ເຈົ້າໜ້າທີ່ສາທາລະນະສຸກປາແລັສໄຕນ໌ກ່າວວ່າ ການໂຈມຕີທາງອາກາດຂອງອິສຣາແອລໃນວັນຈັນມື້ນີ້ ໄດ້ກະທົບໃສ່ບໍລິເວນໂຮງໝໍ ອາລ-ອັກສາ ມາເດີສ໌ (Al-Aqsa Martyrs) ໃນເມືອງ ເດຍ ອາລ-ບາລະ (Deir al-Balah) ເຮັດສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 4 ຄົນ ແລະບາດເຈັບອີກ 40 ຄົນ.
ກະຊວງສາທາລະນະສຸກໃນເຂດກາຊາກ່າວວ່າ ການໂຈມຕີດັ່ງກ່າວ ໄດ້ພາໃຫ້ເກີດໄຟໄໝ້ຢ່າງໃຫຍ່ໃນໂຮງໝໍ ແລະໃນບັນດາເຕັ້ນທີ່ຊາວປາແລັສໄຕນ໌ທີ່ພັດຖິ່ນຈາກສົງຄາມ.
ກອງທັບອິສຣາແອລກ່າວວ່າ ຕົນໄດ້ແນເປົ້າໝາຍໃສ່ພວກຫົວຮຸນແຮງທີ່ຫລົບລີ້ຢູ່ພາຍໃນບັນດາພົນລະເຮືອນເຫຼົ່ານັ້ນ.
ການໂຈມຕີຄັ້ງນີ້ ມີຂຶ້ນພຽງບໍ່ເທົ່າໃດຊົ່ວໂມງລຸນຫຼັງການໂຈມຕີຂອງອິສຣາແອລອີກຄັ້ງນຶ່ງ ທີ່ເຮັດໃຫ້ມີຜູ້ເສຍຊີວິດຢ່າງໜ້ອຍ 15 ຄົນຢູ່ບໍລິເວນໂຮງຮຽນແຫ່ງນຶ່ງໃນເມືອງ ນູໄຊຣັດ (Nuseirat) ທີ່ຖືກນຳໃຊ້ໂດຍຊາວປາແລັສໄຕນ໌ພັດຖິ່ນ.
ອົງການສະຫະປະຊາຊາດເພື່ອຊາວອົບພະຍົບປາແລັດສະໄຕນ໌ ຫຼື UNRWA ກ່າວໃນວັນຈັນວານນີ້ວ່າ “ອີກຄືນນຶ່ງທີ່ເປັນຕາໜ້າຢ້ານຢູ່ແຫຼມກາຊາ. ອົງການ UNRWA ກ່າວວ່າ ໂຮງຮຽນດັ່ງກ່າວ ຖືກກຳນົດໄວ້ສໍາລັບສໍາລັບໃຊ້ໃນການສັກຢາວັກຊີນໂປລິໂອ ໃນວັນຈັນມື້ນີ້.
ຫົວໜ້ານະໂຍບາຍການຕ່າງປະເທດຂອງສະຫະພາບຢູໂຣບ ທ່ານ ໂຈເຊບ ບໍແຣລ (Josep Borrell) ໃນວັນຈັນມື້ນີ້ ໄດ້ອອກມາສະແດງ “ຄວາມເປັນຫ່ວງຢ່າງໜັກ” ກ່ຽວກັບການບຸກໂຈມຕີຂອງກຳລັງອິສຣາແອລ ທີ່ໄດ້ເຮັດໃຫ້ທະຫານຮັກສາສັນຕິພາບຂອງອົງການສະຫະປະຊາຊາດຫຼາຍຄົນໄດ້ຮັບບາດເຈັບຢູ່ບໍລິເວນພາກໃຕ້ຂອງເລບານອນ.
ທ່ານ ບໍແຣລ ກ່າວຕໍ່ບັນດານັກຂ່າວວ່າ “ການໂຈມຕີຕໍ່ບັນດາກຳລັງຮັກສາສັນຕິພາບຂອງອົງການສະຫະປະຊາຊາດດັ່ງກ່າວ ຖືເປັນການລະເມີດກົດໝາຍສາກົນຢ່າງໜັກໜ່ວງ ແລະຮັບບໍ່ໄດ້. ການໂຈມຕີເຫຼົ່ານີ້ ຕ້ອງຍຸຕິໃນທັນທີ.”
ກອງກຳລັງຊົ່ວຄາວຂອງອົງການສະຫະປະຊາຊາດໃນເລບານອນ ຫຼື UNIFIL ເຊິ່ງເປັນກອງກຳລັງຮັກສາສັນຕິພາບ ທີ່ມີຖານທີ່ໝັ້ນຂອງອົງການສະຫະປະຊາຊາດ ໃນເມືອງ ຣາມາຍອາ (Ramyah) ໄດ້ກ່າວໃນວັນອາທິດວານນີ້ວ່າ ພວກເຂົາໄດ້ສັງເກດເບິ່ງທະຫານອິສຣາແອລ 3 ກຸ່ມຂ້າມເຂົ້າໄປໃນເລບານອນ. ດ້ວຍກອງກຳລັງຮັກສາສັນຕິພາບຢູ່ໃນທີ່ພັກຂອງພວກເຂົາເຈົ້າຢູ່ນັ້ນ, ໜ່ວຍງານພາລະກິດອົງການສະຫະປະຊາຊາດ ໄດ້ກ່າວວ່າ ລົດຖັງຂອງ ອິສຣາແອລ ສອງຄັນ ໄດ້ທຳລາຍປະຕູໃຫຍ່ຂອງສໍານັກງານ ແລະໄດ້ພະຍາຍາມບຸກເຂົ້າໄປໃນສະຖານທີ່ຕັ້ງຂອງອົງການ.
ມັນເປັນເຫດການຄັ້ງຫຼ້າສຸດ ທີ່ໄດ້ເຮັດໃຫ້ກອງກຳລັງຮັກສາສັນຕິພາບ ໄດ້ຮັບບາດຢ່າງໜ້ອຍ 5 ຄົນ ນັບຕັ້ງແຕ່ວັນພະຫັດເປັນຕົ້ນມາ.
ຟໍຣັມສະແດງຄວາມຄິດເຫັນ