ບັນດາເຈົ້າໜ້າທີ່ຊູດານໃຕ້ ບັດນີ້ ກ່າວວ່າ ຢ່າງໜ້ອຍ 150 ຄົນ
ໄດ້ເສຍຊີວິດ ເວລລາລົດບັນທຸກນຳ້ມັນທີ່ປີ້ນຂວ້ຳ ໄດ້ລະເບີດຂື້ນ
ໂດຍສັງຫານຜູ້ຄົນທີ່ພາກັນ ໄປຕັກເອົານຳ້ມັນ.
ທຳອິດ ບັນດາເຈົ້າໜ້າທີ່ ລາຍງານວ່າ ຈຳນວນຜູ້ເສຍຊີວິດ ຍ້ອນ
ເຫດລະເບີດ ໃນວັນພຸດຜ່ານມາ ມີຢູ່ 85 ຄົນ ແຕ່ຕົກມາເຖິງວັນ
ສຸກມື້ນີ້ຈຳນວນຜູ້ເສຍຊີວິດໄດ້ສູງຂື້ນຢ່າງຫຼວງຫຼາຍ.
ເຫດລະເບີດໄດ້ເກີດຂື້ນຢູ່ຖະໜົນສາຍນຶ່ງໃກ້ກັບເມືອງ Maridi
ປະມານ 250 ກິໂລແມັດຫ່າງຈາກນະຫລວງ Juba ໄປທາງພາກ
ຕາເວັນຕົກ.
ຫົວໜ້າລັດຖະບານທ້ອງຖິ່ນ ໃນເມືອງ Maridi ທ່ານ John Saki ໄດ້ກ່າວຕໍ່ອົງການຂ່າວ
ຝຣັງວ່າ ຈຳນວນຜູ້ເສຍຊີວີດອາດຈະສູງຂື້ນເຖິງ 176 ຄົນ. ທ່ານກ່າວວ່າ ປະມານນຶ່ງພັນ
ຄົນໄດ້ພາກັນແອອັດຢູ່ອ້ອມລົດບັນທຸກນຳ້ມັນ ເພື່ອຕັກເອົານຳ້ມັນ ຫລັງຈາກລົດໄດ້ປີ້ນ
ຂວ້ຳ ໃນວັນພຸດແລ້ວ.
ທ່ານ Mariam Tito ຫົວໜ້າເຂດເມືອງ Mambe Mayan ກ່າວຕໍ່ລາຍການ ວີໂອເອ ທີ່
ເນັ້ນໜັກໃສ່ຊູດານໃຕ້ ໃນວັນພະຫັດວານນີ້ວ່າ ຈຳນວນຜູ້ເສຍຊີວິດມີທ່າທາງວ່າຈະ
ເພີ້ມຂື້ນ ເນື່ອງຈາກວ່າ ຜູ້ເຄາະຮ້າຍຈຳນວນຫຼາຍໄດ້ຮັບບາດເຈັບຍ້ອນຖືກໄຟໄໝ້ຢ່າງ
ຮ້າຍແຮງ.
ເຫດລະເບີດໃນທຳນອງນີ້ ມັກເກີດຂື້ນຢູ່ປະເທດທີ່ທຸກຈົນໃນອາຟຣິກາຕາເວັນອອກ
ບ່ອນທີ່ຄົນມັກຊອກຫາຜົນປະໂຫຍດ ຈາກລົດນຳ້ມັນ ທີ່ຕາຍຫຼືເພ ເພື່ອລັກເອົານໍ້າມັນ. ໃນ
ເດືອນມິຖຸນາປີ 2013 ກໍມີ 30 ຄົນໄດ້ເສຍຊີວິດຍ້ອນລົດ ບັນທຸກນຳ້ມັນລະເບີດ ໃນ
ປະເທດ Uganda.
