ເກືອບໜຶ່ງສັບປະດາຫຼັງຈາກພ່າຍແພ້ຄະດີອັນເປັນປະຫວັດສາດ ກ່ຽວກັບ ການອ້າງເອົາ ເຂດແດນໃນທະເລຈີນໃຕ້ແລ້ວ, ຈີນ ກໍໄດ້ປິດພາກສ່ວນຂອງພາກພື້ນດັ່ງກ່າວສຳລັບ ການຝຶກຊ້ອມທາງທະຫານໃນສັບປະດານີ້.
ອົງການການເດີນເຮືອທາງທະເລຂອງ ປັກກິ່ງ ໄດ້ອອກຄຳເຕືອນໃນວັນຈັນມື້ວ່າ ເຂດ ແດນທີ່ຕັ້ງຢູ່ພາກຕາເວັນອອກສຽງໃຕ້ຂອງເກາະແຂວງ Hainan ຈະໄດ້ຖືກຫ້າມເຂົ້າໃກ້ ໃນລະຫວ່າງ ວັນອັງຄານຫາວັນພະຫັດນີ້.
ສານຍຸຕິທຳສາກົນຂອງອົງການສະຫະປະຊາຊາດໃນເມືອງ The Hague ໄດ້ປະຕິເສດ ການອ້າງອີງອຳນາດອະທິປະໄຕທັງໝົດຂອງທະເລຈີນໃຕ້ ເຊິ່ງມີເນື້ອທີ່ເກືອບ 3 ລ້ານ 5 ແສນ ຕາລາງກິໂລແມັດ ໃນການຕັດສິນໃນວັນອັງຄານສັບປະດາແລ້ວນີ້. ການຕັດສິນ ແມ່ນການຕອບຮັບຕໍ່ຄຳຕຳໜິຍື່ນຟ້ອງໂດຍປະເທດ ຟີລິບປິນ ໃນປີ 2013 ກ່ຽວກັບ ການ ກະທຳທີ່ຮ້າຍແຮງຂອງ ຈີນ ໃນແນວຫີນປະກາລັງ Scarborough Shaol ທີ່ຕັ້ງຢູ່ປະ ມານ 225 ກິໂລແມັດຫ່າງຈາກຊາຍຝັ່ງຂອງ ຟີລິບປິນ.
ສານທີ່ມີຫ້ອງການຕັ້ງຢູ່ເມືອງ The Hague ໄດ້ຕັດສິນວ່າ ການກ່າວອ້າງຂອງຈີນ ພາຍ ໃຕ້ສິ່ງທີ່ເອີ້ນວ່າ Nine-dash line ນັ້ນໄດ້ລ່ວງລະເມີດສົນທິສັນຍາສະຫະປະຊາຊາດ ກ່ຽວກັບ ກົດໝາຍທາງທະເລ, ເຊິ່ງໄດ້ກຳນົດເຂດແດນທາງທະເລຂອງປະເທດ 22 ກິໂລ ແມັດ ຈາກຊາຍຝັ່ງຂອງພວກເຂົາເຈົ້າ, ແລະ ການຄວບຄຸມກິດຈະກຳດ້ານເສດຖະກິດ ໄກເຖິງ 370 ກິໂລແມັດຈາກຊາຍຝັ່ງຂອງເຂົາເຈົ້າ.
ປັກກິ່ງ ໄດ້ປະຕິເສດທີ່ຈະເຂົ້າຮ່ວມໃນຄະດີ, ໂດຍກ່າວວ່າສານບໍ່ມີອຳນາດທີ່ຈະຕັດສິນ ກ່ຽວກັບບັນຫາດັ່ງກ່າວ, ແມ່ນກະທັ້ງທີ່ເປັນຜູ້ລົງນາມໃນສັນຍາ UNCLOS ແລະ ໄດ້ ກ່າວປະນາມຊ້ຳແລ້ວຊ້ຳອີກການຕັດສິນດັ່ງກ່າວ.
