//ສຽງປະກາດຢູ່ສະຖານີລົດໄຟ//
ຈີນແມ່ນອວດອ້າງໄດ້ວ່າ ມີລະບົບລົດໄຟທີ່ໄວທີ່ສຸດຂອງ
ໂລກ ແລະໄດ້ເລີ່ມດໍາເນີນໂຄງການທີ່ໃຫຍ່ໂຕໂຄງການນຶ່ງ
ເພື່ອເຊື່ອມໂຍງຫລາຍໆຕົວເມືອງໃສ່ກັນໂດຍລົດໄຟຄວາມ ໄວສູງ.
ແຜນງົບປະມານ ມູນຄ່າ 274 ພັນລ້ານໂດລາທີ່ວ່ານີ້
ແມ່ນເປັນພາກສ່ວນນຶ່ງຂອງນະໂຍບາຍກໍ່ສ້າງໂຄງລ່າງພື້ນ
ຖານ ທີ່ມີຄ່າໃຊ້ຈ່າຍຫລາຍຮ້ອຍລ້ານໂດລາ. ລັດຖະບານ
ຈີນມີເປົ້າໝາຍທີ່ຈະສ້າງທາງລົດໄຟໃຫ້ໄດ້ ໃນໄລຍະທາງ
ຢ່າງໜ້ອຍ 30,000 ຫລັກກິໂລເເມັດພາຍໃນສອງສາມປີ
ຕໍ່ໜ້ານີ້ ຊຶ່ງເກືອບວ່າເຄິ່ງນຶ່ງແມ່ນສໍາລັບລົດໄຟຄວາມໄວສູງ
ແຕ່ທ່ານ ເຊງ ກວາງຊູ ລັດຖະມົນຕີກະຊວງລົດໄຟຄົນໃໝ່
ແມ່ນຕ້ອງໄດ້ປ້ອງການແຜນການນີ້ ຈາກການຕໍາໜິຕິຕຽນຢ່າງລົ້ນເຫລືອ
ເລຶ່ອງນີ້ ສ່ວນໃຫຍ່ແລ້ວແມ່ນເລີ່ມຕົ້ນຂື້ນຈາກການໄລ່ລັດຖະມົນຕີກະຊວງລົດໄຟຄົນກ່ອນ
ທ່ານ ຫລິວ ຊີຈຸນ ອອກ ເມື່ອໝໍ່ໆມານີ້ ຊຶ່ງຜູ້ກ່ຽວໄດ້ເປັນລັດຖະມົນຕີກະຊວງລົດໄຟມາໄດ້
8 ປີ ພ້ອມກັບມີການກ່າວຫາວ່າ ໄດ້ມີການຍັກຍອກເງິນ ຈໍານວນ 121 ລ້ານໂດລາ ພາຍ
ໃຕ້ການປົກຄອງຂອງທ່ານນັ້ນ.
ພວກເຈົ້າໜ້າທີ່ອື່ນໆໃນກະຊວງ
ລົດໄຟອີກຫລາຍຄົນ ກໍໄດ້ຖືກ
ໄລ່ອອກ ແລະຖືກກັກຂັງໃນຂໍ້ ຫາສໍ້ລາດບັງຫລວງ.
ເວລານີ້ ຄາດກັນວ່າຈະມີການ
ນໍາສະເໜີ ຢ່າງໜ້ອຍຂໍ້ສະເໜີ
ນຶ່ງເພື່ອໃຫ້ຕັດໂຄງການລະບົບ
ລົດໄຟຄວາມໄວສູງນີ້ ໂດຍກຸ່ມ
ທີ່ປຶກສາສູງສຸດກຸ່ມນຶ່ງ ໃນລະ
ຫວ່າງກອງປະຊຸມຫລວງຂອງ
ສະພາປະຊາຊົນແຫ່ງຊາດຈີນ ໃນອາທິດນີ້.
ແຕ່ລັດຖະມົນຕີກະຊວງລົດໄຟຄົນໃໝ່ກ່າວວ່າ ການໄລ່ທ່ານຫລິວອອກນັ້ນ ຈະບໍ່ສົ່ງຜົນກະ
ທົບໃດໆຕໍ່ແຜນການດັ່ງກ່າວ.
ທ່ານ Bernard Bullock ຜູ້ຊ່ຽວຊານລະບົບທາງລົດໄຟຂອງທະນາຄານໂລກ ທີ່ເຮັດວຽກ
ກັບລັດຖະບານຈີນກ່ຽວກັບໂຄງການພັດທະນາຕ່າງໆກ່າວວ່າ ການໄລ່ທ່ານຫລິວອອກນັ້ນ ບໍ່ມີທ່າທາງທີ່ຈະຍຸຕິໂຄງການພັດທະນາປະເທດໃຫ້ທັນສະໃໝນັ້ນແຕ່ຢ່າງໃດ ແຕ່ທ່ານກ່າວ
ຕື່ມວ່າ ຜູ້ມາສືບຕໍາແໜ່ງແທນທ່ານຫລິວນັ້ນ ກໍໄດ້ທໍາການປ່ຽນແປງທີ່ສໍາຄັນໆຫລາຍຢ່າງ. ທ່ານ Bullock ເວົ້າວ່າ
“ລັດຖະມົນຕີກະຊວງລົດໄຟຄົນໃໝ່ໄດ້ເນັ້ນໜັກ ໃສ່ສອງດ້ານດ້ວຍກັນ ຄືດ້ານ
ກົນໄກຄວາມປອດໄພ ແລະການຈັດຫາ ຊຶ່ງສິ່ງເຫລົ່ານີ້ແມ່ນຮ່ອງຮອຍຂອງການ
ປ່ຽນແປງໃນວິທີການບໍລິຫານງານ.”
ຖ້າຫາກແຜນການເສີມຂະຫລາຍສໍາເລັດລົງແລ້ວ ຈີນກໍຈະເປັນປະເທດທີ່ມີລະບົບໂຄງລ່າງ
ພື້ນຖານທາງລົດໄຟທີ່ໃຫຍ່ອັນດັບສອງຂອງໂລກ ລອງລົງມາຈາກສະຫະລັດ. ແຕ່ເລຶ້ອງ
ຂ່າວນອງນັນກ່ຽວກັບທາງລົດໄຟນັ້ນ ແມ່ນຕິດຕາມມາ ຫລັງຈາກມີການສະແດງຂໍ້ຂ້ອງໃຈ
ຕ່າງໆອອກມາ ກ່ຽວກັບເລື້ອງເສດຖະກິດຫລືຄ່າໃຊ້ຈ່າຍຂອງໂຄງການລົດໄຟຄວາມໄວສູງ
ທີ່ສ່ວນໃຫຍ່ແລ້ວ ແມ່ນໃຊ້ງົບປະມານຈາກເງິນກູ້ຢືມນັ້ນ.
ພວກນັກວິຈານບາງຄົນກ່າວວ່າ ຕານ່າງລົດໄຟດັ່ງກ່າວເບິ່ງຄືວ່າໃຫຍ່ໂຕມະໂຫລານເກີນໄປ
ເມື່ອພິຈາລະນາເບິ່ງຄວາມກ້ວາງໃຫຍ່ໄພສານຂອງປະເທດຈີນ ແລະລາຍໄດ້ສະເລ່ຍຕໍ່ຫົວ
ຄົນຕໍ່ປີທີ່ຕໍ່າ. ພວກນັກວິຈານກ່າວອີກວ່າ ເພື່ອຈະໃຫ້ໄດ້ເງິນມາໃຊ້ໜີ້ຄ່າກໍ່ສ້າງຄືນນັ້ນ ກໍຈະ
ຕ້ອງໄດ້ຂາຍປີ້ໃນລາຄາສູງຫລາຍ ຈົນວ່າພວກຄົນຈີນສ່ວນໃຫຍ່ ຈະບໍ່ສາມາດຊື້ໄດ້.
ແມ່ນແຕ່ ສະຖາບັນການຄົ້ນຄວ້າ
ແຫ່ງຊາດ ກໍຄືສະຖາບັນວິທະຍາ
ສາດນັ້ນ ກໍໄດ້ລາຍງານເມື່ອປີ
ຜ່ານມານີ້ວ່າຖ້າພິຈາລະນາຕາມ
ການລົງທຶນໃນປັດຈຸບັນນີ້ ແລະ
ຈໍານວນຜູ້ໂດຍສານທີ່ກະປະມານ
ເອົາແລ້ວ ພວກລົດໄຟເຫລົ່ານີ້
ແມ່ນຈະບໍ່ສາມາດເກັບເງິນຈາກ
ຄ່າໂດຍສານໄດ້ຢ່າງພຽງພໍ ເພື່ອ
ຈະໃຊ້ຄ່າກູ້ຢືມມາກໍ່ສ້າງນັ້ນຄືນ ໄດ້.
ເງິນຈໍານວນມະຫາສານທີ່ກ່ຽວ
ພັນກັບໂຄງການລົດໄຟທີ່ວ່ານີ້
ແລະການຊື້ຂາຍທີ່ດິນທີ່ພົວພັນ
ກັບໂຄງການ ໄດ້ເອື້ອອໍານວຍ
ໂອກາດໃຫ້ມີການສໍ້ລາດບັງຫລວງ ຢ່າງຫລວງຫລາຍ ແລະນັ້ນໄດ້ກໍ່ໃຫ້ເກີດຄວາມຢ້ານກົວ
ກ່ຽວກັບຄວາມປອດໄພໄລຍະຍາວຂອງທາງລົດໄຟແລະພາກສ່ວນອື່ນໆຂອງຕາໜ່າງລົດໄຟ.
ການສໍ້ລາດບັງຫລວງເປັນບັນຫາໃຫຍ່ຢູ່ໃນຈີນ ແລະລັດຖະບານພັກຄອມມີວນີສຈີນ ກໍໄດ້
ພະຍາຍາມທີ່ຈະກວາດລ້າງຢູ່ຕະຫລອດມາ. ການໄລ່ທ່ານຫລິວອອກນັ້ນ ເຫັນວ່າເປັນເລື້ອງ
ສໍາຄັນຫລາຍ ເນື່ອງຈາກວ່າເຈົ້າໜ້າທີ່ລະດັບສູງຂອງພັກຄອມມີວນີສຈີນ ບໍ່ຄ່ອຍຈະຖືກໄລ່
ອອກ ຍ້ອນການສໍ້ລາດບັງຫລວງນັ້ນ.
ທ່ານ ຫວັງ ຢູ່ໄກ ຊ່ຽວຊານຝ່າຍຕໍ່ຕ້ານການສໍ້ບາດບັງຫລວງ ປະຈໍາສະຖາບັນການປົກ
ຄອງຂອງຈີນ ກ່າວວ່າ ການໄລ່ທ່ານຫລິວອອກ ສະແດງໃຫ້ເຫັນວ່າ ລັດຖະບານຈີນບໍ່ໄດ້
ເມີນເສີຍ ຕໍ່ການສໍ້ລາດບັງຫລວງ ໃນລະດັບສູງ ຕໍ່ໄປອີກແລ້ວ.
//ສຽງພາສາຈີນ//
ທ່ານຫວັງກ່າວວ່າ ມັນເປັນການສໍາຄັນທີ່ຈະເອື້ອອໍານວຍໃຫ້ສື່ມວນຊົນ ວົງການອິນເທີເເນັດ
ແລະມະຫາຊົນ ມີອໍານາດໃນການຕີຄວາມໝາຍແລະເຂົ້າໃຈໃນສິ່ງທີ່ກໍາລັງດໍາເນີນໄປ ຢູ່ໃນ
ກະຊວງກົມກອງຕ່າງໆຂອງລັດຖະບານ ເຊັ່ນ ກະຊວງລົດໄຟເປັນຕົ້ນນັ້ນ.
ທ່ານຫວັງ ກ່າວວ່າ ນັ້ນແມ່ນວິທີທາງທີ່ສໍາຄັນ ເພື່ອແກ້ໄຂບັນຫາການສໍ້ລາດບັງຫລວງ
ຊຶ່ງທ່ານຫວັງກ່າວວ່າ ມັນເລິກຫລາຍທີ່ສຸດຢູ່ໃນຈີນ ໃນເວລານີ້.
ການປຸກລະດົມໃນຫລາຍໆຄັ້ງທີ່ຜ່ານມາ ເພື່ອກໍາຈັດຖອນຮາກພວກເຈົ້າໜ້າທີ່ທີ່ສໍ້ລາດບັງ
ຫລວງທັງຫລາຍນັ້ນ ສ່ວນໃຫຍ່ແລ້ວ ບໍ່ໄດ້ປະສົບຜົນສໍາເລັດ.
ນາຍົກລັດຖະມົນຕີຈີນ ທ່ານເຫວິນ ເຈ້ຍ
ບາວ ກ່າວຕອນນຶ່ງໃນຄໍາປາໃສ ໄຂກອງ
ປະຊຸມຫລວງຂອງສະພາປະຊາຊົນແຫ່ງ
ຊາດຈີນ ເມື່ອວັນເສົາຜ່ານມານີ້ວ່າ ການ
ຊໍາລະສະສາງໃຫ້ປະເທດພົ້ນຈາກການສໍ້
ລາດບັງຫລວງນັ້ນ ຖືເປັນບູລິມະສິດອັນດັບ
ສູງສຸດອັນນຶ່ງ ເນຶ່ອງຈາກວ່າການສໍ້ລາດບັງ
ຫລວງຊ່ວຍກໍ່ໃຫ້ເກີດຄວາມບໍ່ພໍໃຈໃນໝູ່ ປະຊາຊົນ.
ແຕ່ການໄລ່ທ່ານຫລິວອອກ ອາດກາຍເປັນ
ດາບສອງຄົມໄດ້ ຄືຊີ້ໃຫ້ເຫັນໃນດ້ານນຶ່ງວ່າ
ພວກຜູ້ນໍາບໍ່ມີການລໍາອຽງຫລືເຂົ້າຂ້າງອອກ
ຂາໃນການປຸກລະດົມກວາດລ້າງການສໍ້ລາດ
ບັງຫລວງຄັ້ງລ່າສຸດນີ້ ແລະໃນອີກດ້ານນຶ່ງ
ມັນກໍອາດເປັນການເນ້ນຢໍ້າຄວາມເຫັນຂອງມະຫາຊົນ ທີ່ວ່າການສໍ້ລາດບັງຫລວງແມ່ນມີ
ຢູ່ໃນທົ່ວທຸກຂັ້ນທຸກລະດັບຊັ້ນຂອງພກເຈົ້າ ໜ້າທີ່.
//ສຽງພາສາຈີນ//
ນາຍ Meng Qingyi ຜູ້ໂດຍສານລົດໄຟ ອາຍຸ 26 ປີ ທໍາງານຢູ່ບໍລິສັດເຫລັກແຫ່ງນຶ່ງ
ກ່າວວ່າ ມັນເປັນສິ່ງທີ່ດີຫລາຍ ທີ່ລັດຖະບານໄດ້ໄລ່ເຈົ້າໜ້າທີ່ບາງຄົນ ທີ່ຢູ່ໃນລະດັບສູງ
ຄືທ່ານຫລິວ ນັ້ນອອກ ແຕ່ນາຍ Meng ກໍຫວັງວ່າ ເລື່ອງນອງນັນກ່ຽວກັບການສໍ້ລາດ
ບັງຫລວງນັ້ນ ຈະບໍ່ຢຸດແຜນການສ້າງລົດໄຟຄວາມໄວສູງແຕ່ຢ່າງໃດ ເພາະວ່າລົດໄຟທີ່
ແລ່ນໄວໆນັ້ນ ແມ່ນສໍາຄັນຫລາຍຕໍ່ຄົນຈີນ ຄືລາວ.
