ລມຕ ການເງິນ ຂອງປະເທດ ໃຊ້ເງິນຢູໂຣ ຕົກລົງກັນ ກ່ຽວກັບ Greece

ລັດຖະມົນຕີການເງິນຂອງບັນດາປະເທດທີ່ໃຊ້ເງິນຢູໂຣໄດ້ບັນລຸ
ການຕົກລົງກັບກອງທຶນສາ ກົນ IMF ເພື່ອຫຼຸດຜ່ອນໜີ້ສິນຂອງ
Greece ແລະປ່ອຍເງິນຊ່ອຍເຫຼືອກ້ອນໃໝ່ໃນທັນທີໃນການ
ດຳເນີນຄວາມພະຍາຍາມ ເພື່ອຊ່ອຍ Greece ບໍ່ໃຫ້ລົ້ມລະລາຍ.

ໃນວັນຈັນວານນີ້ ບັນດາເຈົ້າໜີ້ຕ່າງປະເທດຂອງ Greece
ໄດ້ຕົກລົງທີ່ຈະລຸດໜີ້ສິນຂອງປະເທດລົງສູ່ 124% ຂອງຍອດຜະລິດຮວມພາຍໃນ
ຫຼືຈີດີພີ ໃນປີ 2020. ຈຸດປະສົງດັ້ງເດີມນັ້ນ ກໍແມ່ນ 120%. ນອກນັ້ນ Greece ຍັງຈະໄດ້
ຮັບເງິນກູ້ຢືມປະມານ 57 ພັນລ້ານ ໂດລາ.

ປະທານທະນາຄານກາງຢູໂຣບ ທ່ານ Mario Draghi ສະແດງຄວາມຍິນດີກ່ຽວກັບຂໍ້ຕົກ
ລົງດັ່ງກ່າວໂດຍເວົ້າວ່າ ແນ່ນອນມັນຈະຊ່ວຍຫລຸດຜ່ອນຄວາມບໍ່ແນ່ນອນລົງ ແລະເສີມ
ຂະຫຍາຍຄວາມເຊື່ອໝັ້ນຕໍ່ຢູໂຣບແລະຕໍ່ Greece ນຳດ້ວຍ.

ການພົບປະກັນເປັນເວລາ 10 ຊົ່ວໂມງ ໃນກຸງ Brussels ໃນວັນຈັນວານນີ້ ແມ່ນເປັນ
ການພົບປະກັນຄັ້ງທີ 3 ໃນຮອບຫຼາຍອາທິດຜ່ານມາ ທີ່ຄະນະລັດຖະມົນຕີຈາກ 17
ປະເທດໄດ້ພະຍາຍາມທີ່ຈະບັນລຸການຕົກລົງ ເພື່ອຊ່ອຍກອບກູ້ເສດຖະກິດຂອງ
Greece. ກຸງ Athens ກ່າວວ່າ ຕົນຕ້ອງການເງິນດັ່ງກ່າວ ຊຶ່ງເປັນກ້ອນທີສອງຂອງເງິນ
ຊ່ອຍເຫຼືອໃນຮອບ 2 ປີ ເພື່ອຊ່ວຍ Greece ບໍ່ໃຫ້ຜິດສັນຍາໃນພັນທະທາງດ້ານການເງິນ
ຂອງຕົນນັ້ນ.