ການປ່ອນບັດເລີ່ມຂຶ້ນອີກທີ່ອີຈິບ ໃນມື້ນີ້ ໃນການເລືອກຕັ້ງປະທານາທິບໍດີຄັ້ງປະຫວັດ
ສາດທີ່ທົດສອບຢ່າງກວ້າງຂວາງເບິ່ງພວກຜູ້ສະໝັກ ສັງກັດພັກສາສະໜາອິສລາມ ແຂ່ງ
ຂັນກັບພວກຜູ້ສະໝັກບໍ່ພົວພັນກັບສາສະໜາ ທີ່ມາຈາກພວກພິທັກການປົກຄອງແບບ
ເກົ່າຂອງອະດີດປະທານາທິບໍດີ Hosni Mubarak ນັ້ນ.
ລັດຖະບານໄດ້ປະກາດໃຫ້ວັນພະຫັດມື້ນີ້ເປັນວັນພັກ ເພື່ອໃຫ້ເວລາຫຼາຍຂຶ້ນແກ່ປະຊາ
ຊົນອອກໄປລົງຄະແນນສຽງເລືອກຕັ້ງ.
ແຕ່ນາງ Elizabeth Arrot ຜູ້ສື່ຂ່າວວີໂອເອ ກ່າວວ່າ ຈໍານວນຜູ້ຄົນອອກໄປປ່ອນບັດໃນ
ເຂດນະຄອນຫຼວງໄຄໂຣ ປາກົດວ່າໜ້ອຍກວ່າໃນວັນພະຫັດມື້ນີ້ຊຶ່ງເປັນມື້ທີສອງແລະມື້
ສຸດທ້າຍຂອງການປ່ອນບັດເລືອກຕັ້ງ.
ພວກສັງເກດການເບິ່ງການເລືອກຕັ້ງກ່າວວ່າ ການປ່ອນບັດໃນວັນພຸດວານນີ້ໄດ້ດໍາເນີນ
ໄປດ້ວຍຄວາມສະຫງົບ ໃນຂະນະທີ່ຊາວອີຈິບຫຼາຍລ້ານຄົນພາກັນໄປຢືນລຽນແຖວກັນ
ເພື່ອລໍຖ້າປ່ອນບັດ ທີ່ຄາດກັນວ່າ ຈະໄດ້ປະທານາທິບໍດີພົນລະເຮືອນຄົນທໍາອິດທີ່ປະຊາ
ຊົນເລືອກເອົາຢ່າງເສລີ ຫຼັງຈາກປະເທດດັ່ງກ່າວໄດ້ຖືກປົກຄອງໂດຍຄະນະນໍາພາທີ່ໄດ້ຮັບ
ການໜຸນຫຼັງຈາກພວກທະຫານມາ 60 ປີແລ້ວນັ້ນ.
ການປ່ອນບັດເລືອກຕັ້ງທີ່ວ່ານີ້ມີຂຶ້ນໃນເວລາ 15 ເດືອນຫຼັງຈາກປະທານາທິບໍດີມູບາຣັກ
ລາອອກຈາກຕໍາແໜ່ງທ່າມກາງການປະທ້ວງຄັ້ງໃຫຍ່ໃນປະເທດນັ້ນ.
ໃນຊ່ວງເວລາກ່ອນການເລືອກຕັ້ງ ການສໍາຫຼວດຫາງສຽງປະຊາຊົນທີ່ເຊື່ອຖືບໍ່ໄດ້ຂອງອີຈິບ
ສະແດງໃຫ້ເຫັນວ່າ ສຽງສະໜັບສະໜຸນປ່ຽນໄປປ່ຽນມາຢ່າງຫຼວງຫຼາຍ ລະຫວ່າງພວກຜູ້
ສະໝັກ 4 ຄົນໃນຈໍານວນທັງໝົດ 12 ຄົນ ໂດຍປ່ຽນກັນເປັນຜູ້ມີຄະແນນນຳໜ້າ.
ຜູ້ສະໝັກ ບໍ່ນິຍົມສາສະໜາ 2 ຄົນ ທີ່ມີສຽງນໍາໜ້າ ຕ່າງກໍເປັນນັກການເມືອງອະວຸໂສ ໃນ
ຄະນະລັດຖະບານຂອງອະດີດປະທານາທິບໍດີມູບາຣັກ ຄືອະດີດນາຍົກລັດຖະມົນຕີ Ah
med Shafiq ແລະອະດີດລັດຖະມົນຕີຕ່າງປະເທດ Amr Moussa ນັ້ນ.
ພວກຜູ້ສະໝັກແຂ່ງຂັນທີ່ສໍາຄັນຂອງພັກສາສະໜາອິສລາມ ຄື ທ່ານ Mohamed Morsi
ຈາກພັກພະລາດອນພາບມຸສລິມທີ່ມີອິດທິພົນສູງແລະທ່ານ Abdel Moneim Aboul Fo
touh ຫົວນິຍົມແນວທາງ ປານກາງຊຶ່ງມີນະໂຍບາຍທີ່ໄດ້ຮັບການສະໜັບສະໜຸນຈາກພວກ
ຫົວນິຍົມເສລີ ພ້ອມທັງພວກຫົວນິຍົມຝ່າຍຊ້າຍ ແລະຫົວນິຍົມສາສະໝາຄຣິສຕຽນບາງຄົນ
ນັ້ນ.