ວິດີໂອຂອງປະທານາທິບໍດີ ເວເນຊູເອລາ ທ່ານ ນິໂຄລັສ ມາດູໂຣ ທີ່ກຳລັງກິນສະເຕັກ
ຢູ່ຮ້ານອາຫານລາຄາແພງແຫ່ງນຶ່ງ ໄດ້ກໍ່ໃຫ້ເກີດຄວາມບໍ່ພໍໃຈຢ່າງຮຸນແຮງຈາກທົ່ວ
ໂລກ ແທນປະຊາຊົນຜູ້ທີ່ປະສົບກັບຄວາມທຸກຍາກໃນປະເທດຂອງທ່ານ.
ວິດີໂອຕອນນຶ່ງ ໄດ້ສະແດງໃຫ້ເຫັນພໍ່ຄົວທີ່ມີຊື່ສຽງ ທ້າວ ນຸສເຣັດ ກັອກເຊ (Nusret
Gokce) ເຊິ່ງເປັນທີ່ຮູ້ຈັກກັນໃນອີກຊື່ນຶ່ງວ່າ “Salt Bae”, ກຳລັງປາດຊີ້ນໃຫ້ປະທາ
ນາທິບໍດີກັບພັນລະຍາ, ທ່ານນາງ ຊີເລຍ ຟລໍເຣັສ (Celia Flores), ຢູ່ຮ້ານອາຫານ
ນັສເຊີ-ເອັດ (Nusr ET) ໃນນະຄອນ ອິສຕັນບູລ, ບ່ອນທີ່ຊີ້ນຕ່ອນນຶ່ງນັ້ນ ອາດມີລາ
ຄາແພງຫຼາຍຮ້ອຍໂດລາ.
ສະມາຊິກສະພາສູງລັດ ຟລໍຣິດາ ທ່ານ ມາໂກ ຣູບີໂອ ໄດ້ກ່າວໂຈມຕີພໍ່ຄົວຄົນດັ່ງກ່າວ
ຜູ້ທີ່ໄດ້ຖ່າຍວິດີໂອຮ່ວມກັບ “ຜູ້ນຳຜະເດັດການ”, ຜູ້ທີ່ໄດ້ສະແດງໃຫ້ເຫັນວ່າກຳລັງກິນ “ອາຫານລະດັບຫ້າດາວ, ສູບຢາຊີກາດີໆ ໃນຂະນະທີ່ປະຊາຊົນ ເວເນຊູເອລາ ແທ້ຈິງ
ແລ້ວກຳລັງອຶດຫິວ.”
ທ່ານ ຣູບີໂອ ໄດ້ກ່າວຕໍ່ໜັງສືພິມ Miami Herald ໃນວັນອັງຄານວານນີ້ວ່າ “ມັນເປັນ
ຕາຢາກຮ້າຍ, ເປັນຕາຂີ້ດຽດ ຜູ້ຊາຍຄົນນີ້ ໄດ້ເຮັດໃຫ້ມະນຸດອຶດຫິວ ແລະ ທ້າວ Salt
Bae ແມ່ນໄດ້ສະເຫຼີມສະຫຼອງກັບລາວ ຄືວ່າລາວເປັນວິລະບູລຸດຈັ່ງໃດນີ້ແຫຼະ. ຂ້າ
ພະເຈົ້າໃຈຮ້າຍຫຼາຍ.”
ທ່ານ ຣູບີໂອ ໄດ້ຂຽນໃນທວິດເຕີໃນວັນອັງຄານວານນີ້ວ່າ “ຂ້າພະເຈົ້າບໍ່ຮູ້ວ່າ ທ້າວ
Salt Bae ທີ່ມີນິໄສແປກໆນີ້ແມ່ນໃຜ ແຕ່ຜູ້ຊາຍທີ່ລາວມີຄວາມພາກພູມ ໃຈທີ່ຈະເສີບ
ນັ້ນ ບໍ່ແມ່ນປະທານາທິບໍດີຂອງ ເວເນຊູເອລາ. ແທ້ຈິງແລ້ວ ລາວແມ່ນຈອມຜະເດັດ
ການທີ່ມີນ້ຳໜັກເກີນຂອງປະເທດທີ່ປະຊາຊົນ 30 ເປີເຊັນນັ້ນກິນອາຫານພຽງຄາບ
ດຽວຕໍ່ມື້ ແລະພວກເດັກນ້ອຍກຳລັງທຸກທໍລະມານກັບການ ຂາດສານອາຫານ.”
ສະມາຊິກສະພາສູງຄົນດັ່ງກ່າວຍັງໄດ້ຂຽນໃນທວິດເທີ ກ່ຽວກັບ ທີ່ຢູ່ ກັບ ເລກໂທລະ
ສັບຂອງຮ້ານອາຫານຂອງພໍ່ຄົວຄົນດັ່ງກ່າວໃນນະຄອນ ໄມອາມີ, ເຊິ່ງເປັນບ້ານຂອງ
ຊາວອາເມຣິກັນ ເຊື້ອສາຍ ເວເນຊູເອລາ ແລະ ເຊື້ອສາຍ ຄິວບາ ຈຳນວນຫຼາຍ ຜູ້ທີ່ວິ
ຈານຜູ້ນຳສັງຄົມນິຍົມນັ້ນ.
ຜູ້ນຳພັກຝ່າຍຄ້ານ ທ່ານ ຮູລີໂອ ບໍເກັສ (Julio Borges), ຜູ້ທີ່ອອກໄສຢູ່ນອກປະເທດ
ໃນ ໂຄລອມເບຍ ໄດ້ຂຽນໃນທວິດເຕີວ່າ “ໃນຂະນະທີ່ປະຊາຊົນ ເວເນຊູເອລາ ທຸກທໍ
ລະມານ ກັບ ຕາຍຍ້ອນການອຶດຫິວນັ້ນ, ທ່ານ ນິໂຄລັສ ມາດູໂຣ ກັບ ທ່ານນາງ ຊີເລຍ
ຟລໍເຣັສ ແມ່ນກຳລັງມ່ວນຊື່ນກັບເວລາດີໆ ຢູ່ ນຶ່ງໃນຮ້ານອາຫານທີ່ແພງທີ່ສຸດໃນໂລກ,
ພ້ອມກັບເງິນທັງໝົດທີ່ຖືກລັກຈາກປະຊາຊົນ ເວເນຊູເອລາ.
