ລັດຖະບານໄລບີເຣຍ ໄດ້ຍົກເລີກການກັກສະຖານທີ່ຢູ່ໃນຄຸ້ມ
ຄົນທຸກຈົນເຂດນຶ່ງ ໃນນະຄອນຫຼວງມອນໂຣເວຍ ໃນຄວາມພະ
ຍາຍາມເພື່ອຍັບຍັ້ງການລະບາດຂອງເຊື້ອໄວຣັສອີໂບລານັ້ນ.
ໃນວັນເສົາວານນີ້ ລັດຖະບານໄດ້ຍົກຍ້າຍອອກສິ່ງກີດກັນທີ່ໄດ້
ຕັ້ງຂຶ້ນຢູ່ອ້ອມຄຸ້ມ West Point ແຄມທະເລນັ້ນ ຊຶ່ງໄດ້ກະຕຸ້ນ
ໃຫ້ມີການສະເຫຼີມສະຫຼອງຈາກປະຊາຊົນໃນທ້ອງຖິ່ນ ແລະໄດ້
ພາໃຫ້ພວກເຈົ້າຂອງຮ້ານຄ້າຮ້ານຂາຍ ເປີດຮ້ານຂອງເຂົາເຈົ້າ
ຄືນ.
ຕຳຫຼວດປາບການຈະລາຈົນ ໄດ້ປະທະກັນກັບພວກປະຊາຊົນ
ທ້ອງຖິ່ນ ເວລາລັດຖະບານປະກາດຫ້າມຜູ້ຄົນເຂົ້າອອກເຂດຄຸ້ມ
ດັ່ງກ່າວ ເມື່ອ 10 ມື້ຜ່ານມາແລ້ວນັ້ນ ພວກທີ່ອາໄສຢູ່ໃນຄຸ້ມ ພາກັນ
ຢ້ານກົວວ່າ ພວກເຂົາເຈົ້າຈະຖືກຕັດຂາດ ຈາກການໄດ້ຮັບສະບຽງເຂົ້າປາອາຫານແລະນ້ຳດື່ມນ້ຳໃຊ້.
ປະທານາທິບໍດີໄລບີເຣຍ ທ່ານນາງ Ellen Johnson-Sirleaf ໄດ້ ສັ່ງໃຫ້ກັກປະຊາຊົນ ບໍ່ໃຫ້ເຂົ້າອອກ ເຂດຄຸ້ມ West Point ຫຼັງຈາກມີການບຸກເຂົ້າໄປປຸ້ນເອົາສິ່ງຂອງ ໃນສູນປິ່ນປົວຜູ້ຕິດເຊື້ອອີໂບລາ.
ໃນການເຄື່ອນໄຫວອີກອັນນຶ່ງ ກີນີໄດ້ປະກາດຫ້າມຜູ້ຄົນສັນຈອນໄປມາໃນຍາມກາງຄືນ ທີ່ເມືອງ N’Zerekore ເມືອງໃຫຍ່ທີສຸດອັນດັບສອງຂອງປະເທດ ຫຼັງຈາກຊາວເມືອງພາກັນອາລະວາດແລະທຳລາຍຕະຫຼາດແຫ່ງນຶ່ງ ຊຶ່ງເຮັດໃຫ້ປະຊາຊົນຫຼາຍກວ່າ 20 ຄົນໄດ້ຮັບບາດເຈັບ.
ບັນດາເຈົ້າໜ້າທີ່ສືບສວນສອບສວນ ກ່າວວ່າ ພວກຊາວເມືອງເກີດຄວາມສັບສົນ ເວລາພວກພະນັກງານຮັກສາສຸຂະພາບພະຍາຍາມຈະສີດຢາຂ້າເຊື້ອໂຣກ ຢູ່ໃນຕະຫຼາດນັ້ນ.
ອົງການອະນາໄມໂລກກ່າວວ່າ ມີປະຊາຊົນຫຼາຍກວ່າ 1500 ຄົນແລ້ວເສຍຊີວິດໄປຍ້ອນການລະບາດຂອງເຊື້ອໄວຣັສອີໂບລາ ໃນໄລບີເຣຍ ກີນີ Sierra Leone ໄນຈີເຣຍ ແລະເຊເນກາລ.
ຢາປ້ອງກັນເຊື້ອອີໂບລາ ອາດມີໃຫ້ທົດລອງກັບມະນຸດ ຢູ່ອາຟຣິກາຕາເວັນຕົກໄດ້
ພາຍໃນປີໜ້າ:
