ອະດີດຜູ້ນໍາອັນດັບສອງ ຂອງລະບອບຂະເໝນແດງທີ່ໂຫດຮ້າຍຂອງກໍາປູເຈຍ ເວົ້າວ່າ ຜູ້ກ່ຽວແລະບັນດາສະຫາຍຂອງຕົນ ບໍ່ແມ່ນ "ພວກຄົນບໍ່ດີ.”
ທ່ານ Nuon Chea ໄດ້ກ່າວໃນວັນຈັນມື້ນີ້ ຕໍ່ຜູ້ດໍາເນີນຄະດີອາຊະຍາກໍາສົງຄາມຂອງກໍາປູເຈຍ ທີ່ໄດ້ຮັບການໜຸນຫລັງຈາກສະຫະປະຊາຊາດ ວ່າ ທ່ານບໍ່ຢາກໃຫ້ “ຄົນຮຸ້ນຕໍ່ໄປ” “ເຂົ້າໃຈປະຫວັດສາດຢ່າງຜິດໆ” ແລະ ເຊື່ອວ່າ ຂະເໝນແດງເປັນອາຊະຍາກອນ.
ຫົວໜ້ານັກທິດສະດີ Nuon Chea ທີ່ມີຊື່ສຽງ, ຫົວໜ້າກຸ່ມຂະເໝນແດງ ຂຽວ ສໍາພັນ ແລະອະດີດລັດຖະມົນຕີການຕ່າງປະເທດຂະເໝນແດງ ອ່ຽງຊາຣີ ກໍາລັງຖືກດໍາເນີນຄະດີ ໃນຂໍ້ຫາມີສ່ວນພົວພັນນໍາການປົກຄອງ ຂອງຂະເໝນແດງ ແຕ່ປີ 1975 ຫາ 1979 ຊຶ່ງໄລຍະດັ່ງກ່າວນັ້ນ ປະຊາຊົນຂະເໝນຈໍານວນ 1 ສ່ວນ 4 ຂອງພົນລະເມືອງທັງໝົດ ໄດ້ຖືກຂ້າຕາຍ.
ທ່ານ Nuon Chea ໄດ້ຖິ້ມໂທດໃສ່ຫວຽດນາມວ່າ ເປັນຜູ້ເຂ່ນຂ້າປະຊາຊົນເຫລົ່ານີ້ ໃນຄໍາໃຫ້ການຢູ່ສານນັ້ນ.
ຈໍາເລີຍທັງສາມຄົນນັ້ນ ລ້ວນແລ້ວແຕ່ມີອາຍຸໄດ້ຫລາຍກວ່າ 80 ປີ.
ຄາດວ່າ ບັນດາໄອຍະການ ຈະຮ້ອງຂໍໃຫ້ລົງໂທດຕໍ່ພວກຈໍາເລີຍເຫລົ່ານັ້ນ ໃນຂັ້ນສູງສຸດ ຄືຈໍາຄຸກຕະຫລອດຊີວິດ ແຕ່ຫລາຍຄົນຄິດວ່າພວກຈໍາເລີຍ ເຫລົ່ານີ້ ຈະບໍ່ມີອາຍຸຍືນພໍທີ່ຈະໄດ້ຖືກນໍາມາຮັບໂທດກໍາ.
ການດໍາເນີນຄະດີ ຄາດວ່າ ຈະດໍາເນີນໄປເປັນເວລາສອງປີ.