ຄວາມອຶດຫິວ ແມ່ນເປັນຄວາມກັງວົນເປັນຫ່ວງອັນຮີບດ່ວນຂອງໂລກ. ປີກາຍນີ້ ຈຳນວນຄົນທ່ີປະສົບກັບຄວາມອຶດຫິວຢ່າງຊ້ຳເຮື້ອ ມີສູງກວ່າ 1 ພັນລ້ານຄົນ. ການພັດທະນາການກະເສດແມ່ນ ເປັນແປ້ນຢັນ ສຳລັບການພັດທະນາເສຖກິດໃນຂອບເຂດທີ່ກ້ວາງຂວາງກ່ວາ ແລະຄວາມໝັ້ນຄົງທາງດ້ານອາຫານ ແມ່ນເປັນພື້ນຖານສຳລັບສັນຕິພາບແລະໂອກາດ. ວິໄສທັດຂອງສະຫະລັດ ສຳລັບໂລກມະນຸດທີ່ມີຄວາມສະງົບສຸກຫລາຍຂຶ້ນນັ້ນ ແມ່ນແນໃສ່ເສີມສ້າງຄວາມອຸດົມຮ່ັງມີ ໂດຍການຍົກສູງການພັດທະນາ ໃຫ້ເປັນພາກສ່ວນນ່ຶງຂອງນະໂຍບາຍຕ່າງ ປະເທດຂອງອະເມຣິກາ.
ເພ່ືອມຸ່ງໄປສູ່ເປົ້າໝາຍດ່ັງກ່າວນີ້ ສະຫະລັດໄດ້ເຜີຍແຜ່ຍຸດທະສາດ ຂອງຕົນ ສຳລັບຄວາມໝັ້ນຄົງດ້ານອາຫານການກິນ ຊ່ຶງໄດ້ວາງອອກໂດຍສັງເຂບ ຢູ່ໃນໂຄງການທີ່ເອີ້ນວ່າ ຫລັກຊີ້ນຳການລ້ຽງດູອະນາຄົດ ທ່ີມີຊ່ືໃນພາສາອັງກິດວ່າ Feed the Future Guide. ຜ່ານການໂຄງການທີ່ວ່ານີ້ ສະຫະລັດຈະລົງທຶນ 3 ພັນ 5 ຮ້ອຍລ້ານ $ ໃນໄລຍະ 3 ປີ ຂ້າງໜ້າ ເພ່ືອຍົກລະດັບບົດບາດຂອງການກະເສດແລະໂພຊະນາການ ຢູ່ໃນຄວາມພະຍາຍາມດ້ານການພັດທະນາຂອງພວກເຮົາ ທັງເພ່ືອຫຼຸດຜ່ອນຄວາມຫິວໂຫຍ ແລະຄວາມບໍ່ໝັ້ນຄົງດ້ານອາຫານ. ນອກຈາກນີ້ ກໍຍັງມີອີກ 18 ພັນລ້ານ 5 ແສນ $ ທ່ີໄດ້ໃຫ້ຄຳໝັ້ນສັນຍາໄວ້ ໂດຍຜູ້ບໍຣິຈາກຕ່າງໆໃນທົ່ວໂລກ ເພ່ືອອູ້ມຊູເປົ້າ ໝາຍດຽວກັນນີ້.
ເພ່ືອໃຫ້ບັນລຸຜົນດ່ັງກ່າວນີ້ ໂຄງການ Feed the Future ແມ່ນຈະຫາທາງນຳເອົາຊັບພະຍາກອນຕ່າງໆ ມາໃຊ້ຮ່ວມກັນໃນແຜນການ ທີ່ປະເທດຕ່າງໆເປັນເຈົ້າຂອງແລະພັດທະນາຂຶ້ນມາເອງ ທັງຈະສົ່ງເສີມການຮ່ວມງານ ທ່ີຍືນຍົງຖາວອນ ແລະມີຫຼາຍຝ່າຍປະ ກອບສ່ວນ ໂດຍສະເພາະແລ້ວ ກໍແມ່ນໃນລະຫວ່າງສັງຄົມພົນລະເຮືອນ, ພາກສ່ວນເອກກະຊົນ, ແລະລັດຖະບານນຳ ເພ່ືອຫຼຸດຜ່ອນຄວາມອຶດຫິວແລະຄວາມທຸກຈົນ. ໂດຍຜ່ານການລົງທຶນເຫຼົ່ານີ້ ຢູ່ໃນ ປະເທດຕ່າງໆ ທີ່ມີຈຳນວນຈຳກັດ ແລະເປັນຈຸດເພັ່ງເລງພິເສດນັ້ນ ໂຄງການ Feed the Future ນີ້ ຈະຊ່ອຍໃຫ້ພວກປະເທດດ່ັງກ່າວບັນລຸການເຕີບໃຫຽ່ ທ່ີຍືນຍົງແລະນຳພາໂດຍພາກສ່ວນການກະເສດ.
ລວມຢູ່ໃນແຜນການເຫລົ່ານີ້ ຈະມີການສະນັບສະໜູນແມ່ຍິງໃຫ້ເປັນຜູ້ຜະລິດດ້ານການກະເສດ ທັງເປັນຜູ້ມີບົດບາດສຳຄັນໃນການສ້າງຄວາມໝັ້ນຄົງດ້ານອາຫານ. ພວກແມ່ຍິງພາກັນຜະລິດອາຫານໄດ້ ໃນລະຫວ່າງ 60 ຫາ 80 ເປີເຊັນໃນຫຼາຍໆປະເທດພວມພັດທະນາ. ແລະໃນເມື່ອພວກແມ່ຍິງເປັນຜູ້ຄວບຄຸມລາຍໄດ້ ພວກເຂົາເຈົ້າກໍມີທ່າທາງຫຼາຍກວ່າພວກຜູ້ຊາຍ ທີ່ຈະໃຊ້ສອຍສິ່ງທ່ີໄດ້ມານັ້ນ ເພ່ືອປັບປຸງສຸຂະພາບຂອງຄອບຄົວ, ການສຶກສາ ແລະດ້ານການກິນທ່ີດີ. ດ່ັງນັ້ນ ຈຸດເພັ່ງເລັງຈຸດນຶ່ງຂອງໂຄງການ Feed the Future ນີ້ ກໍຈະແມ່ນຜົນລະປູກ ເຊັ່ນມັນດ້າງແລະພືດຜັກຕ່າງໆ ທີ່ສາມາດຍົກລະດັບຖານະຂອງພວກແມ່ຍິງ ຕະຫລອດທັງຜົນຜະລິດແລະລາຍຮັບຂອງພວກເຂົາເຈົ້າ.
ການລົງທຶນໃສ່ຄວາມສາມາດຜະລິດດ້ານການກະເສດ ພ້ອມກັບການປັບປຸງຕລາດໃຫ້ດີຂຶ້ນ ແລະການຄົ້ນຄວ້າໃໝ່ ຈະເພ່ີມທະວີສະບຽງອາຫານ ທັງຈະເຮັດໃຫ້ລາຄາຖືກລົງ ສຳລັບຜູ້ຄົນເປັນ ຈຳນວນລ້ານໆຄົນໃນທົ່ວໂລກ. ໂຄງການ Feed the Future ຈະທຸ່ມເທເງິນທຶນຂອງຕົນຢ່າງໜ້ອຍ 9 ເປີເຊັນ ໃສ່ການສຶກສາຄົ້ນຄວ້າ. ຜົນຂອງຄວາມໝາຍໝັ້ນດ່ັງກ່າວນີ້ ຈະທວີຄູນຂຶ້ນໂດຍການປະກອບ ສ່ວນ ຂອງພວກປະເທດເຈົ້າພາບ, ພາກສ່ວນເອກກະຊົນ, ແລະການລົງທຶນຂອງເພື່ອນຮ່ວມງານອື່ນໆ. ເມື່ອມີຫຼາຍໆປະເທດ, ຫຼາຍໆທຸຣະ ກິດ, ແລະຫຼາຍໆອົງການ ຮ່ວມງານກັນ ເປົ້າໝາຍຮ່ວມຂອງພວກເຮົາໃນການຫຼຸດຜ່ອນລົງໃຫ້ໄດ້ຢ່າງໃຫຽ່ຫຼວງ ຈໍານວນຜູ້ຕາຍ ໃນແຕ່ລະມື້ ຍ້ອນບໍ່ມີອາຫານການກິນນັ້ນ ກໍຈະບໍ່ຢູ່ໄກເກີນເອື້ອມ.
