ຄົນສັນຊາດຈີນສອງຄົນຖືກໄອຍະການສະຫະລັດກ່າວຫາວ່າ ທຳການຟອກເງິນຕາທາງດິຈີຕອລ ໃນມູນຄ່າຫລາຍກວ່າ 100 ລ້ານໂດລາ ທີ່ຖືກພວກນັກລັກເຈາະຂໍ້ມູນຊາວເກົາຫລີເໜືອ ລັກໄປໃນປີ 2018 ນັ້ນ.
ທ້າວ ທຽນ ຢິນຢິນ (Tian Yinyin) ແລະ ທ້າວລີ ເຈຍດອງ (Li Jiadong) ຖືກກ່າວຫາວ່າຮ່ວມຫົວກັນທຳການຟອກເງິນ ແລະດຳເນີນທຸລະກິດໂອນເງິນ ແບບບໍ່ມີໃບອະນຸຍາດ, ອີງຕາມການຟ້ອງຮ້ອງທີ່ເປີດເຜີຍອອກມາໃນວັນຈັນວານນີ້.
ພວກເຈົ້າໜ້າທີ່ສະຫະລັດກ່າວວ່າ ພວກນັກລັກເຈາະຂໍ້ມູນຊາວເກົາຫລີເໜືອ ໄດ້ລັກເອົາເງິນເກືອບຮອດ 250 ລ້ານໂດລາ ຢູ່ໃນການແລກປ່ຽນເງິນທາງອິເຕີແນັດໄປໃນປີ 2018 ກ່ອນຈະທຳການຟອກເງິນໂດຍຜ່ານການເຮັດທຸລະກຳ ຫລາຍຮ້ອຍຄັ້ງ ເພື່ອເຮັດໃຫ້ເປັນການຍາກທີ່ຈະນຳຮ່ອງຮອຍຂອງການລັກຂະໂມຍໄດ້. ພວກນັກລັກເຈາະຂໍ້ມູນນັ້ນ ຖືກກ່າວຫາວ່າ ຢູ່ເບື້ອງຫລັງຂອງການລັກຂະໂມຍເງິນປະມານ 50 ລ້ານໂດລາ ຈາກການແລກປ່ຽນເງິນທາງອິເຕີແນັດໃນປີ 2019.
ນອກຈາກການຕັ້ງຂໍ້ຫາທາງອາຍາຕໍ່ທ້າວຢິນຢິນ ແລະເຈຍດອງແລ້ວ, ພວກໄອຍະການຍັງໄດ້ຍື່ນຄຳຟ້ອງຮ້ອງຢູ່ໃນສານລັດຖະບານກາງໃນນະຄອນວໍຊິງຕັນອີກ ເພື່ອຢຶດເອົາການຄວບຄຸມບັນຊີເງິນຕາທາງດິຈີຕອລ 113 ບັນຊີ ແລະເອົາທີ່ຢູ່ ທີ່ໃຊ້ໂດຍສອງຄົນນັ້ນ ແລະຜູ້ສົມຮູ້ຮ່ວມຄິດຄົນອື່ນໆອີກ.
ຮອງລັດຖະມົນຕີກະຊວງຍຸຕິທຳ, ທ່ານ ໄບຣແອນ ເອ. ເບນສ໌ຄອຟສກີ (Brian A. Benczkowski) ກ່າວໃນຖະແຫລງການສະບັບນຶ່ງວ່າ "ການກະທຳໃນມື້ນີ້ ໄດ້ເນັ້ນໃຫ້ເຫັນວ່າ ກະຊວງຈະເຈາະຜ້າຄຸມໜ້າຂອງຜູ້ລຶກລັບທີ່ໄດ້ມາຈາກເງິນຕາທາງດິຈີຕອລ ເພື່ອເຮັດໃຫ້ຜູ້ກໍ່ອາດຊະຍາກຳຕ້ອງຮັບເອົາຄວາມຮັບຜິດຊອບຂອງເຂົາ, ບໍ່ວ່າພວກເຂົາຈະຢູ່ໃສກໍຕາມ".
ທ້າວ ຢິນ ຢິນ (Yinyin) ແລະ ເຈຍດອງ (Jiadong) ໄດ້ດຳເນີນການບໍລິການໃນການໂອນເງິນທາງອິນເຕີແນັດ ແຕ່ວ່າ ໄດ້ເຮັດທຸລະກິດຢູ່ໃນສະຫະລັດ ໂດຍບໍ່ມີໃບອະນຸຍາດຈາກເຄືອຂ່າຍການປະຕິບັດກົດໝາຍດ້ານອາດຊະຍາກຳທາງການເງິນ.
