ໃນເດືອນນີ້ ບໍລິສັດຂາຍອາຫານໄວທັນໃຈຍັກໃຫຍ່ຂອງສະຫະລັດ ຄືບໍລິສັດ McDonald's ໄດ້ກູ້ຢືມຈາກພວກນັກລົງທຶນໃນຮອງກົງ ເປັນເງິນ 200 ລ້ານຢວນ ຊຶ່ງເທົ່າກັນກັບ 29 ລ້ານດອນລາສະຫະລັດ ໂດຍການອອກພັນທະ ບັດໃຫ້. ບໍລິສັດ McDonald’s ໄດ້ສວຍໃຊ້ການຜ່ອນ ຄາຍກົດລະບຽບລົງຫວ່າງໄວໆຜ່ານມານີ້ຂອງລັດຖະບານຈີນ ກ່ຽວກັບການໃຊ້ເງິນຕາຂອງຈີນ ຫລືທີ່ເອີ້ນກັນວ່າເງິນ renminbi ນັ້ນ ດ້ວຍຄວາມຊ່ອຍເຫລືອຈາກທະນາ ຄານ Standard Chartered Bank.
ທ່ານ Sundeep Bhandari ຫົວໜ້າພະແນກຕະຫລາດໂລກໃນເຂດເອເຊັຍຕາເວັນອອກສຽງເໜືອຂອງທະນາຄານ Standard Chartered ປະຈໍາຂົງເຂດ ກ່າວວ່າ ພັນທະ ບັດຂອງບໍລິສັດ McDonald ຈະເປັນຊຸດທໍາອິດຈາກພວກບໍລິສັດຕ່າງປະເທດ ຊຶ່ງທ່ານ Bhandari ອະທິບາຍວ່າ:
"ພວກເຮົາກຳລັງໂອ້ລົມກັບພວກລູກຄ້າອື່ນໆ ຜູ້ທີ່ສົນໃຈອອກພັນທະບັດ ຢູ່ໃນຮ່ອງກົງ. ຈິງໆແລ້ວ ພວກລູກຄ້າທີ່ກະຕືລືລົ້ນສົນໃຈຢາກຈະສຶກ ສາເບິ່ງເລຶ່ອງນີ້ ຫລາຍທີ່ສຸດ ກໍແມ່ນພວກທີ່ມີໜ້າຢູ່ໃນຈີນແລ້ວ ເພື່ອທີ່ ພວກເຂົາເຈົ້າຈະຫາທຶນຮອນໄດ້ຢູ່ໃນຮ່ອງກົງ ແລ້ວສົ່ງກັບຄືນໄປຈີນ."
ໃນເດືອນກຸມພາຜ່ານມາ ທະນາຄານກາງຂອງຈີນໄດ້ອະນຸມັດໃຫ້ພວກບໍລິສັດຕ່າງປະເທດອອກພັນທະບັດເປັນເງິນຢວນໄດ້ທີ່ຮອງກົງ ເພື່ອສົ່ງເສີມການໃຊ້ເງິນຕາຂອງຕົນ ຢູ່ໃນ ຕະຫລາດເງິນທຶນລະຫວ່າງຊາດ.
ພັນທະບັດຂອງບໍລິສັດ McDonald ແລະພັນທະບັດອື່ນໆອີກຈໍານວນນຶ່ງຈາກພວກບໍລິສັດຕ່າງໃນຮອງກົງ ອໍານວຍໃຫ້ພວກບໍລິສັດທີ່ຖືເງິນຢວນໄວ້ຢ່າງຫລວງຫລາຍນັ້ນ ມີຊ່ອງທາງໃໝ່ໃນການເອົາເງິນຂອງເຂົາເຈົ້າໄປລົງທຶນ. ໃນເວລາດຽວກັນ ບໍລິສັດ McDonald ກໍມີ ເງິນທຶນເພິ່ມຂຶ້ນ ເພື່ອຂະຫຍາຍທຸລະກິດຂອງຕົນໃນຈີນ ບ່ອນທີ່ທາງບໍລິສັດມີແຜນການ ຈະໄຂຮ້ານອາຫານໄວທັນໃຈຂອງຕົນຂຶ້ນໃໝ່ 175 ຮ້ານໃນປີນີ້.
ໃນອະດີດຜ່ານມານັ້ນ ຈີນໄດ້ຈໍາກັດຮັດແຄບການໃຊ້ເງິນຕາຂອງຕົນ ເຄ່ງຄັດຫລາຍກວ່າໃນປັດຈຸບັນນີ້ ຄື: ພວກບໍລິສັດຕ່າງຊາດໃນຈີນ ຕ້ອງໄດ້ແລກປ່ຽນເງິນຢວນເປັນເງິນດອນລາສະຫະລັດເສຍກ່ອນ ຈຶ່ງຈະສາມາດໂອນເງິນຄືນໄປຍັງປະເທດຂອງເຂົາເຈົ້າໄດ້.
ແຕ່ວ່າເສດຖະກິດຂອງຈີນແມ່ນອາໄສກາງຕໍ່ນໍາການຂາຍສິນຄ້າສົ່ງອອກຕ່າງປະເທດ ຊຶ່ງພາໃຫ້ມີຄວາມຮຽກຮ້ອງຕ້ອງການເງິນຢວນໃນຕ່າງປະເທດເພີ່ມຂຶ້ນ. ໃນເດືອນມິຖຸນາຜ່ານມາ ທາງລັດຖະບານຈີນກໍໄດ້ອະນຸມັດໃຫ້ພວກທະນາຄານໃນຮອງກົງ ອໍານວຍຄວາມສະດວກໃນການຈ່າຍເງິນໃນການຊື້ຂາຍກັນເປັນເງິນຢວນ ລະຫວ່າງພວກບໍລິສັດ ຕ່າງໆໃນຕ່າງປະເທດນັ້ນ. ນອກນັ້ນ ທາງລັດຖະບານຍັງຜ່ອນຄາຍຂໍ້ຈໍາກັດຮັດແຄບຂອງຕົນລົງເຊ່ນກັນ ກ່ຽວກັບການໂອນເງິນຢວນ ລະຫວ່າງພວກທະນາຄານແລະພວກບໍລິສັດຕ່າງໆໃນຮອງກົງ ແລະ ອະນຸຍາດໃຫ້ພວກທີ່ມີເງິນຢວນຝາກໄວ້ໃນທະນາຄານໃນຮອງກົງນັ້ນ ເອົາເງິນຂອງເຂົາເຈົ້າໄປລົງທຶນໄດ້.
ທ່ານ Amar Gill ຫົວໜ້າຫ້ອງການຄົ້ນຄວ້າຫົວຂໍ້ສໍາຄັນທີ່ທະນາຄານລົງທຶນ CLSA Asia Pacific Markets ກ່າວວ່າ ປັດຈຸບັນນີ້ ພວກທະນາຄານທັງຫລາຍໃນຮອງກົງ ມີເງິນຢວນລວມກັນຢູ່ທັງໝົດປະ ມານ 80 ຕື້ຢວນ ຫລື 80 ພັນລ້ານຢວນ ຊຶ່ງທ່ານ Gill ສະແດງ ຄວາມເຫັນຕໍ່ໄປວ່າ:
"ຂ້າພະເຈົ້າຄາດໝາຍວ່າ ໃນອີກສອງປີຂ້າງໜ້ານີ້ ເງິນທຶນຂອງພວກທະນາຄານ ໃນຮ່ອງກົງ ກໍຄົງຈະເພິ່ມຂຶ້ນ ຢ່າງໜ້ອຍເປັນສອງເທົ່າຕົວ ຈາກຈໍານວນໃນປັດຈຸ ບັນນີ້ ແລະນັ້ນມັນກໍຈະຊ່ວຍພັດທະນາຕະຫລາດ ພັນທະບັດ ຢູ່ໃນຮ່ອງກົງ ທີ່ເປັນເງິນຈີນນັ້ນ."
ໃນຕົ້ນເດືອນນີ້ ກຸງປັກກິງໄດ້ອະນຸມັດໃຫ້ພວກທະນາກາງຫລືທະນາຄານແຫ່ງຊາດ ແລະພວກທະນາຄານພານິດຂອງຕ່າງປະເທດ ຊື້ພັນທະບັດຂອງລັດຖະບານໄດ້ໃນຈີນ. ເຖິງຢ່າງໃດກໍດີ ເງິນຢວນຍັງບໍ່ສາມາດແລກປ່ຽນກັບເງິນຕາສະກຸນອື່ນໆໄດ້ໃນທົ່ວໂລກນັ້ນ ແລະອັດຕາແລກປ່ຽນກໍຂຶ້ນລົງບໍ່ໄດ້ຢ່າງເສລີຄືກັນກັບເງິນຕາຂອງພວກປະເທດທີ່ມີການເສດຖະກິດໃຫຍ່ໆ ເຊ່ນຍີ່ປຸ່ນ ສະຫະລັດແລະເຢຍຣະມັນ ດັ່ງນີ້ເປັນຕົ້ນ. ທ່ານ Bhandari ກ່າວວ່າ ຢ່າງໃດກໍຕາມ ຈີນກໍາລັງຄືບໜ້າໄປເທື່ອລະຂັ້ນໆ ໄປສູ່ການມີເງິນຕາທີ່ແລກປ່ຽນໄດ້ໂດຍເຕັມ ແລະວ່າ ພວກເຮົາຈະໄດ້ເຫັນການຜ່ອຍຄາຍກົດລະບຽບລົງຕື່ມອີກໃນອະນາຄົດ ໃນຈັງວະທີ່ເໝາະສົມນັ້ນ.
ເຖິງແມ່ນໄດ້ມີການເຄື່ອນໄຫວເພື່ອເຮັດເງິນຢວນເປັນເງິນຕາທີ່ໃຊ້ໄດ້ທົ່ວໄປໃນລະຫວ່າງຊາດນັ້ນກໍຕາມ ແຕ່ນະໂຍບາຍແລກປ່ຽນເງິນຕາ ຂອງຈີນ ກໍຍັງຈະສືບຕໍ່ມີບັນຫາຂັດແຍ່ງກັນຢູ່ຕໍ່ໄປກັບພວກພາຄີການ ຄ້າຂອງຈີນ ເຊ່ນສະຫະລັດ ເປັນຕົ້ນ. ນອກນີ້ ທະນາຄານແຫ່ງຊາດຂອງຈີນຍັງຈໍາກັດການໂອນຍ້າຍເງິນຢວນ ໃນການເແລກປ່ຽນກັບດອນລາສະຫະລັດ ໃນແຕ່ລະວັນນັ້ນ.
ລັດຖະບານສະຫະລັດແລະພວກລັດຖະບານປະເທດອື່ນໆໂຕ້ແຍ້ງວ່າ ສິ່ງນີ້ຮັກສາຄ່າຂອງ ເງິນຢວນ ໃຫ້ຢູ່ໃນລະດັບຕໍ່າຢ່າງບໍ່ຍຸຕິທໍາ ແລະເຮັດໃຫ້ສິນຄ້າສົ່ງອອກຂອງຈີນໄດ້ປຽບຢ່າງບໍ່ຍຸຕິທໍາ ຊຶ່ງສົ່ງຜົນໃຫ້ມີດູນການຄ້າທີ່ບໍ່ກໍ້າເກິ່ງກັນ ໂດຍທີ່ຈີນເປັນຝ່າຍໄດ້ປຽບ.
