ນາຍົກລັດຖະມົນຕີຈີນ ທ່ານ Wen Jiabao ໃຫ້ຄຳໝັ້ນສັນຍາໃນວັນພະຫັດມື້ນີ້ວ່າ ຈະທຳ
ການສືບສວນຢ່າງຄົບຖ້ວນແລະເປີດກວ້າງ ກ່ຽວກັບອຸບັດຕິເຫດທາງລົດໄຟ ທີ່ຮ້າຍແຮງສຸດ
ນັບແຕ່ປີ 2008 ເປັນຕົ້ນມາ ໂດຍເວົ້າວ່າ ຜູ້ໃດກໍຕາມທີ່ຖືກພົບເຫັນວ່າມີຄວາມຜິດຈະຕ້ອງ
ຖືກລົງໂທດຢ່າງໜັກ.
ທ່ານ Wen ຍັງໄດ້ກ່າວອີກວ່າເລື່ອງທີ່ຮີບດ່ວນສຸດສຳລັບລັດຖະບານກໍຄືປົກປ້ອງຊີວິດຂອງ
ປະຊາຊົນໃນລະຫວ່າງການເດີນທາງໃນວັນພະຫັດມື້ນີ້ໄປເບິ່ງບ່ອນທີ່ລົດໄຟເກີດອຸບັດຕິເຫດ
ໃນມື້ວັນເສົາແລ້ວທີ່ເຮັດໃຫ້ມີຜູ້ເສຍຊີວິດຢ່າງນ້ອຍ 39 ຄົນ ແລະບາດເຈັບອີກເກືອບ 200
ຄົນນັ້ນ.
ກ່ອນໜ້ານັ້ນໃນເຊົ້າວັນພະຫັດມື້ນີ້ເຈົ້າໜ້າທີ່ລົດໄຟຂອງຈີນກ່າວວ່າ ອຸບັດຕິເຫດທີ່ວ່ານີ້ແມ່ນ
ເກີດຈາກການອອກແບບທີ່ບົກຜ່ອງກ່ຽວກັບອຸບປະກອນສົ່ງສັນຍານ ທີ່ບໍ່ເຮັດໃຫ້ໄຟຂຽວປ່ຽນ
ເປັນໄຟແດງຫຼັງຈາກໄດ້ເກີດຟ້າຜ່າທີ່ເຮັດໃຫ້ຂະບວນລົດໄຟຄວາມໄວສູງຢຸດເຊົາແລ່ນໃນເສັ້ນ
ທາງທີ່ຢູ່ທາງທິດໃຕ້ຂອງນະຄອນຊຽງໄຮ້ ຊຶ່ງເປັນເຫດໃຫ້ລົດໄຟຂະບວນທີ 2 ແລ່ນເຂົ້າຕຳ
ທາງຫຼັງຂອງລົດໄຟຂະບວນທຳອິດສົ່ງຜົນໃຫ້ລົດໄຟຫຼາຍຕູ້ຕົກລົງຈາກຂົວ.
ນອກນັ້ນເຈົ້າໜ້າທີ່ຍັງເວົ້າວ່າ ເຈົ້າໜ້າທີ່ຄວບຄຸມຢູ່ສະຖານີເມືອງ Wenzhou ຄວນຈະເຂົ້າ
ແຊກແຊງດ້ວຍການບັງຄັບດ້ວຍມືຫຼັງຈາກອຸບປະກອນໃຫ້ສັນຍານທີ່ຈີນຜະລິດນັ້ນບໍ່ທໍາງານ.
