ກຳປູເຈຍ ແລະ ຈີນ ຈະເລີ່ມການຊ້ອມລົບມັງກອນຄຳປະຈຳປີຂອງພວກເຂົາເຈົ້າໃນອາທິດນີ້ ເພື່ອເສີມຂະຫຍາຍການຮ່ວມມື ແລະ ການແລກປ່ຽນປະສົບການທາງທະຫານນຳກັນ, ເຈົ້າໜ້າທີ່ ກຳປູເຈຍ ຄົນນຶ່ງໄດ້ກ່າວໃນວັນຈັນວານນີ້.
ເຈົ້າໜ້າທີ່ກອງທັບລວມທັງໝົດ 1,315 ຄົນຈາກ ກຳປູເຈຍ ແລະ 760 ຄົນຈາກ ຈີນ ຈະເຂົ້າຮ່ວມໃນການຊ້ອມລົບ 15 ວັນ, ໜູນຫຼັງໂດຍກຳປັ່ນລົບ ຈີນ 3 ລຳ ແລະ ກຳປັ່ນ ກຳປູເຈຍ 11 ລຳ, ໂຄສົກກອງທັບບົກ ກຳປູເຈຍ ພົນຕີ ທອງ ໂຊລິໂມ ໄດ້ກ່າວຕໍ່ບັນດານັກຂ່າວ. ທ່ານໄດ້ກ່າວວ່າການຊ້ອມລົບດັ່ງກ່າວທີ່ຈະເລີ່ມຂຶ້ນໃນວັນພະຫັດນີ້ ແມ່ນແນເປົ້າໝາຍທີ່ຈະຝຶກຊ້ອມເພື່ອຕໍ່ສູ້ກັບລັດທິກໍ່ການຮ້າຍ, ແລະ ສະໜອງການຊ່ວຍເຫຼືອດ້ານມະນຸດສະທຳໃນສອງປະເທດດັ່ງກ່າວ ພ້ອມກັບໃນພາກພື້ນ.
ການຊ້ອມລົບມັງກອນຄຳປະຈຳປີ ໄດ້ເລີ່ມຂຶ້ນໃນເດືອນທັນວາ 2016, ບໍ່ດົນຫຼັງຈາກ ກຳປູເຈຍ ໄດ້ຍົກເລີກການຝຶກຊ້ອມທີ່ຄ້າຍຄືກັນກັບ ສະຫະລັດ ທີ່ເອີ້ນວ່າ ທະຫານຍາມ ອັງກໍ.
ຈີນ ໄດ້ອະທິບາຍມິດຕະພາບຂອງເຂົາເຈົ້າກັບ ກຳປູເຈຍ ວ່າ “ແຂງແກ່ນຫຼາຍ.” ກຳປູເຈຍ ແມ່ນພັນທະມິດທີ່ໃກ້ຊິດທີ່ສຸດຂອງ ຈີນ ໃນເອເຊຍຕາເວັນອອກສຽງໃຕ້, ໃນຂະນະທີ່ ຈີນ ແມ່ນພັນທະມິດທີ່ສຳຄັນທີ່ສຸດຂອງ ກຳປູເຈຍ ແລະ ຜູ້ມີຜົນປະໂຫຍດ, ດ້ວຍອິດທິພົນທີ່ແຂງແກ່ນຕໍ່ເສດຖະກິດຂອງເຂົາເຈົ້າ.
ກຳປູເຈຍ ມີຫຼາຍໂຄງການທີ່ໄດ້ຮັບທຶນຊ່ວຍເຫຼືອຈາກ ຈີນ, ໂດຍສະເພາະພື້ນຖານໂຄງລ່າງ ລວມມີ ສະໜາມບິນ ແລະ ຖະໜົນຫົນທາງ, ແຕ່ກໍຍັງມີໂຄງການເອກະຊົນອີກດ້ວຍ ເຊັ່ນ ໂຮງແຮມ, ກາຊິໂນ ແລະ ການພັດທະນາອະສັງຫາລິມະຊັບ. ຫຼາຍກວ່າ 40 ເປີເຊັນຂອງໜີ້ສິນຕ່າງປະເທດມູນຄ່າ 10 ຕື້ໂດລາຂອງ ກຳປູເຈຍ ແມ່ນໜີ້ທີ່ມີຕໍ່ ຈີນ.
ຟໍຣັມສະແດງຄວາມຄິດເຫັນ