ນາງ ຈໍແດນ ວາສສາລໂລ ແມ່ນບໍ່ມີຄວາມກະຕືລືລົ້ນ ກ່ຽວກັບ ການປ່ອນບັດເລືອກຕັ້ງປະທານາທິບໍດີເປັນຄັ້ງທຳອິດຂອງລາວສຳລັບປະທານາທິບໍດີ ໂຈ ໄບເດັນ ໃນເດືອນພະຈິກນີ້. ແຕ່ເວລາທີ່ນັກຮຽນປີສຸດທ້າຍຂອງໂຮງຮຽນມັດທະຍົມ ຈູປີເຕີ ໃນລັດ ຟລໍຣິດາ ຄິດ ກ່ຽວກັບ ສິ່ງໆທີ່ລາວເປັນຫ່ວງນັ້ນ, ລາວເວົ້າວ່າຄະແນນສຽງຂອງລາວສຳລັບປະທານາທິບໍດີສັງກັດພັກເດໂມແຄຣັດຄົນປັດຈຸບັນແມ່ນ “ຕົວເລືອກທີ່ເຫັນໄດ້ຊັດgເຈນ.”
ນາງ ວາສສາລໂລ ຈະລົງຄະແນນສຽງສຳລັບການແກ້ໄຂບັດຄະແນນສຽງຕາມລັດຖະທຳມະນູນ ທີ່ຈະປ້ອງກັນລັດ ຟລໍຣິດາ ຈາກການຫ້າມການເຮັດແທ້ງລູກ ກ່ອນທີ່ລູກອ່ອນໃນທ້ອງຈະສາມາດຢູ່ລອດດ້ວຍຕົວມັນເອງ, ເຊິ່ງແທ້ຈິງແລ້ວເປັນມາດຕະຖານທີ່ມີຢູ່ແລ້ວໃນທົ່ວປະເທດ ກ່ອນທີ່ສານສູງສຸດ ສະຫະລັດ ໄດ້ຍົກເລີກການປົກປ້ອງກັນເຮັດແທ້ງລູກຕາມລັດຖະທຳມະນູນ ແລະ ເຮັດໃຫ້ລັດ ເປັນຜູ້ຕັດສິນ ກ່ຽວກັບ ບັນຫາດັ່ງກ່າວເອງ.
ການຮັບຜ່ານການແກ້ໄຂດັ່ງກ່າວ ຈະລຶບກົດໝາຍການເຮັດແທ້ງລູກ 6 ອາທິດຂອງລັດ ຟລໍຣິດາ ອອກໄປ, ເຊິ່ງນາງ ວາສສາລໂລ ເວົ້າວ່າມັນບໍ່ສາມາດເຂົ້າໃຈໄດ້.
ນາງກ່າວວ່າ “ຄົນສ່ວນຫຼາຍບໍ່ຮູ້ວ່າເຂົາເຈົ້າຖືພາໃນ 6 ອາທິດທຳອິດ.”
ທ່ານ ໄບເດັນ, ເຖິງແມ່ນນາງຈະບໍ່ເວົ້າເຖິງກໍຕາມ, ຈະໄດ້ຮັບຄະແນນສຽງຂອງນາງດ້ວຍ.
ໃນລັດ ຟລໍຣິດາ ແລະ ທົ່ວປະເທດ, ບັນດາຜູ້ລົງຄະແນນສຽງໃນກຸ່ມອາຍຸຂອງນາງ ວາສສາລໂລ ອາດພິສູດໃຫ້ເຫັນຈຸດສຳຄັນໃນການເລືອກຕັ້ງປີ 2024, ຈາກຕຳແໜ່ງປະທານາທິບໍດີເຖິງການແກ້ໄຂບັດຄະແນນສຽງ ແລະ ການແຂ່ງຂັນເລືອກຕັ້ງທີ່ຈະພິຈາລະນາວ່າ ຜູ້ໃດຈະຄວບຄຸມລັດຖະສະພາ. ມີຄວາມເປັນໄປໄດ້ວ່າ ນາງຈະເປັນນຶ່ງໃນຜູ້ທີ່ມີສິດລົງຄະແນນສຽງໃໝ່ຫຼາຍກວ່າ 8 ລ້ານຄົນໃນເດືອນພະຈິກນີ້ ນັບຕັ້ງແຕ່ການເລືອກຕັ້ງປີ 2022 ເປັນຕົ້ນມາ, ອີງຕາມສູນກາງເພື່ອຂໍ້ມູນ ແລະ ການຄົ້ນຄວ້າ ກ່ຽວກັບ ການຮຽນຮູ້ ແລະ ການພົວພັນພົນລະເຮືອນຂອງມະຫາວິທະຍາໄລ ທັຟສ໌ (Tufts.)
ຟໍຣັມສະແດງຄວາມຄິດເຫັນ