ທ່ານ Stephen Harper ນາຍົກລັດຖະມົນຕີການາດາໄດ້ນໍາພາພັກ ນິຍົມແນວທາງເດີມຂອງທ່ານທີ່ປົກຄອງປະເທດໃນປັດຈຸບັນໄປສູ່ໄຊຊະນະຢ່າງຂາດຮອຍໃນການເລືອກຕັ້ງເອົາສະມາຊິກສະພາໃນວັນຈັນວານນີ້.
ຜົນຂອງການເລືອກຕັ້ງຊົ່ວຄາວສະແດງໃຫ້ເຫັນວ່າ ພວກຜູ້ສະມັກນິຍົມແນວທາງເດີມໄດ້ຊະນະບ່ອນນັ່ງ ຢ່າງໜ້ອຍ 167 ບ່ອນຢູ່ໃນສະພາແຫ່ງຊາດ ລື່ນຈໍານວນ 155 ບ່ອນທີ່ຕ້ອງການເພື່ອໃຫ້ໄດ້ຮັບສຽງຂ້າງຫລາຍໃນສະພາແຫ່ງຊາດທີ່ມີບ່ອນນັ່ງທັງໝົດ 308 ບ່ອນນັ້ນ.
ໄຊຊະນະທີ່ວ່ານີ້ຈະອໍານວຍໃຫ້ທ່ານ Harper ມີສຽງຂ້າງຫລາຍເປັນເທື່ອທໍາອິດຢູ່ໃນ
ສະພາ ນັບແຕ່ໄດ້ຂຶ້ນເປັນນາຍົກລັດຖະມົນຕີໃນປີ 2006 ເປັນຕົ້ນມາແລະຈະອໍານວຍ
ໃຫ້ທ່ານປົກຄອງປະເທດໄດ້ໂດຍບໍ່ມີການລົບກວນຫລືຄັດຄ້ານຈົນຮອດປີ 2015.
ນາຍົກລັດຖະມົນຕີແລະພັກນິຍົມແນວທາງເດີມໄດ້ໂຄສະນາຫາສຽງເລືອກຕັ້ງບົນນະໂຍບາຍ
ທີ່ວ່າ ຈະຮັກສາໄວ້ຕໍ່ໄປເສດຖະກິດທີ່ແຂງແຮງຂອງການາດາ ທີ່ສາມາດຕ້ານຢັນຕໍ່ວິກິດ
ການດ້ານເສດຖະກິດຂອງໂລກມາໄດ້ນັ້ນ ໂດຍສືບຕໍ່ຄໍາໜັ້ນສັນຍາຂອງທ່ານທີ່ຈະລົດຄ່າ
ພາສີລາຍໄດ້ຂອງພວກບໍລິສັດແລະຂອງສ່ວນບຸກຄົນລົງ ແລະຕັດລາຍຈ່າຍຂອງລັດຖະບານລົງ.
