ບັນດາລັດຖະມົນຕີການເງິນແລະຫົວໜ້າທະນາຄານແຫ່ງຊາດຈາກ 20 ປະເທດທີ່ມີເສດຖະກິດໃຫຍ່ທີ່ສຸດຂອງໂລກກ່າວວ່າ ພວກເຂົາເຈົ້າໄດ້ຕົກລົງກັນ ທີ່ຈະເຄື່ອນໄຫວຢ່າງໄວເພື່ອແກ້ໄຂວິກິດການໜີ້ສິນຂອງ ຢູໂຣບທີ່ກໍາລັງສ້າງຄວາມເສຍຫາຍໃຫ້ແກ່ເສດຖະກິດໂລກໃນເວລານີ້.
ລຸນຫລັງການປະຊຸມຫາລືກັນເປັນເວລາ 2 ມື້ທີ່ກຸງປາຣີ ຊຶ່ງເສັດສິ້ນລົງໃນວັນເສົາວານນີ້ ທ່ານ Francois Baroin ລັດຖະມົນຕີການເງິນຝຣັ່ງປະກາດໃຫ້ຮູ້ວ່າ ເຂດໃຊ້ເງິນຢູໂຣຈະຮ່າງແຜນການຂອງຕົນໃຫ້ສໍາເລັດຢູ່ທີ່ກອງປະຊຸມສະພາຢູໂຣບໃນກຸງ Brussels ໃນວັນທີ 23 ຕຸລານີ້.
ທ່ານ Baroin ກ່າວວ່າ ຝຣັ່ງແລະເຢຍຣະມັນ ສອງເສດຖະກິດໃຫຍ່ຂອງຢູໂຣບໃກ້ຈະບັນລຸຂໍ້ຕົກລົງກັນໄດ້ແລ້ວ ກ່ຽວກັບວ່າຈະປ່ອຍໃຫ້ພວກນັກລົງທຶນພາກເອກະຊົນສູນເສຍເງິນເທ່ົາໃດກ່ຽວກັບພັນທະບັດຂອງກຣິສນັ້ນ.
ການລົດໜີ້ສິນຂອງກຣິສລົງສູ່ລະດັບທີ່ຮັບເອົາໄດ້ຫລາຍຂຶ້ນນັ້ນ ກໍາລັງໂຜ່ໂຕຂຶ້ນມາເປັນປັດໄຈສໍາຄັນອັນນຶ່ງໃນການແກ້ໄຂວິກິດການຂອງເຂດຢູໂຣ.
ຄາດວ່າພວກຜູ້ນໍາປະເທດໃນກຸ່ມ G20 ຈະໃຫ້ການອະນຸມັດຂັ້ນສຸດທ້າຍແກ່ແຜນການດັ່ງກ່າວໃນກອງປະຊຸມສຸດຍອດທີ່ເມືອງ Cannes ໃນເດືອນໜ້ານີ້. ແຜນການດັ່ງກ່າວຈະຮວມທັງບາດກ້າວຕ່າງໆທີ່ເປັນຮູບປະທໍາ ທີ່ແຕ່ລະປະເທດຈໍາເປັນຈະຕ້ອງຮັບເອົາໃນການຊ່ອຍແກ້ໄຂວິກິດການດ້ານການເງິນນີ້.
ທ່ານ Baroin ກ່າວຕື່ມວ່າ ພວກລັດຖະມົນຕີການເງິນພາກັນດໍາເນີນການຢ່າງເດຂາດເພື່ອຮັກສາໄວ້ ຊຶ່ງສະຖຽນລະພາບດ້ານການເງິນ ແລະປ້ອງກັນບໍ່ໃຫ້ເກີດພາວະເສດຖະກິດຕົກຕໍ່າໃນໂລກຂຶ້ນອີກ.
ທ່ານ Timothy Geithner ລັດຖະມົນຕີການເງິນສະຫະລັດກ່າວຕໍ່ບັນ ດານັກຂ່າວວ່າ ທ່ານມີກໍາລັງໃຈຫລາຍຂຶ້ນນໍາການເຄື່ອນໄຫວບັ້ນຫລ້າສຸດຂອງຄະນະນໍາພາຢູໂຣບ ທີ່ໄດ້ບັນລຸຂໍ້ຕົກລົງກ່ຽວກັບແຜນການຮອບດ້ານເພື່ອແກ້ໄຂວິກິດການດັ່ງກ່າວ. ລັດຖະບານກຸງວໍຊິງຕັນເຄີຍຕໍາໜິຕິຕຽນຄະນະນໍາພາຂອງຢູໂຣບສໍາລັບທ່ີຕົນເອີ້ນວ່າ ການຂາດ ການເຄື່ອນໄຫວຂັ້ນເດັດຂາດນັ້ນ.
ທ່ານ Christine Lagarde ຫົວໜ້າກອງທຶນສາກົນຫລື IMF ໄດ້ກ່າວເຕືອນວ່າ ຄວາມ
ອ່ອນແອຂອງບັນດາເສດຖະກິດທີ່ກ້າວໜ້າກໍາລັງເລີ້ມສົ່ງຜົນກະທົບຕໍ່ພວກປະເທດທີ່ກໍາ
ລັງໂຜ່ໂຕຂຶ້ນມາ.
ເບິ່ງວີດີໂອ ລາຍງານກ່ຽວກັບບັນຫາໜີ້ສິນຂອງຢູໂຣບ:
