ພັກພະລາດອນພາບມຸສລິມ ຫຼື Muslim Brotherhood ຂອງອີຈິບ ໄດ້ເຊື້ອເຊີນບັນດາຜູ້
ສະມັກປະທານາທິບໍດີທີ່ເສຍໄຊໃຫ້ໄປພົບປະກັນໃນວັນເສົາມື້ນີ້ໃນຄວາມພະຍາຍາມເພື່ອ
ຂໍການ ສະໜັບສະໜຸນຕໍ່ຜູ້ສະມັກຂອງຕົນຄືທ່ານ Mohammed Morsi ທີ່ປະກົດວ່າຈະ
ໄດ້ເຂົ້າແຂ່ງຂັນໃນການເລືອກຕັ້ງປະທານາທິບໍດີຮອບສອງກັບທ່ານ Ahmed Shafiq ທີ່
ບໍ່ຝັກໄຝ່ໃນດ້ານສາສະໜານັ້ນ.
ໂຄສົກຄົນນຶ່ງຂອງພັກສາສະໜາອິສລາມດັ່ງກ່າວ ໄດ້ຮຽກຮ້ອງໃຫ້ບັນດາຜູ້ສະມັກປະທາ
ນາທິບໍດີທີ່ເສຍໄຊທັງ 10 ຄົນ ຊ່ອຍກອບກູ້ໃນອັນທີ່ທ່ານເອີ້ນວ່າ “ການປະຕິວັດ” ຂະນະ
ທີ່ທ່ານໄດ້ທຳການເຊື້ອເຊີນໃນມື້ວານນີ້.
ຜົນການນັບຄະແນນສຽງທີ່ບໍ່ເປັນທາງການ ຂອງການປ່ອນບັດ ໃນມື້ວັນພຸດ ແລະວັນພະ
ຫັດຜ່ານມານີ້ສະແດງໃຫ້ເຫັນວ່າ ທ່ານ Morsi ເປັນຜູ້ທີ່ໄດ້ຮັບຄະແນນຫຼາຍທີ່ສຸດ ຕິດຕາມ
ໂດຍທ່ານ Shafiq.
ອົງການຂ່າວເອພີລາຍງານວ່າ ໂຄສົກຂອງທ່ານ Shafiq ໄດ້ກ່າວຫາພັກພະລາດອນພາບ
ມຸສລິມວ່າ “ລັກຂະໂມຍ” ເອົາການປະຕິວັດໄປຈາກພວກຊາວໜຸ່ມ.
ທ່ານ Shafiq ເປັນນາຍົກລັດຖະມົນຕີຄົນສຸດທ້າຍຂອງອະດີດປະທານາທິບໍດີ Hosni
Mubarak ກ່ອນທ່ານ Mubarak ສູນເສຍອຳນາດໃນການປະທ້ວງ ຮຽກຮ້ອງເອົາປະຊາ
ທິປະໄຕໃນປີກາຍນີ້.
ຜົນການນັບຄະແນນສຽງຂັ້ນສຸດທ້າຍ ຈະມີການປະກາດໃຫ້ຊາບໃນວັນອັງຄານຈະມາ.
ການເລືອກຕັ້ງປະທານາທິບໍດີຮອບສອງ ຈະມີຂຶ້ນໃນວັນທີ 16 ແລະ 17 ມິຖຸນານີ້.
ການເລືອກຕັ້ງຮອບຕັດສິນຊີ້ຂາດລະຫວ່າງທ່ານ Morsi ແລະທ່ານ Shafiq ຈະເປີດໂອ
ກາດໃຫ້ຊາວອີຈິບມີທາງເລືອກລະຫວ່າງຜູ້ສະມັກທີ່ມີແນວທາງແຕກຕ່າງກັນຢ່າງຊີ້ນເຊີງ.
ໃນລະຫວ່າງການໂຄສະນາຫາສຽງນັ້ນທ່ານ Morsi ໄດ້ກ່າວຄຳປາໄສຢ່າງຮ້ອນແຮງແລະ
ປະຕິຍານວ່າ ການເປັນປະທານາທິບໍດີຂອງທ່ານແມ່ນຈະອີງຕາມສາສະໜາອິສລາມບໍ່ແມ່ນ
ເທວະທິປະໄຕ ຫຼືການຢຶດຖືພະເຈົ້າເປັນຫຼັກ.
ການໄດ້ຮັບໄຊຊະນະຂອງທ່ານ Morsi ຈະເສີມຂະຫຍາຍອິດທິພົນຂອງບັນດາພັກສາສະ
ໜາອິສລາມ ທີ່ໄດ້ຮັບການສະໜັບສະໜຸນ ຈາກ 70 ກວ່າເປີເຊັນ ຂອງຜູ້ມີສິດປ່ອນບັດ
ໃນການເລືອກຕັ້ງສະພາແຫ່ງຊາດເມື່ອຫົກເດືອນກ່ອນ.
ທ່ານ Shafiq ເປັນອະດີດຜູ້ບັນຊາການກອງທັບອາກາດ. ທ່ານໄດ້ຖືກແຕ່ງຕັ້ງໃຫ້ເປັນ
ນາຍົກລັດຖະມົນຕີ ໃນຄວາມຫວັງເພື່ອໃຫ້ເປັນການເອົາອົກເອົາໃຈໃນການລຸກຮືຂຶ້ນຂອງ
ປະຊາຊົນ. ແຕ່ຍ້ອນຄວາມສຳພັນດັ່ງກ່າວກັບທ່ານ Mubarak ຈຶ່ງມີການມອງເບິ່ງທ່ານ
ດ້ວຍຄວາມສົງໄສຈາກພວກນັກເຄື່ອນໄຫວທີ່ພົວພັນກັບຂະບວນການໃນປີ 2011 ແລະ
ບັນດາຜູ້ມີສິດປ່ອນບັດທີ່ແບ່ງກັນເປັນກຸ່ມເປັນກ້ອນນັ້ນ.
ເບິ່ງວີດີໂອ ກ່ຽວກັບທ່ານ Shafiq ພະຍາຍາມໃຫ້ໄດ້ຖືກເລືອກຕັ້ງ: