ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ຈຳ​ນວນ​ຜູ້​ເສຍ​ຊີ​ວິດ​ສູງ​ສຸດ ໃນ​ການ​ຢຽບ​ກັນ​ຕາຍ​ຢູ່​ພາກ​ເໜືອ​ຂອງ ອິນ​ເດຍ ເພີ່ມ​ຂຶ້ນ​ເປັນ 121 ຄົນ


ເຈົ້າ​ໜ້າ​ທີ່​ຕຳຫຼວດ ອິ​ນ​ເດຍ ຍ່າງ​ຢູ່​ສະ​ຖານ​ທີ່​ບ່ອນ​ທີ່​ຜູັ​ສັດ​ທາ​ໄດ້​ເຕົ້າ​ໂຮມ​ກັນ​ສຳ​ລັບ​ງານ​ທາງ​ສາ​ສະ​ໜາ ຮິນ​ດູ, ລຸນຫຼັງ​ການ​ຢຽບ​ກັນ​ຕາຍ​, ໃນ​ເມືອງ ຮາ​ຕ​ຣາ​ສ, ລັດ ອັດ​ຕາ ປ​ຣາ​ເດັ​ສ, ອິ​ນ​ເດຍ, 3 ກໍ​ລະ​ກົດ 2024.
ເຈົ້າ​ໜ້າ​ທີ່​ຕຳຫຼວດ ອິ​ນ​ເດຍ ຍ່າງ​ຢູ່​ສະ​ຖານ​ທີ່​ບ່ອນ​ທີ່​ຜູັ​ສັດ​ທາ​ໄດ້​ເຕົ້າ​ໂຮມ​ກັນ​ສຳ​ລັບ​ງານ​ທາງ​ສາ​ສະ​ໜາ ຮິນ​ດູ, ລຸນຫຼັງ​ການ​ຢຽບ​ກັນ​ຕາຍ​, ໃນ​ເມືອງ ຮາ​ຕ​ຣາ​ສ, ລັດ ອັດ​ຕາ ປ​ຣາ​ເດັ​ສ, ອິ​ນ​ເດຍ, 3 ກໍ​ລະ​ກົດ 2024.

ຍອດ​ຜູ້​ເສຍ​ຊີ​ວິດ​ສູງ​ສຸດ​ຈາກ​ການ​ຢຽບ​ກັນ​ຕາຍ​ຢູ່​ການ​ເຕົ້າ​ໂຮມ​ກັນ​ຂອງ​ສາ​ສະ​ໜາ​ຮິນ​ດູ ໃນ​ລັດ ອັດ​ຕາ ປ​ຣາ​ເດັ​ສ ທາງ​ພາກ​ເໜືອ​ຂອງ ອິນ​ເດຍ ໃນ​ວັນ​ອັງ​ຄານ​ວານນີ້​ໄດ້​ເພີ່ມ​ຂຶ້ນ​ເປັນ 121 ຄົນ.

ຜູ້​ພິ​ພາກ​ສາ​ເມືອງ ທ່ານ ອາ​ຊິ​ສ ຄູ​ມາ (Ashish Kumar) ໄດ້​ກ່າວ​ຕໍ່​ບັນ​ດາ​ນັກ​ຂ່າວ​ວ່າ​ເຫດ​ການ​ດັ່ງ​ກ່າວ​ໄດ້​ເກີ​ດ​ຂຶ້ນ​ຢູ່​ບ້ານ​ແຫ່ງ​ນຶ່ງ ປະ​ມານ 200 ກິ​ໂລ​ແມັດທາງ​ພາກ​ຕາ​ເວັນ​ອອກ​ສຽງ​ໃຕ້​ຂອງ​ນະ​ຄອນຫຼວງ ນິວ​ເດ​ລີ, ໃນ​ຂະ​ນະ​ທີ່​ຝູງ​ຄົນ​ຂະ​ໜາດ​ໃຫຍ່​ພາ​ກັນ​ຟ້າ​ວ​ທີ່​ຈະ​ອອກ​ຈາກ​ງານ​ທາງ​ສາ​ສະ​ໜາ ຮິນ​ດູ ທີ່​ຮູ້​ຈັກ​ກັນ​ດັ່ງ​ກັບ ຊັດ​ຊາງ (Satsang), ເຊິ່ງ​ຖືກ​ຈັດ​ຂຶ້ນ​ໂດຍ​ຜູ້​ນຳ​ສາ​ສະ​ໜາ​ໃນ​ທ້ອງ​ຖິ່ນອາ​ຈານ ໂບ​ລ໌ ບາ​ບາ.

ລາຍ​ງານ​ສະ​ບັບ​ນຶ່ງ​ຂອງ​ຕຳຫຼວດ​ໄດ້​ກ່າວ​ວ່າ​ການ​ສືບ​ສວນ​ສອບ​ສວນ​ເບື້ອງ​ຕົ້ນ​ພົບ​ວ່າ ປະ​ມານ 250,000 ຄົນ​ໄດ້​ໄປ​ແຫຍ້​ກັນ​ຢູ່​ຕູບ​ຜ້າ​ຊົ່ວ​ຄາວ​ບ່ອນ​ທີ່​ງານ​ດັ່ງ​ກ່າວ​ໄດ້​ຈັດ​ຂຶ້ນ, ເຊິ່ງ​ເກີນ​ຈຳ​ນວນ 80,000 ຄົນ​ທີ່​ຖືກ​ຈຳ​ກັດ​ໄວ້​ໂດຍ​ບັນ​ດາ​ເຈົ້າ​ໜ້າ​ທີ່​ໃນ​ທ້ອງ​ຖິ່ນ​ຢ່າງ​ລົ້ນ​ເຫຼືອ.

ລາຍ​ງານຫຼາຍ​ສະ​ບັບ​ໄດ້​ກ່າວ​ວ່າ​ການ​ຢຽບ​ກັນ​ຕາຍ​ໄດ້​ເລີ່​ມ​ຂຶ້ນ​ໃນ​ຂະ​ນະ​ຜູ້​ສັດ​ທາງ​ທັງຫຼາຍ​ໄດ້​ພາກ​ກັນ​ຍ່າງ​ຕາມອາ​ຈານ ໂບ​ລ໌ ບາ​ບາ ອອກ​ຈາກ​ຕູບ​ຜ້າ ໃນ​ຂະ​ນະ​ທີ່​ເພິ່ນ​ໄດ້​ຍ່າງ​ອອກ​ໄປ. ຜູ້​ເຂົ້າ​ຮ່ວ​ມຫຼາຍ​ຄົນ​ໄດ້​ມື່ນ​ຂີ້​ຕົມ​ທີ່​ຢູ່​ອ້ອມ​ຮອບ ແລະ ຕົກ​ລົງ​ໄປ​ໃນນ້ຳ​ຂັງ ແລະ ຖືກ​ອັດ​ຈົນ​ຕາຍ​ເວ​ລາ​ທີ່​ຄົນ​ອື່ນໆ​ໄດ້​ຕົກ​ລົງ​ໄປ​ທັບ​ເຂົາ​ເຈົ້າ.

ເຈົ້າ​ໜ້າ​ທີ່​ໃນ​ທ້ອງ​ຖິ່ນ​ຄົນ​ນຶ່ງ​ໄດ້​ກ່າວ​ຕໍ່​ອົງ​ການ​ຂ່າວ AFP ຂອງ ຝ​ຣັ່ງ ວ່າ​ພາ​ຍຸ​ຂີ່​ຝຸ່ນ ຍັງ​ໄດ້​ເຮັດ​ໃຫ້​ປະ​ຊາ​ຊົນ​ເບິ່ງບໍ່​ເຫັນ ໃນ​ຂະ​ນະ​ທີ່​ເຂົາ​ເຈົ້າ​ພະ​ຍາ​ຍາມ​ທີ່​ຈະ​ໜີ​ອອກ​ຈາກ​ເຂດ​ນັ້ນ.

ຜູ້​ເຄາະ​ຮ້າຍ​ສ່ວນຫຼາຍ​ແມ່ນ​ແມ່​ຍິງ ແລະ ເດັກ​ນ້ອຍ. ອີກຫຼາຍ​ສິບ​ຄົນ​ແມ່ນ​ໄດ້​ຮັບ​ບາດ​ເຈັບ​ໃນ​ໂສກ​ນາດ​ຕະ​ກຳ​ດັ່ງ​ກ່າວ.

ໃນ​ຂະ​ແຫຼງ​ການ​ສະ​ບັບ​ນຶ່ງ​ຢູ່​ສື່​ສັງ​ຄົມ X ຂອງ​ຜູ້​ປົກ​ຄອງ​ລັດ ອັດ​ຕາ ປ​ຣາ​ເດັ​ສ, ທ່ານ ມາ​ຮ້ານ ໂຢ​ກີ ອາ​ດິດ​ຢາ​ນາດ (Mahant Yogi Adityanath), ໄດ້​ກ່າວ​ວ່າ​ທ່ານ​ໄດ້​ຕັ້ງ​ທີມ​ນຶ່ງ​ຂຶ້ນ​ມາ​ເພື່ອ​ສືບ​ສວນ​ສອບ​ສວນ​ເຫດ​ການ​ດັ່ງ​ກ່າວ.

ນາ​ຍົກ​ລັດ​ຖະ​ມົນ​ຕີ ອິນ​ເດຍ ທ່ານ ນາ​ເຣັນ​ດ​ຣາ ໂມ​ດີ, ໃນ​ລະ​ຫວ່າງ​ການ​ປາ​ກົດ​ຕົວ​ຢູ່​ສະ​ພາ​ແຫ່ງ​ຊາດ​ ອິນ​ເດຍ ໃນ​ວັນ​ອັງ​ຄານ​ວານນີ້, ໄດ້​ກ່າ​ວ​ວ່າ​ທ່ານ​ເສຍ​ໃຈ​ເປັນ​ຢ່າງ​ຍິ່ງ ກ່ຽວ​ກັບ ເຫດ​ການ​ນັ້ນ ແລະ ໄດ້​ກ່າວ​ວ່າ​ທ່ານ​ຈະ “ຊ່ວຍ​ເຫຼືອ​ຜູ້​ທີ່​ໄດ້​ຮັບ​ບາດ​ເຈັບ​ດ້ວຍ​ທຸກວິ​ທີ​ທີ່​ເປັນ​ໄປ​ໄດ້.”

ການ​ຢຽບ​ກັນ​ຕາຍ​ແມ່ນ​ຂ້ອນ​ຂ້າງ​ຈະ​ປົກ​ກະ​ຕິ​ໃນ​ລະ​ຫວ່າງ​ບຸນ​ທາງ​ສາ​ສະ​ໜາ​ຂອງ ອິນ​ເດຍ, ບ່ອນ​ທີ່​ຝູງ​ຄົນ​ຂະ​ໜາດ​ໃຫຍ່​ເຕົ້າ​ໂຮມ​ກັນ​ໃນ​ບໍ​ລິ​ເວນ​ນ້ອຍໆ ດ້ວຍ​ມາດ​ຕະ​ການ​ຄວາມ​ປອດ​ໄພ​ສອງ​ສາມ​ຢ່າງ.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG