້າ​ທີ່ກະ​ຊວງ​ຍຸ​ຕິ​ທຳ ຜູ້​ທີ່​ມາ​ຈາກ​ທົ່ວ​ສະ​ຫະ​ລັດ ​ຈາກ​ພັກ​ການ​ເມືອງ​ຕ່າງໆ ໄດ້​ກ່າວ​ໃນ​ໜັງ​ສື​ທີ່​ເປີດ​ຊອງ​ສະ​ບັບ​ນຶ່ງໃນ​ວັນ​ອາ​ທິດ​ວານນີ້ ວ່າ “ພວກ​ເຮົາ​ແຕ່​ລະ​ຄົນ ປະ​ນາມ​ຢ່າງ​ແຮງ​ຕໍ່​ການ​ແຊກ​ແຊງ​ໃນ​ຄວາມ​ຊອບ​ທຳ​ຂອງ​ກະ​ຊວງ​ຍຸ​ຕິ​ທຳ​ ໂດຍ​ທ່ານ​ປະ​ທາ​ນາ​ທິ​ບໍ​ດີ ທ​ຣຳ ແລະ ທ່ານ​ລັດ​ຖະ​ມົນ​ຕີ ບາ.”

ທ່ານ​ບາ ໄດ້​ກ່າວ​ຕໍ່ລາຍ​ການໂທ​ລະ​ພາບ ABC News ວ່າ ທ່ານບໍ່​ໄດ້ລົມ​ກັບ​ທ່ານ​ທ​ຣຳ ກ່ຽວ​ກັບໂທດ​ຂອງ​ທ່ານ ສ​ໂຕນ ແຕ່ບັນ​ດາ​ອະ​ດີດ​ໄອ​ຍະ​ການທີ່​ກຳ​ລັງ​ປະ​ທ້ວງ​ຢູ່ນັ້ນ ໄດ້​ກ່າວ​ວ່າ “​ພຶດ​ຕິ​ກຳ​ຂອງທ່ານບາ​ ໃນ​ການ​ເຮັດ​ວຽກສ່ວນ​ຕົວໃຫ້​ແກ່​ທ່ານປະ​ທາ​ນາ​ທິ​ບໍ​ດີ ​ຊຶ່ງ​ເປັນ​ທີ່​ໜ້າ​ເສຍ​ໃຈ ມັນ​ສົ່ງ​ສຽງ​ດັງ​ຫຼາຍກວ່າ ຄຳເວົ້າ​ຂອງ​ທ່ານ. ພຶດ​ຕິ​ກຳ​ເຫຼົ່າ​ນັ້ນ ແລະ​ຄວາມ​ເສຍ​ຫາຍ​ທີ່​ມັນ​ໄດ້​ສົ່ງ​ຜົນ​ຕໍ່​ຊື່​ສຽງ​ຂອງຄວາມ​ຊື່​ສັດ ແລະ ​ຕົວ​ບົດ​ກົດ​ໝາຍ​ໃນ​ກະ​ຊວງ​ຍຸ​ຕິ​ທຳນັ້ນ ແມ່ນ​ຕ້ອງ​ໃຫ້​ທ່ານ ​ບາ ລາ​ອອກ​.”

ທ່ານ ​ມາກ ຊວດ​ຕ໌ (Marc Short) ທີ່​ປຶກ​ສາ​ຂອງ​ຮອງ​ປະ​ທາ​ນາ​ທິ​ບໍ​ດີ ທ່ານ​ໄມ​ຄ໌ ເພັ​ສ ໄດ້​ອອກ​ມາ​ປົກ​ປ້ອງ​ທ່ານ​ບາ ໃນ​ການ​ໃຫ້​ສຳ​ພາດ​ກັບ​ອົງ​ການ​ຂ່າວ CNN ໃນ​ວັນ​ອາ​ທິດ​ວານນີ້ ໂດຍ​ກ່າວ​ວ່າ ທ່ານ​ບາ “ໄດ້​ກ່າວ​ວ່າ ທ່ານ​ປະ​ທາ​ນາ​ທິ​ບໍ​ດີ ບໍ່​ໄດ້​ໂທ​ຫາ​ທ່ານ​ໂດຍ​ກົງ ເພື່ອວໃຫ້ເຮັດ​ສິ່ງ​ເຫຼົ່າ​ນີ້.”

ໂຄ​ສົກ​ຂອງ​ກະ​ຊວງ​ຍຸ​ຕິ​ທຳ ໄດ້​ປະ​ຕິ​ເສດ​ທີ່​ຈະ​ໃຫ້​ຄວາມ​ເຫັນ ກ່ຽວ​ກັບ​ໜັງ​ສື​ສະ​ບັບ​ດັ່ງ​ກ່າວ​ຂອງ​ບັນ​ດາ​ອະ​ດີດ​ໄອ​ຍະ​ການ.

ຫລັງ​ຈາກ​ທີ່​ທ່ານ​ບາ ໄດ້​ເຂົ້າ​ແຊກ​ແຊງ​ໃນ​ຄະ​ດີ​ດັ່ງ​ກ່າວ​ແລ້ວ ທ່ານ​ທ​ຣຳ ກໍ​ໄດ້​ຍົກ​ຍ້ອງ​ທ່ານ​ໃນ​ທວີດ​ເຕີ້ ໂດ​ຍ​ກ່າວ​ວ່າ “ຂໍ​ຊົມ​ເຊີຍ​ຕໍ່​ລັດ​ຖະ​ມົນ​ຕີ​ກະ​ຊວງ​ຍຸ​ຕິ​ທຳ ທ່ານ​ບີ​ລ ບາ ສຳ​ລັບ​ການເຂົ້າ​ໄປ​ຮັບ​ຜິດ​ຊອບກ່ຽວ​ກັບ​ຄະ​ດີ​ທີ່​ວ່າ ຄວບ​ຄຸມບໍ່​ໄດ້ເລີຍ ແລະບາງ​ທີ ບໍ່​ຄວນ​ນຳ​ຄະ​ດີ​ຂຶ້ນ​ມາ​ເລີຍ.” ​ບັນ​ດາໄອ​ຍະ​ການ 4 ທ່ານ​ ຜູ້​ທີ່​ໄດ້​ແນະ​ນຳ​ການ​ລົງ​ໂທດ​ຕໍ່​ທ່ານ​ສ​ໂຕນ ກໍ​ໄດ້​ພາ​ກັນ​ລາ​ອອກ​ຈາກ​ຄະ​ດີນີ້ ພາຍຫຼັງ​ຈາກ​ທີ່ທ່ານ​ບາ ໄດ້​ເຂົ້າກຳ​ກັບ.


ອ່ານ​ຂ່າວນີ້​ຕື່ມ ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG