ການປະທະກັນຫລາຍບັ້ນລະຫວ່າງກໍາລັງຮັກສາຄວາມປອດໄພແລະພວກປະທ້ວງໃນກຸງໄຄໂຣ ໄດ້ເຮັດໃຫ້ປະຊາຊົນຈໍານວນຫລາຍກວ່າ 40 ຄົນບາດເຈັບໃນວັນພຸດມື້ນີ້ ໃນຂະນະທີ່ພວກປະທ້ວງຮຽກຮ້ອງໃຫ້ຜູ້ບັນ
ຊາການທະຫານສູງສຸດຂອງປະເທດລາອອກຈາກຕໍາແໜ່ງ.
ພວກປະທ້ວງມີຄວາມເຫລືອອົກເຫລືອໃຈນໍາອັນທີ່ພວກເຂົາເຈົ້າເຫັນວ່າການດໍາເນີນຄະດີທີ່ຊັກຊ້າຕໍ່ພວກເຈົ້າໜ້າທີ່ຮັກສາຄວາມປອດໄພທີ່ເຊື່ອກັນວ່າເປັນຜູ້ຮັບຜິດຊອບໃນການຕາຍຂອງພວກປະທ້ວງໃນລະຫວ່າງການລຸກຮືຂຶ້ນຂອງປະຊາຊົນຕໍ່ຕ້ານລັດຖະບານເປັນເວລາ 18 ມື້ໃນຕົ້ນປີນີ້. ພວກປະທ້ວງກ່າວຫາຜູ້ບັນຊາການທະຫານສູງສຸດຄືຈອມພົນ
Mohammad Hussein Tantawi ນັ້ນວ່າ ດໍາເນີນຄະດີຢ່າງຊັກຊ້າໂດຍເຈດຕະນາຕໍ່ພວກເຈົ້າໜ້າທີ່ຂັ້ນອະວຸໂສຈາກອໍານາດປົກຄອງເກົ່າຂອງອະດີດປະທານາທິບໍດີ Hosni Mubarak ທີ່ໄດ້ຖືກໂຄ່ນລົ້ມໄປນັ້ນ.
ພວກເຈົ້າໜ້າທີ່ຮັກສາຄວາມປອດໄພຂອງອີຈິບໄດ້ຍິງລະເບີດນໍ້າຕາໃນວັນພຸດມື້ນີ້ໃນຂະນະທີ່
ພວກປະທ້ວງພາກັນແກວ່ງກ້ອນຫິນໃສ່ພວກເຈົ້າໜ້າທີ່ຮັກສາຄວາມປອດໄພທີ່ຈະຕຸລັດ
Tahrir ໃນນະຄອນຫລວງ ຊຶ່ງເປັນຈຸດໃຈກາງຂອງການລຸກຮືຂຶ້ນຂອງປະຊາຊົນທີ່ໂຄ່ນລົ້ມ
ທ່ານມູບາຣັກອອກຈາກຕໍາແໜ່ງໄປໃນເດືອນກຸມພາແລ້ວນັ້ນ.
ຄວັນໄຟໄດ້ປົກຄຸມຈະຕຸລັດດັ່ງກ່າວໃນຂະນະທີ່ພວກຕໍາຫລວດທໍາການຕໍ່ສູ້ກັນກັບພວກປະ
ທ້ວງເພື່ອຄວບຄຸມຕາມຖະໜົນຫົນທາງສາຍຕ່າງໆຊຶ່ງພວກສະມາຊິກຄອບຄົວຂອງເຂົາເຈົ້າ
ຈໍານວນຫລາຍກວ່າ 850 ຄົນໄດ້ເສຍຊີວິດໄປໃນລະຫວ່າງການລຸກຮືຂຶ້ນນັ້ນ.
