ຜູ້ພິພາກສາຄົນນຶ່ງ ກ່າວຫາ ອະດີດນາຍົກລັດຖະມົນຕີ ປອກຕຸຍການ ທ່ານ Jose Socrates ວ່າ ສໍ້ລາດບັງຫລວງ ແລະສັ່ງໃຫ້ກັກຂັງທ່ານ ເພື່ອລໍຖ້າການຕັດສິນຂັ້ນສຸດທ້າຍວ່າ ທ່ານຈະຖືກດຳເນີນຄະດີຫລືບໍ່.
ຜູ້ພິພາກສາ ທ່ານ Carlos Alexandre ກ່າວໃນວັນຈັນວານນີ້ວ່າ ມີຫລັກຖານພຽງພໍ ກ່ຽວກັບການສໍ້ໂກງພາສີ ແລະການຟອກເງິນ ທີ່ຈະຈັບທ່ານ Socrates ໃນຖານສົງໄສກະທຳຄວາມຜິດ.
ຄະນະໄອຍະການສານ ບັດນີ້ຈະທຳການສືບສວນຕໍ່ໄປ ກ່ອນທີ່ຈະຕັ້ງຂໍ້ຫາຢ່າງເປັນທາງການ.
ຫລັງຈາກນັ້ນ ຜູ້ພິພາກສາຈຶ່ງຈະຕັດສິນວ່າ ຈະດຳເນີນຄະດີທ່ານ Sacrates ຫລືບໍ່.
ຕຳຫລວດໄດ້ຈັບ ທ່ານ Socrates ອາຍຸ 57 ປີ ຢູ່ທີ່ສະໜາມບິນນະຄອນ Lisbon ໃນວັນສຸກແລ້ວນີ້ ໃນຂະນະທີ່ທ່ານກັບມາຈາກນະຄອນປາຣີ.
ທ່ານ Socrates ໄດ້ໄປຢູ່ທີ່ປະເທດຝຣັ່ງ ນັບແຕ່ໄດ້ລາອອກຈາກຕຳແໜ່ງໃນປີ 2011.
ບັນດາເຈົ້າໜ້າທີ່ໄດ້ປະຕິເສດບໍ່ຍອມໃຫ້ລາຍລະອຽດໃດໆແລະມັນບໍ່ເປັນທີ່ແຈ້ງຂາວເທື່ອ ວ່າ ການສືບສວນທີ່ຮູ້ກັນໃນນາມ “ການປະຕິບັດງານ Marquis” ແມ່ນມີສ່ວນພົວພັນກັບເວລາທີ່ທ່ານ Sacrates ດຳລົງຕຳແໜ່ງເປັນນາຍົກລັດ ຖະມົນຕີ ແຕ່ປີ 2005 ຫາປີ 2011 ຫລືບໍ່.
