ພວກທະຫານອີຈິບໄດ້ທໍາການຕໍ່ສູ້ກັນເລັກໆນ້ອຍໆກັບພວກປະທ້ວງນິຍົມປະຊາທິປະໄຕ
ທີ່ຈະຕຸລັດ Tahrir ໃນກຸງໄຄໂຣ ຂະນະທີ່ພວກເຂົາເຈົ້າພະຍາຍາມຍົກຍ້າຍພວກປະທ້ວງ
ອອກຈາກຖະໜົນຫົນທາງເພື່ອໃຫ້ການສັນຈອນໄປມາກັບຄືນສູ່ສະພາບປົກກະຕິ ຫລັງຈາກ
ການລຸກຮືຂຶ້ນທີ່ໄດ້ຍັງຜົນໃຫ້ປະທານາທິບໍດີ Hosni Mubarak ລາອອກຈາກຕໍາແໜ່ງ
ໄປນັ້ນ.
ພວກທະຫານໄດ້ເຂົ້າໄປໃນຈະຕຸລັດ Tahrir ໃນເຊົ້າວັນອາທິດມື້ນີ້ ແລະເລີ້ມທັບມ້າງພວກຕູບຜ້າໃບ ທີ່ພວກປະທ້ວງຈັ້ດຕັ້ງຂຶ້ນເປັນບ່ອນພັກເຊົາຊົ່ວຄາວ ໃນການສືບຕໍ່ປະທ້ວງທີ່ໄດ້ ບີບບັງຄັບໃຫ້ທ່ານມູບາຣັກລາອອກໃນວັນສຸກຜ່ານມາແລະມອບອໍານາດໃຫ້ແກ່ກອງທັບນັ້ນ.
ຫລັງຈາກທ່ານມູບາຣັກລາອອກຈາກຕໍາແໜ່ງແລ້ວ ປະຊາຊົນອີຈິບຫລາຍແສນຄົນພາກກັນສະເຫລີມສະຫລອງ ໃນແລງວັນສຸກແລະວັນເສົາ ກ່ອນຈະພາກັນເດີນທາງກັບຄືນບ້ານເຮືອນຂອງເຂົາເຈົ້າ ແຕ່ພວກປະທ້ວງຫລາຍຮ້ອຍຄົນຍັງຢູ່ໃນຈະຕຸລັດໃນວັນອາທິດມື້ນີ້ ໂດຍປະຕິຍານວ່າຈະຢູ່ຫັ້ນຕໍ່ໄປ ຈົນກວ່າພວກທະຫານທີ່ຂຶ້ນຄອງອໍານາດໃໝ່ ຈະປະຕິບັດຕາມຄໍາຮຽກຮ້ອງຂອງພວກເຂົາເຈົ້າ ໃຫ້ທໍາການປະຕິຮູບໄປສູ່ລະບອບປະຊາທິປະໄຕນັ້ນ. ການຕໍ່ສູ້ກັນເລັກໆນ້ອຍໆໄດ້ເກີດຂຶ້ນ ໃນຂະພວກນັກເຄື່ອນໄຫວບາງຄົນພະຍາຍາມຂັດຂືນຄວາມພະຍາຍາມຂອງພວກທະຫານ ທີ່ຈະທັບມ້າງຕູບຜ້າໃບທີ່ຈະຕຸລັດນັ້ນ.
ຕາລາງເວລາການຂຶ້ນຄອງອໍານາດ ຂອງປະທານາທິບໍດີ ໂຮສນີ ມູບາຣັກ
ບັນດາກຸ່ມປະສົມຊາວໜຸຸມທີ່ເປັນຜູ້ຈັດແຈງການປະທ້ວງຂຶ້ນນັ້ນ ໄດ້ສະເໜີບັນຊີຄໍາຮຽກ
ຮ້ອງຂອງພວກເຂົາເຈົ້າໃນວັນເສົາວານນີ້ ທີ່ມີຮວມທັງໃຫ້ຍຸບສະພາທີ່ພັກລັດຖະບານຄອບ
ງໍາຢູ່ໃນເວລານີ້ ແລະໃຫ້ຍົກເລີກກົດພາວະສຸກເສີນທີ່ປະຊາຊົນບໍ່ນິຍົມທີ່ທ່ານມູບາຣັກໄດ້ປະ
ກາດໃຊ້ ເວລາທ່ານຂຶ້ນດໍາລົງຕໍາແໜ່ງປະທານາທິບໍດີໃນປີ 1981 ນັ້ນ.
ກອງທັບອີຈິບໃຫ້ຄໍາໜັ້ນສັນຍາວ່າ ຈະກໍາກັບດູແລເບິ່ງການຫັນປ່ຽນໄປສູ່ການມີລັດຖະບານແບບປະຊາທິປະໄຕແລະພົນລະເຮືອນນັ້ນ ແຕ່ບໍ່ໄດ້ຈັດຕັ້ງເວລາໄວ້. ທາງກອງທັບຍັງໄດ້ຮຽກຮ້ອງໃຫ້ນັກເຄື່ອນໄຫວນິຍົມປະຊາທິປະໄຕ ກັບຄືນສູ່ບ້ານເຮືອນ ແລະໃຫ້ກັບຄືນໄປດໍາລົງຊີວິດຂອງເຂົາເຈົ້າຕາມປົກກະຕິ ຫລັງຈາກທໍາການປະທ້ວງຕໍ່ຕ້ານລັດຖະບານມາເປັນເວລາ 18 ມື້ ຊຶ່ງໄດ້ສ້າງຄວາມເສຍຫາຍຢ່າງໜັກໃຫ້ແກ່ການເສດຖະກິດຂອງອີຈິບນັ້ນ.
