ລັດຖະບານກຳປູເຈຍໄດ້ສັ່ງໃຫ້ບໍລິສັດສະໜອງການບໍລິການອິນເຕີແນັດ ຫລື ISP ປິດເວັບໄຊທ໌ ແລະບັນຊີສື່ສັງຄົມຂອງ 9 ໂດເມນ ທີ່ເປັນຂອງຢ່າງໜ້ອຍ 3 ສຳນັກ ຂ່າວສານ ລວມທັງໜັງສືພິມ Cambodia Daily ແລະວິທະຍຸເອເຊຍເສລີ ໃນເວລາພຽງນຶ່ງອາທິດ ກ່ອນໜ້າການເລືອກຕັ້ງແຫ່ງຊາດທີ່ບໍ່ມີການແຂ່ງຂັນທີ່ຈະຈັດຂຶ້ນ ໃນວັນທີ 23 ກໍລະກົດ, ອີງຕາມຈົດໝາຍທາງການທີ່ວີໂອເອພາກພາສາຂະແມໄດ້ມາ.
ຈົດໝາຍສະບັບວັນທີ 12 ກໍລະກົດທີ່ມາອອກໂດຍກົມຄຸ້ມຄອງໂທລະຄົມມະນາຄົມ ຂອງກຳປູເຈຍ, ເຊິ່ງເປັນໜ່ວຍງານນຶ່ງທີ່ຢູ່ພາຍໃຕ້ກະຊວງໄປສະນີ ແລະໂທລະຄົມ ມະນາຄົມລະບຸວ່າລັດຖະບານໄດ້ສັ່ງໃຫ້ບໍລິສັດ ISP ປິດໂດເມນຕ່າງໆ ລວມທັງບັນ ຊີທວີດເຕີ (Twitter), ອິນສຕາແກຣມ (Instagram) ແລະຢູທູບ (YouTube) ຂອງໜັງສືພິມ Cambodia Daily Khmer ແລະວິທະຍຸເອເຊຍເສລີ ຊຶ່ງຄືກັນກັບວີໂອເອ ທີ່ເປັນອົງການອິດສະຫລະດຳເນີນງານຢູ່ພາຍໃຕ້ອົງການສື່ມວນຊົນໂລກຂອງສະຫະລັດ ຫລື USAGM. ທັງສອງອົງການນີ້ ກະຈາຍຂ່າວເປັນພາສາຂະແມ ແລະພາສາອັງກິດ, ແລະທັງສອງອົງການແມ່ນມີສໍານັກງານໃຫຍ່ ຕັ້ງຢູ່ນອກປະເທດກໍາປູເຈຍ.
ລັດຖະບານຍັງໄດ້ປິດບັນຊີທວີດເຕີ (Twitter) ແລະເວັບໄຊທ໌ຂອງອົງການກົມໂນດ ທຣາ (Komnotra), ຖານຂໍ້ມູນໃຫມ່ຂອງວິທະຍຸ Voice of Democracy ຫລື ສຽງຂອງປະຊາທິປະໄຕ, ເຊິ່ງລັດຖະບານໄດ້ປິດໄວ້. ກົມໂນດທຣາ (Komnotra) ຍັງອອກອາກາດສົດ ຜ່ານທາງເຟັສບຸກ (Facebook) ໄດ້.
ກົມໂນດທຣາ (Komnotra) ແມ່ນຖານຂໍ້ມູນສາທາລະນະທີ່ຫາກໍ່ເປີດຕົວໃຫມ່ ທີ່ດໍາເນີນງານໂດຍສູນສື່ມວນຊົນອິດສະຫລະຂອງກໍາປູເຈຍ (CCIM) ທີ່ເປັນອົງການດໍາເນີນງານວິທະຍຸ ສຽງຂອງປະຊາທິປະໄຕ.
