ແມ່ຊີສູງອາຍຸຄົນນຶ່ງ ຢູ່ໃນລັດ West Bengal ທາງພາກຕາເວັນ
ອອກຂອງອິນເດຍ ໄດ້ຖືກຂົ່ມຂືນສຳເລົາໝູ່ ໂດຍພວກຜູ້ຊາຍ
ກຸ່ມນຶ່ງ ຫຼັງຈາກນາງໄດ້ພະຍາຍາມຢຸດພວກຜູ້ຊາຍດັ່ງກ່າວ ທີ່
ກຳລັງປຸ້ນໂຮງຮຽນສອນສາສະໜາຢູ່ນັ້ນ.
ຕຳຫລວດກ່າວວ່າ ພວກຜູ້ຊາຍ 6 ຄົນ ໄດ້ເຂົ້າໄປໃນໂຮງຮຽນ
ຂອງໂບດ Convent of Jesus and Mary ໃນເມືອງ Ranaghat
ຊຶ່ງຢູ່ໄກ ປະມານ 800 ກິໂລແມັດ ຈາກ Kolkata ເມືອງຫລວງ
ຂອງລັດ West Bengal ໄປທາງກ້ຳຕາເວັນອອກສຽງເໜືອ ເມື່ອ
ຕອນເຊົ້າວັນເສົາວານນີ້. ຍັງບໍ່ມີ ຄົນຮ້າຍຜູ້ໃດ ຖືກຈັບກຸມໄດ້ເທື່ອ.
ແມ່ຊີຄົນດັ່ງກ່າວ ຊຶ່ງຢູ່ໃນໄວ 70 ປີ ກຳລັງນອນຮັກສາພະຍາບານຢູ່ໂຮງໝໍ ໃນອາການ
ສາຫັດ.
ພວກນັກສຶກສາ ພໍ່ແມ່ ແລະ ບັນດານາຍຄູ ທີ່ໂກດແຄ້ນຈຳນວນນຶ່ງ ໄດ້ພາກັນຕັນຖະໜົນ ໃຫຍ່ສາຍນຶ່ງ ແລະ ລາງລົດໄຟ ຢູ່ໃກ້ໆໂບດດັ່ງກ່າວ ໄວ້ເປັນເວລາຫຼາຍຊົ່ວໂມງ ຮຽກຮ້ອງ
ໃຫ້ຕຳຫລວດປະຕິບັດການຢ່າງຮີບດ່ວນ ເພື່ອຈັບກຸມພວກກໍ່ເຫດດັ່ງກ່າວນັ້ນ.
ການໂຈມຕີທຳຮ້າຍດັ່ງກ່າວ ເກີດຂຶ້ນໃນເວລາ ທີ່ມີຄວາມກັງວົນເພີ້ມ ຂຶ້ນເລື້ອຍໆ ກ່ຽວກັບ ການກະທຳຄວາມຮຸນແຮງທາງເພດ ຕໍ່ພວກແມ່ຍິງໃນອິນເດຍ.
ເມື່ອຕົ້ນເດືອນນີ້ ອິນເດຍໄດ້ຫ້າມການນຳອອກສາຍຮູບເງົາເລື້ອງ India’s Daughter
ທີ່ອິງໃສ່ເລື້ອງການຂົ່ມຂືນສຳເລົາໝູ່ ຜູ້ຍິງໄວ 23 ປີຄົນນຶ່ງ ທີໄດ້ຖືກຂ້າຕາຍ ໃນນະຄອນ Delhi ເມື່ອປີ 2012 ແລະ ຍັງໄດ້ຂໍຮ້ອງໃຫ້ເວັບໄຊ YouTube ທີ່ເຜີຍແຜ່ວີດີໂອນັ້ນ ໃຫ້ເອົາລິ້ງເຊື່ອມຕໍ່ ວີດີໂອເລື້ອງຮູບເງົາດັ່ງກ່າວອອກຈາກເວັບໄຊ.
ລັດຖະບານອິນເດຍກ່າວວ່າ ຕົນໄດ້ຫ້າມຮູບເງົາດັ່ງກ່າວ ບົນພື້ນຖານທີ່ວ່າ ອາດເປັນເຊື້ອ
ໄຟ ກໍ່ໃຫ້ມວນຊົນເກີດຄວາມໂກດແຄ້ນ ເພາະວ່າຢູ່ໃນຮູບເງົານັ້ນ ມີການສຳພາດກັບທ້າວ Mukesh Singh ຊຶ່ງເປັນຊາຍຄົນນຶ່ງ ໃນຈຳນວນ 6 ຄົນ ຜູ້ທີ່ໄດ້ຂົ່ມຂືນນັກສຶກສາຍິງຄົນນັ້ນ.
ຢູ່ໃນຮູບເງົານັ້ນ ທ້າວ Singh ບອກກັບ ນັກຖ່າຍຮູບເງົາ ຂອງ BBC ວ່າ “ຜູ້ຍິງ ແມ່ນມີ
ຄວາມຮັບຜິດຊອບ ຫຼາຍກວ່າຜູ້ຊາຍ ສຳຫລັບການ ຂົ່ມຂືນ.”
ຫຼາຍມື້ຫຼັງຈາກການຫ້າມສາຍຮູບເງົາ ຫຼາຍພັນຄົນໄດ້ບຸກເຂົ້າໄປໃນຄຸກທີ່ມີການປ້ອງກັນ
ໄພສູງ ຢູ່ທາງພາກຕາເວັນອອກສຽງເໜືອຂອງອິນເດຍ ແລ້ວລາກເອົາຜູ້ຕ້ອງສົງໄສທຳ
ການຂົ່ມຂືນສຳເລົາຄົນນຶ່ງອອກມາ ແລະ ທຸບຕີຜູ້ກ່ຽວຈົນເສຍຊີວິດ.
ວີດີໂອ ກ່ຽວກັບຮູບເງົາສາລະຄະດີ ເລື້ອງ India’s Daughter:
