ຜູ້ຊາຍຈາກລັດຟລໍຣິດາຄົນນຶ່ງທີ່ມີປະຫວັດໃນການກໍ່ອາຊະຍາກຳມາເປັນເວລາຫຼາຍທົດສະວັດ ໄດ້ຖືກຈັບ ແລະກ່າວຫາ ໃນວັນສຸກວານນີ້ ຖານສົ່ງຫໍ່ ທີ່ບັນຈຸອຸບປະກອນລະເບີດ ຢ່າງໜ້ອຍ 13 ຫໍ່ ໄປໃຫ້ຜູ້ຕ້ອງຕິ ປະທານາທິບໍດີດໍໂນລທຣຳ ອີງຕາມການເປີດເຜີຍຂອງເຈົ້າໜ້າທີ່.
ລັດຖະມົນຕີກະຊວງຍຸຕິທຳສະຫະລັດ ທ່ານແຈັຟ ແຊັສຊັນສ໌ ກ່າວຕໍ່ພວກນັກຂ່າວວ່າ ທ້າວຊີຊາ ຊາຢັອກ ອາຍຸ 56 ປີ ຈາກເມືອງອາເວັນຕູຣາໃນລັດຟລໍຣິດາ ໄດ້ຖືກຟ້ອງໃນຖານກໍ່ອາຊະຍາກຳ 5 ກະທົງຂອງລັດຖະບານກາງຮວມທັງການສົ່ງອຸບປະກອນລະເບີດ ຢ່າງຜິດກົດໝາຍ ແລະຂົ່ມຂູ່ເຈົ້າໜ້າທີ່ລັດຖະບານ. ທ່ານກ່າວຕື່ມວ່າ ທ້າວຊາຢັອກປະເຊີນກັບການຕິດຄຸກ 48 ປີ ຖ້າຫາກຖືກພົບເຫັນວ່າມີຄວາມຜິດ.
ລະເບີດທໍ່ທີ່ເຮັດຂຶ້ນເອງໄດ້ຖືກສົ່ງໄປຫາອະດີດປະທານາທິບໍດີ ບາຣັກ ໂອບາມາ ຕະຫຼອດທັງເຈົ້າໜ້າທີ່ຄົນສຳຄັນອື່ນໆຂອງພັກເດໂມແຄຣັດ ລວມມີອະດີດລັດຖະມົນຕີການຕ່າງປະເທດ ຮິລລາຣີ ຄລິນຕັນ ອະດີດລັດຖະມົນຕີກະຊວງຍຸຕິທຳສະຫະລັດ ສະມາຊິກລັດຖະສະພາຂອງພັກເດໂມແຄຣັດ 2 ທ່ານແລະອະດີດຫົວໜ້າອົງການສືບລັບຊີໄອເອ ທ່ານຈອນ ເບຣັນແນນ.
ຜູ້ອຳນວຍການອົງການສັນຕິບານກາງ ຫຼືແອັຟບີອາຍຂອງສະຫະລັດ ທ່ານຄຣິສຕົບເຟີ ເວຣ ກ່າວຕໍ່ກອງປະຊຸມຖະແຫຼງຂ່າວ ດຽວກັນນີ້ວ່າ ລະເບີດທີ່ເຮັດເອງ 13 ລູກ ໄດ້ຖືກສົ່ງໃນຫໍ່ ຊຶ່ງໃນແຕ່ລະຫໍ່ນັ້ນ ແມ່ນມີທໍ່ທີ່ຍາວ 6 ນິ້ວ ໂມງນ້ອຍໜ່ວຍນຶ່ງ ແລະວັດຖຸທີ່ອາດເປັນດິນລະເບີດ.
ທ່ານເວຣ ກ່າວວ່າ “ສິ່ງເຫຼົ່ານີ້ ບໍ່ແມ່ນອຸບປະກອນ ທີ່ຫຼອກລວງ” ແຕ່ກໍໃຫ້ຂໍ້ສັງເກດວ່າ ບໍ່ມີລະເບີດລູກໃດ ໄດ້ແຕກຂຶ້ນ. ເຈົ້າໜ້າທີ່ກ່າວຕໍ່ອົງການຂ່າວເອພີວ່າອຸບປະກອນເຫຼົ່ານີ້ບໍ່ໄດ້ຫ້າງທີ່ຈະໃຫ້ມັນລະເບີດເວລາມີການໄຂຫໍ່ ແຕ່ພວກເຈົ້າໜ້າທີ່ກ່າວວ່າ ພວກເຂົາເຈົ້າຍັງບໍ່ແນ່ໃຈວ່າ ອຸບປະກອນລະເບີດເຫຼົ່ານີ້ໄດ້ເຮັດຂຶ້ນແບບບໍ່ມີຄຸນນະພາບ ຫຼືເປັນຄວາມຕັ້ງໃຈທີ່ຈະບໍ່ໃຫ້ມັນລະເບີດກັນແທ້.
ທ່ານເວຣ ກ່າວຕື່ມວ່າ ອາດຍັງຈະມີການຄົ້ນພົບລູກລະເບີດອື່ນໆຕື່ມອີກ.
ທ່ານເວຣ ກ່າວວ່າ ຮອຍນິ້ວມືທີ່ພົບເຫັນຢູ່ໃນຫໍ່ອັນນຶ່ງ ໄດ້ພາໃຫ້ເຈົ້າໜ້າທີ່ສືບສວນໄປຫາທ້າວຊາຢັອກ. ທ່ານເວົ້າວ່າ ອາດແມ່ນຫຼັກຖານທາງ DNA ໄດ້ຖືກພົບເຫັນໃນຫໍ່ອີກອັນນຶ່ງ.
ທ້າວຊາຢັອກແມ່ນເປັນທີ່ຮູ້ຈັກກັນດີສຳລັບພວກເຈົ້າໜ້າທີ່ປະຕິບັດກົດໝາຍແລະເຄີຍຖືກຈັບມາແລ້ວສິບກວ່າເທື່ອຢູ່ລັດຟລໍຣິດາຮວມທັງການຈັບກຸມໃນປີ 2002ຍ້ອນຂົ່ມຂູ່ຈະວາງລະເບີດ. ຜູ້ກ່ຽວຖືກຈັບເທື່ອທຳອິດ ຢູ່ລັດດັ່ງກ່າວ ເວລາລາວມີອາຍຸ 29 ປີ ໃນຂໍ້ຫາລັກຂະໂມຍ. ສ່ວນຂໍ້ຫາອື່ນໆຕໍ່ຜູ້ກ່ຽວນັ້ນ ແມ່ນຮວມທັງການລັກຂະໂມຍໃຫຍ່ ການສໍ້ໂກງ ແລະຢາຊູກຳລັງຢູ່ໃນຄວາມຄອບຄອງແບບຜິດກົດໝາຍ.
ການຈັບທ້າວຊາຢັອກ ໃນວັນສຸກວານນີ້ ທີ່ເມືອງແພລນເຕຊັ່ນ ລັດຟລໍຣະດາ ປະມານ 30 ໄມລ໌ ຢູ່ທາງເໜືອນະຄອນໄມອາມີນັ້ນ ເຮັດໃຫ້ຄວາມກັງວົນທີ່ມີມາເປັນເວລາເກືອບນຶ່ງອາທິດ ໃນການພົບເຫັນລະເບີດຢ່າງໜ້ອຍນຶ່ງລູກໃນແຕ່ລະມື້ນັ້ນ ສິ້ນສຸດລົງ.
