ອົງການ FBI ກ່າວໃນວັນອາທິດມື້ນີ້ວ່າ ຕົນໄດ້ລະບຸໂຕຜູ້ຕ້ອງສົງໄສຄົນນຶ່ງ ແຕ່ຍັງບໍ່ທັນໄດ້ກໍານົດເຖິງແຮງຈູງໃຈໃນການພະຍາຍາມລອບສັງຫານອະດີດປະທານາທິບໍດີ ສະຫະລັດ ທ່ານ ດໍໂນລ ທຣຳ ໃນວັນເສົາວານນີ້, ເຊິ່ງເປັນການກະທຳທີ່ມີຄວາມຮຸນແຮງທີ່ສຸດກ່ຽວກັບການເມືອງຂອງສະຫະລັດໃນຮອບຫຼາຍທົດສະວັດ.
ໜ່ວຍງານຮັກສາກົດໝາຍກ່າວວ່າ ທ້າວ ໂທມັສ ແມັດທິວ ຄຣຸກ (Thomas Matthew Crooks) ອາຍຸ 20 ປີ, ເປັນປະຊາຊົນຊາວເມືອງ ເບເທລ ພາກ (Bethel Park), ລັດເພັນຊີລເວເນຍ, ແມ່ນ “ຜູ້ທີ່ເປັນຫົວຂໍ້ກ່ຽວພັນ” ໃນເຫດການຍິງອະດີດປະທານາທິບໍດີ, ເຊິ່ງເກີດຂຶ້ນໃນລະຫວ່າງການໂຮມຊຸມນຸມທາງດ້ານການເມືອງຢູ່ບໍລິເວນຊານເມືອງໃກ້ກັບນະຄອນພິດສເບີກ.
ທ້າວ ຄຣຸກ ເຄີຍລົງທະບຽນໃຫ້ພັກຣີພັບບລີກັນ ແຕ່ເມື່ອບໍ່ດົນມານີ້ລາວຍັງໄດ້ບໍລິຈາກເງິນທາງການເມືອງ 15 ໂດລາໃຫ້ແກ່ກຸ່ມເສລີນິຍົມ, ອີງຕາມບັນທຶກຂອງຜູ້ລົງຄະແນນສາທາລະນະ ທີ່ໄດ້ຮັບການອ້າງອີງໂດຍສື່ມວນຊົນຈໍານວນນຶ່ງ.
ມີຜູ້ເຂົ້າຮ່ວມຟັງເສຍຊີວິດຢ່າງໜ້ອຍນຶ່ງຄົນ, ແລະອີກສອງຄົນໄດ້ຮັບບາດເຈັບສາຫັດໃນເຫດການຍິງດັ່ງກ່າວ, ເຊິ່ງໄດ້ເກີດຂຶ້ນຢູ່ສະຖານທີ່ກາງແຈ້ງຂະໜາດໃຫຍ່ທີ່ບໍ່ໄດ້ມີຫຍັງປົກປິດ ໃນເຂດຊົນນະບົດ.
ປະມານຫົກນາທີຫຼັງຈາກ ທ່ານ ທຣໍາ ຂຶ້ນເວທີປາໄສ, ສຽງປືນຫຼາຍນັດກໍດັງຂຶ້ນ, ເຮັດໃຫ້ອະດີດປະທານາທິບໍດີເອົາມືຈັບຫູເບື້ອງຂວາຂອງເພິ່ນໃນທັນທີ ແລະ ຈາກນັ້ນກໍໝູບລົງບັງໂຕະປາໄສ ກ່ອນທີ່ທ່ານຈະຖືກອ້ອມຮອບໂດຍບັນດາເຈົ້າໜ້າທີ່ສືບລັບ.
ຢູ່ໃນໂພສຂອງສື່ສັງຄົມ, ທ່ານ ທຣໍາ ກ່າວວ່າ ທ່ານ “ສະບາຍດີ” ຫຼັງຈາກຖືກຍິງດ້ວຍລູກປືນທີ່ເຈາະເຂົ້າໄປໃນສ່ວນເທິງຂອງຫູເພິ່ນ, ເຊິ່ງ ທ່ານອອກຈາກໂຮງໝໍໃນຕອນແລງຂອງວັນເສົາວານນີ້.
In Photos: Trump whisked from stage at rally following apparent assassination attempt
ໃນຕອນເຊົ້າຂອງວັນອາທິດ, ໃນຂໍ້ຄວາມທີ່ຂຽນລົງໃນສື່ສັງຄົມອີກຄັ້ງນຶ່ງ, ທ່ານ ທຣໍາ ກ່າວວ່າ “ຂອບໃຈທຸກໆຄົນສໍາລັບຄວາມຄິດເຖິງ ແລະການອະທິຖານຂອງພວກທ່ານໃນມື້ວານນີ້, ເນື່ອງຈາກວ່າເປັນພຣະເຈົ້າພຽງຜູ້ດຽວທີ່ປ້ອງກັນບໍ່ໃຫ້ສິ່ງທີ່ບໍ່ຄາດຄິດເກີດຂຶ້ນ. ພວກເຮົາຈະບໍ່ຢ້ານກົວ, ແຕ່ກົງກັນຂ້າມ ພວກເຮົາຈະຍັງຄົງຢູ່ໃນຄວາມເຊື່ອຂອງພວກເຮົາ ແລະຕໍ່ຕ້ານ ເພື່ອປະເຊີນກັບຄວາມຊົ່ວຮ້າຍນັ້ນ.”
ທ່ານ ທຣໍາ ກ່າວວ່າ ທ່ານຫວັງວ່າຈະເວົ້າກັບປະຊາຊົນທົ່ວປະເທດໃນວັນພະຫັດ ຢູ່ທີ່ກອງປະຊຸມແຫ່ງຊາດຂອງພັກຣີພັບບລີກັນຈາກເມືອງມີລວອກກີ້, ລັດວິສຄອນຊິນ, ທີ່ຕັ້ງຢູ່ທາງພາກຕາເວັນຕົກຕອນກາງຂອງສະຫະລັດ, ໃນຖານະທີ່ທ່ານໄດ້ຖືກແຕ່ງຕັ້ງໃຫ້ເປັນຜູ້ລົງສະໝັກເລືອກຕັ້ງປະທານາທິບໍດີຢ່າງເປັນທາງການສໍາລັບຮອບເລືອກຕັ້ງທີສາມຕິດຕໍ່ກັນ.
ອີງຕາມການກ່າວຂອງຜູ້ເຫັນເຫດການ ແລະວິດີໂອທີ່ຖືກເຜີຍແຜ່ທາງອິນເຕີເນັດເຫັນວ່າ ຜູ້ທີ່ທໍາການຍິງນັ້ນ ຖືປືນຍາວ ແລະຄານຂຶ້ນເທິງຫລັງຄາຂອງຕຶກອາຄານທີ່ຢູ່ໃກ້ຄຽງພຽງບໍ່ເທົ່າໃດນາທີ ກ່ອນທີ່ຈະຍິງປືນອອກໄປ. ບັນດາຜູ້ຢືນເບິ່ງການກ່າວຄຳປາໄສຫຼາຍຄົນສາມາດໄດ້ຍິນສຽງຮ້ອງໃນຄວາມພະຍາຍາມເພື່ອໃຫ້ໄດ້ຄວາມສົນໃຈຈາກເຈົ້າໜ້າທີ່ຕໍາຫຼວດ, ຜູ້ທີ່ຫຼັງຈາກນັ້ນ ໄດ້ຍິງປືນໃສ່ ແລະສັງຫານຜູ້ຕ້ອງສົງໄສ.
ເຫດການດັ່ງກ່າວ ສົ່ງຜົນເຮັດໃຫ້ມີຫຼາຍຄຳຖາມກ່ຽວກັບລະດັບການປົກປ້ອງທີ່ອົງການສືບລັບສະໜອງໃຫ້ ທ່ານ ທຣໍາ.
ບັນດາຜູ້ນຳພັກຣີພັບບລີກັນໃນສະພາຕໍ່າກ່າວວ່າ ພວກເຂົາເຈົ້າຈະດໍາເນີນ “ການສືບສວນຢ່າງເຕັມອັດຕາ” ກ່ຽວກັບເຫດການດັ່ງກ່າວ ແລະໄດ້ຂໍໃຫ້ຜູ້ອຳ ນວຍການອົງການສືບລັບ ທ່ານນາງ ຄິມເບີລີ ຊີໂທລ (Kimberly Cheatle) ເຂົ້າຮ່ວມຮັບຟັງຄະດີດັ່ງກ່າວນີ້ນໍາອີກດ້ວຍ.
ໃນຈົດໝາຍສະບັບນຶ່ງທີ່ໂພສລົງສື່ສັງຄົມ X ຫຼື Twitter ໃນເມື່ອກ່ອນ ໃນຕອນແລງຂອງວັນເສົາວານນີ້, ຄະນະກຳມາທິການສະພາຕ່ຳທີ່ນຳພາໂດຍພັກຣີພັບບລີກັນກ່າວວ່າ “ຊາວອາເມຣິກັນ ຕ້ອງການຄຳຕອບກ່ຽວກັບຄວາມພະຍາຍາມລອບສັງຫານປະທານາທິບໍດີ ທຣໍາ.”
ທ່ານ ອາເລັກສ໌ ເກຣ (Alex Gray), ອະດີດເຈົ້າ ໜ້າທີ່ໃນສະພາຄວາມໝັ້ນ ຄົງແຫ່ງຊາດຂອງ ທ່ານ ທຣໍາ ກ່າວວ່າ ເຫດການຍິງກັນສະແດງໃຫ້ເຫັນວ່າ ການປົກປ້ອງຂອງໜ່ວຍຕຳຫຼວດລັບສໍາລັບ ທ່ານ ທຣໍາ ແມ່ນ “ອ່ອນຫຼາຍເມື່ອທຽບກັບການຂົ່ມຂູ່ທີ່ທ່ານກໍາລັງປະເຊີນຢູ່.”
ທ່ານ ເກຣ ກ່າວວ່າ “ພວກເຂົາເຈົ້າຕ້ອງຍົກລະດັບລາຍລະອຽດຂອງທ່ານສູ່ລະດັບເຕັມຮູບແບບທີ່ສຸດເທົ່າທີ່ເປັນໄປໄດ້ ທີ່ເໝາະສົມກັບປະທານາທິບໍດີໃນທັນທີ, ແລະບໍ່ແມ່ນແຕ່ອະດີດປະທານາທິບໍດີ, ແຕ່ລວມທັງປະທານາທິບໍດີໃນປັດຈຸບັນດ້ວຍ.”
ການໂຄສະນາຂອງ ທ່ານ ໄບເດັນ ຍັງໄດ້ກ່າວໃນຖະແຫຼງການວ່າ ມັນກໍາລັງ “ໂຈະການສື່ສານນອກສະຖານທີ່ທັງຫມົດ ແລະເຮັດວຽກເພື່ອທໍາການໂຄສະນາທາງໂທລະພາບຂອງພວກເຮົາໃຫ້ໄວເທົ່າທີ່ຈະໄວໄດ້.”
ບັນດານັກວິເຄາະໄດ້ອອກມາເຕືອນກ່ຽວກັບຄວາມພະຍາຍາມໃນການລອບສັງຫານ ອາດປ່ຽນການໂຄສະນາຫາສຽງສໍາລັບປະທານາທິບໍດີ ໃຫ້ກາຍມາປະທະກັນຢ່າງຮຸນແຮງ, ໂດຍເພີ້ມທະວີຄວາມເຄັ່ງຕຶງທາງສໍານວນການເມືອງຮ້ອນແຮງຂຶ້ນ, ແລະເປັນການແບ່ງແຍກທາງສັງຄົມອາເມຣິກາອອກໄປອີກ.
ທ່ານ ຈາຄັອບ ແວ (Jacob Ware), ນັກຄົ້ນຄວ້າຢູ່ສະພາພົວພັນການຕ່າງປະເທດກ່າວວ່າ “ນີ້ແມ່ນມື້ທີ່ມືດມົນແບບບໍ່ປົກກະຕິທີ່ສຸດໃນອາເມຣິກາ, ເປັນມື້ທີ່ມືດມົວທີ່ຜິດປົກກະຕິທີ່ສຸດໃນປະຊາທິປະໄຕຂອງພວກເຮົາ. ອາດເປັນການກະທຳທີ່ຮ້າຍແຮງທີ່ສຸດຂອງການກໍ່ຄວາມຮຸນແຮງທາງການເມືອງທີ່ພວກເຮົາໄດ້ເຫັນມາ ຢ່າງໜ້ອຍນັບຕັ້ງແຕ່ວັນທີ 11 ກັນຍາ.”
ທ່ານກ່າວຕໍ່ VOA ວ່າ “ພວກເຮົາກຳລັງເວົ້າເຖິງໄພຂົ່ມຂູ່ລອບສັງຫານຢ່າງຮ້າຍແຮງຕໍ່ອະດີດຜູ້ນໍາໂລກເສລີ ຜູ້ທີ່ດໍາເນີນການໂຄສະນາຫາສຽງເປັນປະທານາທິບໍດີຢ່າງຫ້າວຫັນ, ມັນເປັນຕາຢ້ານຫຼາຍ ແລະຢ້ານກົວແທ້ໆທີ່ຈະຄິດກ່ຽວກັບວ່າ ແມ່ນຫຍັງຈະເປັນບາດກ້າວຕໍ່ໄປຢູ່ໃນເລື່ອງນີ້.”
ສາດສະດາຈານ ເຄຊີ ເບີກາກທ໌ (Casey Burgat) ຈາກມະຫາວິທະຍາໄລ George Washington ກ່າວວ່າ “ໃນມື້ນີ້ ໂລກໄດ້ປ່ຽນແປງແລ້ວ.”
“ຄວາມພະຍາຍາມລອບສັງຫານອະດີດປະທານາທິບໍດີ ທຣຳ ບໍ່ພຽງແຕ່ຈະສົ່ງຜົນສະທ້ອນຢ່າງເລິກເຊິ່ງຕໍ່ການເລືອກຕັ້ງຄັ້ງນີ້ເທົ່ານັ້ນ ແຕ່ຍັງມີຜົນຢ່າງກວ້າງຂວາງຕໍ່ການເມືອງຂອງອາເມຣິການຳອີກດ້ວຍ.”
ທ່ານກ່າວຕື່ມວ່າ “ເຫດການດັ່ງກ່າວ ຈະເຮັດໃຫ້ຄວາມແຕກແຍກຂອງພັກຝ່າຍຄ້ານເລິກລົງຕື່ມອີກ ຂະນະທີ່ຍັງຜັກດັນໃຫ້ມີການສົນທະນາທີ່ແທ້ຈິງກ່ຽວກັບການບັນຍາຍທາງດ້ານການເມືອງ ແລະຄວາມຮຸນແຮງຢູ່ໃນການເມືອງອາເມຣິກາຍຸກໃໝ່.”
ສາດສະດາຈານ ເບີກາດທ໌ ກ່າວວ່າ “ຈະມີການຊີ້ມືໂດຍພັກຝ່າຍຄ້ານກ່ຽວກັບວິທີການ ແລະເປັນຫຍັງສິ່ງນີ້ຈຶ່ງເກີດຂຶ້ນ, ແຕ່ໃນທົ່ວຂອບເຂດຂອງວົງການການເມືອງແລ້ວ, ພວກເຮົາຈະໄດ້ຍິນຢ່າງຖືກຕ້ອງ ກ່ຽວກັບ ການປະຕິເສດຄວາມຮຸນແຮງທາງການເມືອງທັງໝົດ. ຂ້າພະເຈົ້າພຽງແຕ່ສາມາດຫວັງວ່າ ສຸດທ້າຍແລ້ວເຮົາຈະຜ່ານຜ່າຄວາມຫຍຸ້ງຍາກທັງຫຼາຍໄດ້.”
ຟໍຣັມສະແດງຄວາມຄິດເຫັນ