ລັດຖະບານຈີນ ແລະ ບັນດາກຸ່ມ Uighur ທີ່ລີ້ໄພຢູ່ນອກ
ປະເທດ ໄດ້ໃຫ້ຄຳອະທິບາຍ ທີ່ແຕກຕ່າງກັນ ກ່ຽວກັບວ່າ
ແມ່ນອັນໃດທີ່ໄດ້ນຳໄປສູ່ຄວາມບໍ່ສະຫງົບຫຼ້າສຸດ ທີ່ເກີດ
ຂຶ້ນຢູ່ໃນ ເຂດ Xinjiang ທີ່ມີບັນຫາ ບ່ອນທີ່ມີຫຼາຍໆຄົນ
ໄດ້ເສຍຊີວິດໄປ ໃນອາທິດນີ້.
Xinhua ອົງການຂ່າວທາງການ ຂອງຈີນ ກ່າວວ່າ ຄວາມ
ຮຸນແຮງ ເລີ້ມຂຶ້ນ ເວລາຝຸງຊົນທີ່ຖືມີດແລະຂວັນເປັນອາວຸດ
ໄດ້ເຂົ້າໂຈມຕີ ສະຖານີຕຳຫລວດແຫ່ງນຶ່ງ ພ້ອມກັບຫ້ອງການ
ລັດ ແລະ ພົນລະເມືອງ ຫຼາຍໆແຫ່ງ ຢູ່ 2 ເມືອງນ້ອຍ ໃນເຂດ
ຫົວເມືອງ Shache ເຮັດໃຫ້ມີພົນລະເຮືອນ ຫຼາຍສິບຄົນເສຍ
ຊີວິດ ໃນວັນຈັນຜ່ານມາ.
ອົງການຂ່າວ Xinhua ກ່າວວ່າ ຕຳຫລວດໄດ້ຍິງຕອບໂຕ້ ເຮັດໃຫ້ ຫຼາຍສິບຄົນ ໃນກຸ່ມ
ຝຸງຊົນທີ່ທຳການໂຈມຕີນັ້ນ ເສຍຊີວິດ. ຊິນຫົວ ກ່າວຕື່ມວ່າ ການສືບສວນສອບສວນ
ຂັ້ນຕົ້ນ ຊີ້ບອກວ່າ ເຫດຮ້າຍດັ່ງ ກ່າວ ແມ່ນເປັນ “ການໂຈມຕີຂອງພວກກໍ່ການຮ້າຍ
ທີ່ໄດ້ມີການວາງແຜນໄວ້ລ່ວງໜ້າ” ຊຶ່ງເປັນຄຳເວົ້າທີ່ ປັກກິ່ງນຳໃຊ້ໂດຍທົ່ວໄປ ໃນ
ການບັນລະຍາຍ ເຫດການກໍ່ຄວາມບໍ່ສະຫງົບຢູ່ໃນເຂດ Xinjiang.
ບັນດາກຸ່ມ Uighur ທີ່ລີ້ໄພຢູ່ນອກປະເທດ ໄດ້ໂຕ້ແຍ້ງຕໍ່ລາຍງານດັ່ງກ່າວຂອງ
ລັດຖະບານຈີນ.
ຢູ່ໃນຄຳຖະແຫລງສະບັບນຶ່ງ ສະມາຄົມວີເກີອາເມຣິກັນ ຫຼື Uyghur American
Association ໄດ້ກ່າວປະນາມ ອັນທີ່ຕົນເອີ້ນວ່າ “ການໃຊ້ຄວາມຮຸນແຮງຫຼາຍເກີນ
ຂອບເຂດຂອງທາງການ.” ເຂົາເຈົ້າກ່າວອີກວ່າ ພວກພົນລະເມືອງເຫລົ່ານັ້ນກຳລັງ
ພາກັນປະທ້ວງຕໍ່ “ການປາບປາມແບບໜັກມື ໃນເທດສະການ Ramadan”
ຂອງປັກກິ່ງ ແລະ “ການໃຊ້ກຳລັງອາວຸດທີ່ຮ້າຍແຮງຕໍ່ຊີວິດ ແບບນອກກົດໝາຍ
ໃນຫຼາຍອາທິດຜ່ານມານີ້.”
ວີດີໂອ: ການປາບປາມຂອງຈີນ ຕໍ່ຊາວມຸສລິມ ໃນເດືອນຣາມາດານ:
