ຫົວໜ້າທາງການແພດຂອງໄລບີເຣຍ ໄດ້ພາຕົວເອງເຂົ້າໄປຢູ່
ໃນສະຖານກັກກັນ ເປັນເວລາ 3 ອາທິດ ເພາະອາດໄດ້ຕິດເຊື້ອ
ອີໂບລາ ຫຼັງຈາກຜູ້ຊ່ວຍສ່ວນຕົວຂອງທ່ານນາງ ໄດ້ເສຍຊີວິດ
ຈາກເຊື້ອໄວຣັສ ອີໂບລາ.
ທ່ານນາງ Bernice Dahn ໄດ້ຖະແຫລງຕໍ່ໍຜູ້ສື່ຂ່າວ ໃນວັນເສົາ
ວານນີ້ວ່າ ທ່ານນາງບໍ່ມີອາການໃດໆ ແຕ່ຕ້ອງການຢາກໃຫ້ແນ່ໃຈ
ວ່າ ທ່ານນາງບໍ່ໄດ້ຕິດເຊື້ອອີໂບລາ. ທ່ານນາງ Dahn ຍັງຂໍຮ້ອງ
ບັນດາພະນັກງານຂອງທ່ານນາງ ໃຫ້ຢູ່ເຮືອນເປັນເວລາ 21 ມື້ ຊຶ່ງ
ເປັນລະຍະເວລາສູງສຸດ ສຳຫລັບການບົ່ມຕົວຂອງເຊື້ອອີໂບລາ.
ໃນວັນສຸກຜ່ານມາ ອົງການອະນາໄມໂລກ ລາຍງານວ່າ ມີ 150 ຄົນ ເສຍຊີວິດຍ້ອນເຊື້ອໄວຣັສນີ້ ຢູ່ໄລບີເຣຍ ໃນລະຍະພຽງ 2 ມື້ເທົ່ານັ້ນແລະວ່າ ຫຼາຍກວ່າ 1,800 ຄົນ ໄດ້ເສຍ
ຊີວິດຢູ່ໄລບີເຣຍ ຕັ້ງແຕ່ການລະບາດນີ້ ເລີ້ມຕົ້ນຂຶ້ນ. ໂຕເລກດັ່ງກ່າວ ແມ່ນຫລາຍກ່ວາເຄິ່ງນຶ່ງຂອງຈຳນວນຄົນທີ່ເສຍຊີວິດທັງໝົດ ເກືອບ 3,100 ຄົນ ຢູ່ ກີນີ ໄລບີເຣຍ ແລະ
ຊີແອຣາ ລີອອນ.
ໄລບີເຣຍຟ້າວມ້ຽນມັດ ສົບຄົນຕາຍ ເພື່ອຄວບຄຸມການລະບາດ ຂອງອີໂບລາ:
ອົງການ WHO ຍັງໄດ້ເຕືອນວ່າ ຂໍ້ມູນໃໝ່ນີ້ ອາດບໍ່ໄດ້ສະທ້ອນໃຫ້ເຫັນ ເຖິງຂອບເຂດ
ຜົນກະທົບຂອງໂຣກລະບາດນີ້ ຊຶ່ງເຊື່ອກັນວ່າ ໄດ້ຕິດແປດຢ່າງນ້ອຍ 6,500 ຄົນ. WHO
ບັນລະຍາຍວ່າ ພວກທີ່ປ່ວຍ ຫຼາຍໆຄົນ ຢ້ານແລະບໍ່ກ້າໄປໂຮງໝໍ ຫຼືບໍ່ກໍຖືກທາງໂຮງໝໍ
ປະຕິເສດ ບໍ່ຮັບເອົາເຂົາເຈົ້າ ເພາະມີຄົນປ່ວຍເຕັມເກີນໄປ.
ອົງການ ກອງທຶນສາກົນ ຫຼື IMF ທີ່ມີສຳນັກງານຢູ່ວໍຊິງຕັນ ໄດ້ອະນຸມັດການຊ່ວຍເຫລືອ
ສຸກເສີນ ໃນວົງເງິນ 130 ລ້ານດອນລ່າ ໃຫ້ແກ່ 3 ປະເທດອາຟຣິກາຕາເວັນຕົກເຫລົ່ານັ້ນ ເມື່ອວັນສຸກທີ່ຜ່ານມາ.
ໃນການປະກາດການເຄື່ອນໄຫວນີ້ ຫົວໜ້າ ອົງການ IMF ທ່ານນາງ Christine Lagarde ກ່າວວ່າ ທາງອົງການກຳລັງດຳເນີນງານ ກັບບັນດາເຈົ້າໜ້າທີ່ໃນຂົງເຂດ ເພື່ອຮັບປະກັນໃຫ້ມີການຄວບຄຸມການລະບາດນີ້ ໃຫ້ໄດ້ໂດຍໄວ ແລະເພື່ອຊ່ວຍເຫຼືອໃນການຟື້ນຟູເສດຖະກິດ.
