ລັດຖະບານ ມະນີລາ ອອກມາຢັ້ງຢືນໃນວັນຈັນມື້ນີ້ວ່າ ຕົນຈະສືບຕໍ່ “ຢືນຢັນສິດຂອງພວກເຮົາ” ຕໍ່ຈຸດສຳຄັນຂອງເກາະຫີນປະກາລັງໃນຂົງເຂດທະເລຈີນໃຕ້, ລຸນຫຼັງການບັນລຸຂໍ້ຕົກລົງກັບ ປັກກິ່ງ ກ່ຽວກັບການສະໜອງສະບຽງຄືນໃຫ້ກອງທະຫານ ຟີລິບປິນ ທີ່ປະຈຳການຢູ່ກຳປັ່ນລົບ ເຊິ່ງຈອດຢູ່ບໍລິເວນດັ່ງກ່າວ.
ກະຊວງການຕ່າງປະເທດຂອງ ຟີລິບປິນ ຍັງໄດ້ປະຕິເສດຂໍ້ສະເໜີຂອງ ຈີນ ທີ່ໄດ້ປະກາດ “ການຈັດຕັ້ງຊົ່ວຄາວ” ໃນວັນອາທິດວານນີ້ ໂດຍຮຽກຮ້ອງ ມະນີລາ ຈົ່ງ “ແຈ້ງການລ່ວງໜ້າ” ໃຫ້ ປັກກິ່ງ ຮັບຮູ້ ພ້ອມທັງຢັ້ງຢືນການສົ່ງມອບສະບຽງໃຫ້ແກ່ກໍາປັ່ນ BRP Sierra Madre ຢູ່ບໍລິເວນຊາຍຫາດ ໂທມັສ ທີສອງ.
ຈີນ ໄດ້ອ້າງສິດເອົາຂອບເຂດທະເລຈີນໃຕ້ເກືອບທັງໝົດ, ລວມທັງເກາະຫາດຊາຍໂທມັສທີສອງ ເຊິ່ງຢູ່ຫ່າງຈາກເກາະ ປາລາວານ ທີ່ຕັ້ງຢູ່ບໍລິເວນພາກຕາເວັນຕົກຂອງ ຟີລິບປິນ ປະມານ 200 ກິໂລແມັດ, ແລະມີໄລຍະທາງໄກກວ່າ 1,000 ກິໂລແມັດຈາກເກາະໃຫຍ່ ໄຫໜານ ທີ່ເປັນເກາະທີ່ໃກ້ທີ່ສຸດຂອງຈີນ.
ໂຄສົກກະຊວງການຕ່າງປະເທດ ທ່ານນາງ ເທເຣຊິຕາ ດາຊາ (Teresita Daza) ກ່າວໃນຖະແຫຼງການສະບັບນຶ່ງວ່າ “ຫຼັກການ ແລະວິທີການເຂົ້າເຖິງອັນສໍາຄັນທີ່ໄດ້ວາງອອກໃນຂໍ້ຕົກລົງ ແມ່ນບັນລຸໄດ້ໂດຍຜ່ານການຫາລືຢ່າງລະມັດລະວັງ ແລະລະອຽດທີ່ສຸດຂອງທັງສອງຝ່າຍ ເຊິ່ງໄດ້ແຜ່ວທາງໄປສູ່ການລວບລວມແນວຄວາມຄິດ ໂດຍບໍ່ມີການຜ່ອນຜັນສະຖານະຕ່າງໆຂອງປະເທດ.”
ທ່ານນາງ ດາຊາ ກ່າວວ່າ “ຄຳຖະແຫຼງຂອງໂຄສົກກະຊວງການຕ່າງປະເທດຈີນ ກ່ຽວກັບການແຈ້ງການລ່ວງໜ້າ ແລະການຢືນຢັນກ່ຽວກັບສະຖານທີ່ດັ່ງ ກ່າວ ແມ່ນບໍ່ຖືກຕ້ອງ.”
ທ່ານນາງກ່າວຕື່ມວ່າ ຟີລິບປີນ “ຈະຍັງຄົງສືບຕໍ່ຢືນຢັນສິດ ແລະອຳນາດຂອງພວກເຮົາຢູ່ໃນຂົງເຂດທະເລຂອງພວກເຮົາ,” ລວມເຖິງ ຫາດໂທມັສທີສອງ ນໍາອີກດ້ວຍ.
ຫາດ ທີ່ອຸດົມສົມບູນໄປດ້ວຍປານາໆຊະນິດ ແມ່ນເປົ້າໝາຍຂອງການປະທະກັນທີ່ຮຸນແຮງລະຫວ່າງກຳປັ່ນ ຈີນ ແລະ ຟີລິບປິນ ຫຼາຍລໍາ ໃນຊ່ວງເວລາບໍ່ເທົ່າເດືອນທີ່ຜ່ານມານີ້, ໃນຂະນະທີ່ ປັກກິ່ງ ໄດ້ເພີ້ມຄວາມພະຍາຍາມເພື່ອຜັກດັນໃນການອ້າງເອົາກຳມະສິດຂອງຕົນຢູ່ບໍລິເວນຂົງເຂດທະເລຈີນໃຕ້ເກືອບທັງໝົດ.
