ຈີນ ໄດ້ດຳເນີນການ “ຊ້ອມລົບໃນການລາດຕະເວນ” ເມື່ອວັນອາທິດວານນີ້ ຢູ່ບໍລິເວນທະເລຈີນໃຕ້, ອີງຕາມການກ່າວຂອງກອງທັບພວກເຂົາເຈົ້າ. ໃນມື້ດຽວກັນ, ຟີລິບປິນ, ສະຫະລັດ, ຍີ່ປຸ່ນ ແລະ ອອສເຕຣເລຍ ກໍໄດ້ດຳເນີນການຊ້ອມລົບຮ່ວມກັນຄັ້ງທຳອິດຢູ່ຂົງເຂດນ່ານນ້ຳທີ່ມີຂໍ້ພິພາດກັນນັ້ນ.
ການເຄື່ອນໄຫວທາງທະເລດັ່ງກ່າວ ໄດ້ດຳເນີນການມາຫຼາຍວັນກ່ອນທີ່ປະທານາທິບໍດີສະຫະລັດ ທ່ານໂຈ ໄບເດັນ ມີກໍານົດຈະຈັດກອງປະຊຸມສຸດຍອດສາມຝ່າຍຄັ້ງທຳອິດ ກັບບັນດາຜູ້ນຳຂອງ ຟີລິບປິນ ແລະ ຍີ່ປຸ່ນ, ເຊິ່ງຄວາມເຄັ່ງຕຶງກໍາລັງເພີ້ມຂຶ້ນຢູ່ຂົງເຂດທະເລຈີນໃຕ້ ທີ່ມີການໂຕ້ແຍ້ງກັນຢ່າງຮ້ອນແຮງ ໃນວາລະຂອງກອງປະຊຸມ.
ກອງບັນຊາການສະມໍລະພູມປະຈໍາພາກໃຕ້ຂອງກອງທັບປົດປ່ອຍປະຊາຊົນ ຫຼື PLA ຂອງປັກກິ່ງ ກ່າວວ່າ ຕົນກໍາລັງຈັດ "ການຊ້ອມລົບຮ່ວມທາງທະເລ ແລະທາງອາກາດ ຢູ່ບໍລິເວນທະເລຈີນໃຕ້."
ພວກເຂົາກ່າວໃນຖະແຫຼງການວ່າ "ທຸກໆກິດຈະກໍາທາງທະຫານທີ່ເຮັດໃຫ້ເກີດຄວາມຫຍຸ້ງຍາກສັບສົນໃນທຸກສະຖານະການຢູ່ຂົງເຂດທະເລຈີນໃຕ້ ແລະສ້າງຈຸດເຄັ່ງຕຶງຂຶ້ນຫຼາຍແຫ່ງ ແມ່ນຢູ່ພາຍໃຕ້ການຄວບຄຸມ,” ໃນສິ່ງທີ່ປາກົດວ່າ ເປັນການຕ້ອງຕິ ຕໍ່ການຊ້ອມລົບອື່ນໆ ທີ່ກໍາລັງຈັດຂຶ້ນໃນນ່ານນ້ໍາຕ່າງໆນັ້ນ.
ກອງທັບຟີລິບປິນ ກ່າວວ່າ ການຊ້ອມລົບຂອງຕົນກັບ ສະຫະລັດ, ອອສເຕຣເລຍ ແລະຍີ່ປຸ່ນ "ໄດ້ສະແດງໃຫ້ເຫັນເຖິງຄວາມມຸ່ງໝັ້ນຂອງການຮ່ວມມືລະຫວ່າງທັງສາມປະເທດ ໃນການເພີ້ມທະວີການຮ່ວມມືຢູ່ໃນພາກພື້ນ ແລະການຮ່ວມມືລະດັບສາກົນ ເພື່ອສະໜັບສະໜຸນອິດສະຫຼະພາບ ແລະເປີດກວ້າງຢູ່ໃນຂົງເຂດ ອິນໂດ-ປາຊີຟິກ ໂດຍຜ່ານບັນດາການຊ້ອມລົບຮ່ວມກັນຢູ່ໃນຂອບເຂດການເດີນເຮືອທາງທະເລ."
ການຊ້ອມລົບດັ່ງກ່າວ ໄດ້ຮັບການໃຫ້ຂະໜານນາມວ່າ “ເປັນກິດຈະກຳຮ່ວມມືທາງທະເລຫຼາຍຝ່າຍ,” ການຊ້ອມລົບນັ້ນ ລວມມີ ບັນດາກອງກຳລັງທະຫານເຮືອ ແລະ ກອງທັບອາກາດຈາກທັງ 4 ປະເທດເຂົ້າຮ່ວມ.
ຖະແຫຼງການຂອງຟີລິບປິນ ກ່າວໃນວັນອາທິດວານນີ້ວ່າ ພວກເຂົາເຈົ້າໄດ້ທຳການຝຶກຊ້ອມກ່ຽວກັບການສື່ສານ, ຍຸດທະສາດດ້ານກອງທະຫານ, ແລະການຝຶກຊ້ອມໃນການເກັບກໍາຮູບພາບ.
ຟໍຣັມສະແດງຄວາມຄິດເຫັນ