ກຸ່ມນັກຂ່າວທີ່ສຳຄັນກຸ່ມນຶ່ງກ່າວວ່າ ພວກນັກຂ່າວຕ່າງ
ປະເທດທີ່ປະຈຳຢູ່ຈີນໄດ້ຖືກພວກເຈົ້າໜ້າທີ່ຮັກສາຄວາມ
ສະຫງົບ ຮຽກໂຕໄປພົບຢ່າງເປັນລະບົບ ແລະເຕືອນບໍ່
ໃຫ້ລາຍງານຂ່າວໃດໆກໍຕາມ ໂດຍບໍ່ໄດ້ຮັບອະນຸຍາດຢູ່
ບ່ອນທີ່ ມີປະທ້ວງຕ່າງໆໃນທົ່ວປະເທດ.
ສະໂມສອນນັກຂ່າວຕ່າງປະເທດຢູ່ຈີນກ່າວໃນຈົດໝາຍ
ສະບັບນຶ່ງທີ່ສົ່ງໄປເຖິງສະມາຊິກຂອງຕົນໃນວັນພະຫັດ
ມື້ນີ້ວ່າມີນັກຂ່າວຫຼາຍສິບຄົນ ທີ່ປະຈຳຢູ່ນະຄອນຫຼວງ
ປັກກິ່ງ ແລະນະຄອນຊຽງໄຮ້ ໄດ້ຖືກເຈົ້າໜ້າທີ່ຈີນຮຽກ
ໂຕໄປພົບໃນສັບປະດານີ້. ພວກນັກຂ່າວສ່ວນໃຫຍ່ໄດ້
ໄປມີໜ້າ ຢູ່ບ່ອນທີ່ຂ່າວທີ່ລົງແບບລຶກລັບທາງອິນເຕີ
ແນັດບອກວ່າ ຈະມີການປະທ້ວງໃນມື້ວັນອາທິດແລ້ວ ແລະພວກເຂົາເຈົ້າໄດ້ຖືກຮາວີແລະທຸບຕີນັ້ນ.
ສະໂມສອນນັກຂ່າວຕ່າງປະເທດເວົ້າວ່າ ການໄປພົບພໍ້
ກັບເຈົ້າໜ້າທີ່ຂອງຫ້ອງການຮັກສາຄວາມສະຫງົບພາຍ
ໃນຂອງຈີນ ແມ່ນໄດ້ຖືກຕຳຫຼວດຖ່າຍວີດີໂອໄວ້ຂະນະທີ່ພວກນັກຂ່າວ ບໍ່ໄດ້ຮັບອະນຸຍາດ
ໃຫ້ຈົດບັນທຶກໃດໆ. ສະໂມສອນນັກຂ່າວຕ່າງປະເທດກ່າວຕື່ມວ່າ ພວກນັກຂ່າວຖືກເຕືອນ
ວ່າ ເຂົາເຈົ້າຈະຖືກຖອນໃບອະນຸຍາດໃຫ້ເຮັດວຽກຢູ່ໃນຈີນຫຼືປະເຊີນກັບການຖືກລົງໂທດ
ຖ້າພວກເຂົາເຈົ້າ ຫາກໄປຍັງສະຖານທີ່ເຫລົ່ານັ້ນອີກ ໂດຍບໍ່ໄດ້ຮັບອະນຸຍາດ.
ຫຼາຍໆອົງການຂ່າວທີ່ສຳຄັນໆກ່າວວ່າ ພວກນັກຂ່າວຂອງຕົນ ໄດ້ຖືກເອີ້ນໄປພົບແລະກໍ
ໄດ້ຮັບການເຕືອນໃນທຳນອງດຽວກັນນີ້.
