ລິ້ງ ສຳຫລັບເຂົ້າຫາ

ຈີນໂກດແຄ້ນ ຕໍ່ການພົບປະກັນ ລະຫວ່າງທ່ານໂອບາມາ ກັບ ອົງດາໄລ ລາມະ

  • ທອງປານ ເທບວົງສາ

ອົງດາໄລ ລາມະ ຊົງພົບປະກັບປະທານາທິບໍດີ ໂອບາມາ ທີ່ທໍານຽບຂາວ ເມື່ອວັນເສົາທີ່ 16 ເດືອນກໍລະກົດນີ້

ວັນອາທິດມື້ນີ້ ຈີນໄດ້ສະແດງປະຕິກິລິຍາໂກດແຄ້ນຢ່າງໃຫຍ່ ຕໍ່ການພົບ ປະກັນທີ່ທໍານຽບ ຂາວລະຫວ່າງວປະທານາທິບໍດີສະຫະລັດ ທ່ານບາຣັກ ໂອບາມາ ແລະອົງ ດາໄລ ລາມະ ໂດຍ​ເວົ້າວ່າ ການກະທໍາແບບນີ້ແມ່ນ ເປັນການແຊກແຊງກິດຈະການພາຍໃນປະເທດຂອງ ຈີນຢ່າງສິ້ນເຊີງ.

ຖະແຫລງການສະບັບນຶ່ງ ໂດຍໂຄສົກກະຊວງຕ່າງປະເທດຈີນ ທ່ານ Ma Zhaozou ນັ້ນ ຮຽກຮ້ອງໃຫ້ສະຫະລັດ ຍຸ​ດ​ເຊົາແຊກແຊງ​ເຂົ້າ​ໃນກິດຈະ ການພາຍໃນຂອງຈີນ ແລະໃນຄໍາ ເວົ້າຂອງໂຄສົກ Ma ນັ້ນ ກໍແມ່ນວ່າ “ຈົ່ງຍຸຕິການຄົບ​ຄິດແລະສະໜັບສະໜຸນກໍາລັງແບ່ງ ແຍກດິນແດນທີ່ຕໍ່ຕ້ານຈີນນັ້ນ.”

ກະຊວງຕ່າງປະເທດຈີນໄດ້ຮຽກຕົວທ່ານ Robert Wang ອຸບປະທູດສະຫະລັດທີ່ປັກກິ່ງ ​ເຂົ້າ​ພົບເພື່ອຍື່ນປະທ້ວງ. ພ້ອມດຽວກັນ ທາງສະຖານທູດຈີນທີ່ວໍຊິງຕັນ ກໍທໍາການປະທ້ວງ ຢ່າງເປັນທາງການເຊັ່ນກັນ.

ຖະແຫລງການສະບັບນຶ່ງຂອງທໍານຽບຂາວທີ່ອອກ​ໃນວັນເສົາວານນີ້ຫລັງຈາກການໂອ້ລົມ ກັນ ແບບ​ປິດ​ລັບບໍ່ໃຫ້ພາຍນອກຮູ້ນໍານັ້ນ ເວົ້າວ່າ ທ່ານ ໂອບາມາ ໄດ້ເວົ້າເຖິງຄວາມ ຈໍາເປັນ ສໍາລັບໃຫ້ມີການໂອ້ລົມສົນທະນາກັນ ໂດຍກົງລະຫວ່າງຜູ້ຕ່າງໜ້າຂອງອົງດາໄລ ລາມະ ແລະພວກເຈົ້າໜ້າທີ່ ຂອງລັດຖະບານຈີນ ເພື່ອທໍາການແກ້ໄຂບັນຫາທີ່ເຫັນແຕກ ຕ່າງກັນນັ້ນ. ​ແລະປະທານາທິບໍດີ ໂອບາມາ ໄດ້ເນັ້ນຍໍ້ານະໂຍບາຍສະຫະລັດ ທີ່ວ່າ ທິເບດເປັນພາກສ່ວນນຶ່ງຂອງຈີນ.

ຈີນກ່າວຫາອົງດາໄລ ລາມະ ວ່າ ສະໜັບສະໜຸນການແບ່ງແຍກທິເບດອອກຈາກຈີນ ຊຶ່ງ ເປັນຂໍ້ກ່າວຫາທີ່ພະອົງ​ໄດ້ຊົງປະຕິເສດຕະຫລອດມາ.

ທໍານຽບຂາວໄດ້ປະກາດການພົບປະກັນ ລະຫວ່າງຜູ້ໄດ້ຮັບລາງວັນ​ໂນ​ແບ​ລ ຂະ​ແໜງສັນຕິ ພາບສອງທ່ານ​ນີ້ ເມື່ອວັນສຸກຜ່ານມາ ໃນຕອນທີ່ອົງດາໄລ ລາມະ ກໍາລັງ​ຈະສິ້ນສຸດການ ຢ້ຽມຢາມນະຄອນຫລວງສະຫະລັດ ​ເປັນ​ເວລາເກືອບສອງອາທິດນັ້ນ.

ປະທານາທິບໍດີ ໂອບາມາ ໄດ້ພົບປະກັບອົງດາໄລ ລາມະ ເທື່ອສຸດທ້າຍ ໃນປີ 2010 ທີ່ ທໍານຽບຂາວໃນການພົບປະກັນແບບງຽບໆທີ່ໄດ້ສ້າງຄວາມໂກດແຄ້ນໃຫ້ແກ່ຈີນເຊັ່ນກັນ ໃນ ເວລານັ້ນ. ປັກກິ່ງໄດ້ຕັກເຕືອນສະຫະລັດ ມາໄດ້ຫລາຍກວ່ານຶ່ງອາທິດແລ້ວວ່າ ບໍ່ໃຫ້ພົບປະ ກັນຢ່າງເປັນທາງການ ກັບອົງອາໄລ ລາມະ.

ອົງດາໄລ ລາມະ ໄດ້ບອກວີໂອເອເມື່ອອາທິດຜ່ານມາ ວ່າ ພະອົງຈະຊົງ ດີໃຈຫລາຍທີ່ຈະ ພົບປະກັບປະທານາທິບໍດີໂອບາມາ ຖ້າໃຫ້ໂອກາດ. ແຕ່ ອົງດາໄລ ລາມະ ກ່າວວ່າເຫດ ຜົນໃຫຍ່ທີ່ມາຢ້ຽມຢາມສະຫະລັດໃນຄັ້ງນີ້ ກໍແມ່ນເພື່ອສິດສອນຫລັກທໍາສາສະໜາພຸດ ຫລາຍກ່ວາ.

XS
SM
MD
LG